İQTİSADİYYAT
Bakıda kənd təsərrüfatı məhsullarının növbəti satış yarmarkaları keçirilib
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdi.
Burada alıcılara Sabirabad, Gədəbəy, Hacıqabul və digər rayonlardan gətirilən 13,25 ton məhsul, o cümlədən 0,4 ton ət, 0,1 ton ağartı, 3,5 ton tərəvəz, 4 ton meyvə və s. təklif olunurdu.
Paytaxt sakinləri onlara sərfəli qiymətə payız mövsümünə uyğun təklif edilən bol meyvə-tərəvəzi, o cümlədən pomidor, xiyar, badımcan, lobya, kartof, soğan, yerkökü, kələm, üzüm, gavalı, alma, armudu, ağartını həvəslə alırlar.
Kənd Təsərrüfatı Nazirliyinin nümayəndəsi Səfəralı Nəsirov dedi ki, yarmarkadakı qiymətlər bazarlardakından 20-25 faiz ucuzdur. Yarmarkada kələm 70-90, badımcan 30-40, yerkökü 70-90 qəpiyə, lobya 2 manata, alma 50-80 qəpiyə, armud 70 qəpik - 1 manata, üzüm 80 qəpik - 1 manat 20 qəpiyə təklif edilirdi. Burada, həmçinin qoyun ətinin kiloqramı 6 manata, mal əti 5 manata, yumurtanın 1 ədədi 6-8 qəpiyə və s. satılırdı.
Şənbə günü Yasamal rayonunda, Bakı Rabitə və Nəqliyyat Kollecinin həyətində təşkil edilən yarmarkaya bu əraziyə təhkim olunmuş Salyan, Qusar, Astara, Şabran, bundan əlavə Sabirabad, Quba, Göyçay, Gədəbəy, Kürdəmir, Bərdə, Xaçmaz rayonlarının fermerləri və torpaq mülkiyyətçiləri tərəfindən 141,8 ton meyvə-tərəvəz, bostan məhsulları, mal və qoyun əti, ağartı, göyərti və digər kənd nemətləri çıxarılmışdı.
Kənd Təsərrüfatı Nazirliyinin nümayəndəsi Vidadi Bayramov məlumat verdi ki, yarmarkada bütün növ kənd təsərrüfatı məhsulları vardır. Satışa çıxarılan məhsullar arasında mövsümə uyğun kənd nemətləri üstünlük təşkil edir. Burada bütün məhsullar bazarlardakından 25-30 faiz ucuz satılır. Məsələn, kartof 40-65, soğan 25-30 qəpiyə, pomidor 70 qəpik - 1 manata, xiyar 50-70, alma 50-80 qəpiyə, armud 70 qəpik - 1 manata, üzüm 80 qəpik - 1 manat 20 qəpiyə təklif olunur.
Yarmarkaya daxil olan məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.
Yarmarkada nəzarət tərəzisi qoyulub, bütün məhsulların bazarlarla müqayisəli qiymətləri göstərilib.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 16,5 ton kənd təsərrüfatı məhsulları çıxarılmışdı.
Yarmarkaya Salyandan üzüm gətirmiş Miri Babayev məhsulun kiloqramını 1 manat - 1 manat 50 qəpiyə təklif edirdi. Torpaq mülkiyyətçisi son aylarda burada 3 ton məhsul satdığını bildirdi. O, yaradılan şəraitdən razılığını ifadə etdi.
Yarmarkada təklif edilən məhsulların keyfiyyətli və bazarlardakından 25-30 faiz ucuz olması alıcılar tərəfindən razılıqla qarşılanırdı.
Kənd Təsərrüfatı Nazirliyinin nümayəndəsi Məmməd Həziyev bildirdi ki, yarmarkada qəsəbə sakinlərinin tələbatı nəzərə alınaraq məhsulların çeşidinə ciddi dəyişikliklər edilib. Burada məhsulların keyfiyyəti ciddi surətdə yoxlanılır, xüsusilə ət və süd məhsulları baytar müayinəsindən keçirilir.
Qəsəbə sakinləri təklif edilən pomidor, xiyar, badımcan, bibər, kartof, soğan, qarpız, gavalı, alma, armud, üzüm və digər məhsulları həvəslə alırdılar.
Suraxanı rayonu ərazisində təşkil olunmuş yarmarkalarda -“Günəş” ticarət mərkəzində (19,8 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (3,7 ton) satışa Samux, Quba, Biləsuvar, Cəlilabad və Ağsu rayonlarından, ümumilikdə, 23,5 ton məhsul çıxarılmışdı.
Kənd Təsərrüfatı Nazirliyinin nümayəndəsi Samir Hidayətov bildirdi ki, hər iki yarmarkada mövsümi kənd nemətlərindən pomidor, xiyar, göyərti, kartof, soğan, lobya, badımcan, kələm, alma, armud, gavalı, şaftalı, üzüm, zoğal, yemiş, qarpız, balqabaq və digər məhsulların alıcıları çoxluq təşkil edir. Qiymətlər bazarlarla müqayisədə 25-30 faiz ucuzdur. Məsələn, burada kartof 40-65, bibər 50-80 qəpiyə, pomidor 80 qəpik - 1 manata, üzüm 80 qəpik -1 manat 20 qəpiyə təklif olunur.
Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Şənbə günü Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 305,6 ton meyvə-tərəvəz, ət və süd məhsulları gətirilmişdi.
Kənd Təsərrüfatı Nazirliyinin nümayəndəsi Mustafa Rüstəmov məlumat verdi ki, yarmarkada məhsulların qiymətləri bazarlardakından 20-25 faiz ucuzdur. Eyni zamanda, məhsulların keyfiyyətinə və qiymətinə ciddi nəzarət olunur.
Yarmarkada qoyun ətinin kiloqramı – 5-6 manata, mal əti – 5 manat – 5 manat 50 qəpiyə, quş əti – 2 manat 20 qəpik - 4 manata, üzüm – 1 manat - 1 manat 20 qəpiyə, şaftalı – 1 manata, pomidor – 70-80, badımcan – 40, xiyar - 60-70, kartof - 60-65, soğan 35-40, qarpız – 30, yemiş - 70 qəpiyə, yumurtanın biri – 7-9 qəpiyə təklif edilir.
Şəhər sakinləri yarmarkada yaradılan şəraitdən razıdırlar.
Kənd Təsərrüfatı Nazirliyinin nümayəndəsi Qüdsi Rəhimov bildirdi ki, şənbə günü Nərimanov rayonunda, metronun “Gənclik” stansiyasının yaxınlığındakı yarmarkaya Xaçmaz, Tərtər, İmişli, Salyan, Tovuz, Neftçala, Oğuz rayonlarından 59,7 ton kənd təsərrüfatı məhsulları gətirilib.
Yarmarkada ilk baxışdan canlanma, bolluq və qızğın alış-veriş gözə çarpır, çeşidlərin müxtəlifliyi hiss olunurdu. Alıcılara mövsümə uyğun bostan bitkiləri - qarpız, yemiş, balqabaq, tərəvəzlərdən pomidor, xiyar, kələm, kartof, soğan, yerkökü, çuğundur, meyvələrdən alma, armud, çiyələk, şaftalı, gavalı, üzüm, qarağat, həmçinin ağartı, göyərti və s. kənd nemətləri təklif edilirdi.
Paytaxt sakinləri yarmarkadakı meyvə-tərəvəz, göyərti və ağartı məhsullarının təzə və keyfiyyətli, eyni zamanda, bazarlardakından 25-30 faiz ucuz qiymətə olmasından razılıq edirdilər. Yarmarkada kələm 70-90, badımcan 30-40, yerkökü 70-90 qəpiyə, lobya 2 manata, alma 50-80 qəpiyə, armud 70 qəpik - 1 manata, üzüm 80 qəpik - 1 manat 20 qəpiyə təklif edilirdi.
Kənd Təsərrüfatı Nazirliyinin və Nərimanov Rayon İcra Hakimiyyətinin nümayəndələri tərəfindən yarmarkada qayda-qanuna ciddi nəzarət olunurdu.
Binəqədi rayonu, 6 nömrəli Bakı Texniki Peşə Liseyinin qarşısındakı yarmarkada Ağstafa, Siyəzən, Goranboy, Bərdə və s. rayonlardan gəlmiş fermerlər və digər torpaq mülkiyyətçiləri paytaxt sakinlərinə bol meyvə-tərəvəz, süd və bostan məhsulları təklif edirdilər.
Məhsulların qiymətləri bazarlardakından 20-30 faiz ucuz idi. Burada meyvə-tərəvəz, süd və bostan məhsulları həm də keyfiyyəti ilə diqqəti cəlb edirdi. Şəhər sakinləri pomidorun kiloqramını 50-90, kələmi 60-70, kartofu 40-60, badımcanı 25-30, almanı 25-50, üzümü 50-90, yemişi 40-60, qarpızı 20-25 qəpiyə ala bilirdilər.
Kənd Təsərrüfatı Nazirliyinin nümayəndəsi Qadir Həsənovun verdiyi məlumata görə, yarmarkaya 23,7 ton meyvə-tərəvəz, bostan və süd məhsulları çıxarılıb.