REGİONLAR
Bakıda kənd təsərrüfatı məhsullarının növbəti satış yarmarkaları keçirilib
“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 13,35 ton məhsul, o cümlədən 0,4 ton ət, 0,1 ton ağartı, 3,5 ton tərəvəz, 4 ton meyvə və s. təklif olunurdu.
Alıcılar bildirdilər ki, yarmarkaların müntəzəm keçirilməsi bizi çox sevindirir. Çünki artıq kənd təsərrüfatı mallarına ailələrimizin tələbatını ödəmək üçün çox nadir hallarda bazarlara üz tuturuq.
Yarmarkaların təşkilindən satıcılar da razılıq edirdilər. Bildirirdilər ki, bu yarmarkalar bizi bazarlarda üzləşdiyimiz çətinliklərdən qurtarıb, yetişdirdiyimiz məhsulları rahatca satmağa imkan yaradıb.
Yarmarkanın təşkilindən razılıq edən paytaxt sakini Firəngiz Musayeva dedi ki, buradakı məhsulların təzəliyi, bolluğu, qiymətlərin ucuzluğu hamını qane edir. Həm də satıcılar müştəriləri çəkidə aldatmırlar.
Kənd Təsərrüfatı Nazirliyinin nümayəndəsi Səfəralı Nəsirov dedi ki, yarmarkadakı qiymətlər bazardakından 20-25 faiz ucuzdur. Qoyun ətinin kiloqramı 6 manata, mal əti 5 manata, soğan 25-35, yumurtanın 1 ədədi 6-9 qəpiyə və s. satılır.
Şənbə günü Yasamal rayonunda, Bakı Rabitə və Nəqliyyat Kollecinin həyətində təşkil edilən yarmarkaya bu əraziyə təhkim olunmuş Salyan, Qusar, Astara, Şabran, bundan əlavə Sabirabad, Quba, Göyçay, Gədəbəy, Kürdəmir, Bərdə, Xaçmaz rayonlarının fermerləri və torpaq mülkiyyətçiləri tərəfindən 139,2 ton meyvə-tərəvəz, bostan məhsulları, mal və qoyun əti, ağartı, göyərti və digər kənd nemətləri çıxarılmışdı.
Kənd Təsərrüfatı Nazirliyinin nümayəndəsi Vidadi Bayramov məlumat verdi ki, yarmarkada bütün növ kənd təsərrüfatı məhsulları vardır. Satışa çıxarılan məhsullar arasında mövsümə uyğun kənd nemətləri üstünlük təşkil edir. Burada bütün məhsullar bazarlardakından 25-30 faiz ucuz satılır. Məsələn, kartof 40-65, soğan 25-30 qəpiyə, pomidor 70 qəpik- 1 manata, xiyar 50-70, qarpız 30-35, yemiş 50-70, alma 50-80 qəpiyə, armud 70 qəpik-1 manata, üzüm 80 qəpik-1 manat 20 qəpiyə təklif olunur.
Yarmarkaya daxil olan məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.
Yarmarkada nəzarət tərəzisi qoyulub, bütün məhsulların bazarlarla müqayisəli qiymətləri göstərilib.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 19,2 ton kənd təsərrüfatı məhsulları çıxarılmışdı.
Yarmarkada pomidorun kiloqramını 80, xiyarın kiloqramını 70 qəpiyə təklif edən ağdaşlı torpaq mülkiyyətçisi Məmməd Nuriyev bildirdi ki, indiyədək pay torpağında becərdiyi məhsulun 70 faizini burada satıb. O, yaradılan şəraitdən razılıqla danışaraq vurğuladı ki, hələ noyabrın əvvəllərinə qədər qəsəbə sakinlərinə təklif etməyə məhsulu var.
Yarmarkaya Salyandan üzüm gətirən Nəcəf Babayev məhsulun kiloqramını 80 qəpiyə təklif edirdi. O, son bir ayda burada 3 tondan çox məhsul satdığını bildirdi.
Burada təklif edilən pomidor, xiyar, badımcan, bibər, kartof, soğan, qarpız, yemiş, şaftalı, alma, armud və digər məhsullar qəsəbə sakinləri tərəfindən həvəslə alınırdı.
Yarmarkada təklif edilən məhsulların keyfiyyətli və bazardakından 25-30 faiz ucuz olması alıcılar tərəfindən razılıqla qarşılanırdı.
Kənd Təsərrüfatı Nazirliyinin nümayəndəsi Məmməd Həziyev bildirdi ki, qəsəbə sakinlərin tələbatı nəzərə alınaraq yarmarkaya gətirilən məhsulların çeşidində ciddi dəyişikliklər edilib. Eyni zamanda, məhsulların keyfiyyəti ciddi surətdə yoxlanılır, xüsusilə ət və süd məhsulları baytar müayinəsindən keçirilir.
Suraxanı rayonu ərazisində təşkil olunmuş yarmarkalarda-“Günəş” ticarət mərkəzində (18,4 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,4 ton) satışa Samux, Quba, Biləsuvar, Cəlilabad və Ağsu rayonlarından, ümumilikdə, 20,8 ton məhsul çıxarılmışdı.
Kənd Təsərrüfatı Nazirliyinin nümayəndəsi Samir Hidayətov bildirdi ki, hər iki yarmarkada mövsümi kənd nemətlərindən pomidor, xiyar, göyərti, kartof, soğan, lobya, badımcan, kələm, alma, armud, gavalı, şaftalı, üzüm, zoğal, yemiş, qarpız və digər məhsulların alıcıları çoxluq təşkil edir. Qiymətlər bazarlarla müqayisədə 25-30 faiz ucuzdur.
Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Şənbə günü Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 246 ton meyvə-tərəvəz, ət və süd məhsulları gətirilmişdi.
Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, yarmarkada məhsulların qiymətləri bazarlardakından 20-25 faiz ucuzdur. Eyni zamanda, məhsulların keyfiyyətinə və qiymətinə ciddi nəzarət olunur.
Burada qoyun ətinin kiloqramı – 5-6 manata, mal əti – 5 manat – 5 manat 50 qəpiyə, quş əti – 2 manat 20 qəpik- 4 manata, üzüm – 1 manat – 1 manat 20 qəpiyə, alma – 50 qəpik - 1 manata, armud – 70 qəpik- 1 manata, xiyar - 50-70, pomidor - 70–80, kartof - 40-65, soğan 25-40, qarpız – 35, yemiş - 50-70 qəpiyə, yumurtanın biri ədədi – 5-8 qəpiyə təklif edilir.
Şəhər sakinləri yarmarkada yaradılan şəraitdən razıdırlar.
Kənd Təsərrüfatı Nazirliyinin nümayəndəsi Fəxrət Eminov bildirdi ki, şənbə günü Nərimanov rayonunda, metronun “Gənclik” stansiyasının yaxınlığındakı yarmarkaya Xaçmaz, Tərtər, İmişli, Salyan, Tovuz, Neftçala, Oğuz rayonlarından 59,4 ton kənd təsərrüfatı məhsulları gətirilib.
Yarmarkada ilk baxışdan canlanma, bolluq və qızğın alış-veriş gözə çarpır, çeşidlərin müxtəlifliyi hiss olunurdu. Alıcılara mövsümə uyğun bostan bitkiləri-qarpız, yemiş, tərəvəzlərdən pomidor, xiyar, kələm, kartof, soğan, yerkökü, çuğundur, meyvələrdən alma, armud, çiyələk, şaftalı, gavalı, üzüm, qarağat, həmçinin ağartı, göyərti və s. kənd nemətləri təklif edilirdi.
Paytaxt sakinləri yarmarkadakı meyvə-tərəvəz, göyərti və ağartı məhsullarının təzə və keyfiyyətli, eyni zamanda, bazarlardakından 25-30 faiz ucuz qiymətə olmasından razılıq edirdilər. Yarmarkada kələm 70-90, badımcan 30-40, yerkökü 70-90 qəpiyə. Lobya 2 manata, alma 50-80 qəpiyə, armud 70 qəpik-1 manata, üzüm 80 qəpik-1 manat 20 qəpiyə təklif edilirdi.
Yarmarkada Kənd Təsərrüfatı Nazirliyinin və Nərimanov Rayon İcra Hakimiyyətinin nümayəndələri tərəfindən qayda-qanuna ciddi nəzarət olunurdu.
Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya Bərdə, Ağstafa, Siyəzən, Goranboy və başqa rayonların fermerləri və digər torpaq mülkiyyətçiləri fermerlər müxtəlif çeşiddə meyvə-tərəvəzlər, süd və bostan məhsulları gətiriblər. Məhsulların qiymətləri bazarlardakından 20-30 faiz ucuzdur.
Şəhər sakinləri burada pomidoru 50-80, kartofu 40-60, kələmi 50-60, badımcanı 25-30, almanı 30-50, üzümü 50-80, qarpızı 25-30 qəpiyə ala bilirlər.
Kənd Təsərrüfatı Nazirliyinin nümayəndəsi Qadir Həsənov bildirdi ki, yarmarkaya ümumilikdə 25,7 ton kənd təsərrüfatı məhsulları çıxarılıb.