ELM VƏ TƏHSİL
Bakıda regional təhsil konfransı keçirilir
Bakı, 25 may, İbrahim Əsədov, Tərgül Ağayeva, AZƏRTAC
Mayın 25-də “Hilton Baku” otelində Asiya İnkişaf Bankının (AİB) və Təhsil Nazirliyinin birgə təşkilatçılığı ilə ikigünlük regional təhsil konfransı işə başlayıb.
AZƏRTAC xəbər verir ki, “12 illik Təhsil Sistemini Dəstəkləyən İnnovasiya Strategiyası” mövzusu üzrə keçirilən tədbirdə Azərbaycan, Kanada, Böyük Britaniya, Finlandiya, ABŞ, Koreya Respublikası və digər ölkələrdən olan alim və təhsil mütəxəssisləri iştirak edirlər.
Konfransda təhsil naziri Mikayıl Cabbarov ölkəmizdə təhsil sahəsinə böyük önəm verdiyini bildirib, Prezident İlham Əliyevin müvafiq Sərəncamı ilə təsdiq edilmiş “Azərbaycan Respublikasında təhsilin inkişafı üzrə Dövlət Strategiyası”nın əhəmiyyətindən danışıb.
Nazir müasir dünyada, ölkənin tərəqqisində təhsilin mühüm rolunu qeyd edib, bu sahənin inkişafı ilə bağlı fikirlərini diqqətə çatdırıb.
Qeyd olunub ki, Azərbaycanda təhsil sahəsində həyata keçirilən islahat və proqramlar yüksək ixtisaslı mütəxəssislərin hazırlanması üçün ölkənin təhsil sisteminin beynəlxalq standartlara uyğunlaşdırılmasını nəzərdə tutur. Ölkənin 2020-ci ilə qədər olan dövrdə Milli İnkişaf Strategiyasında 12 illik orta təhsilə keçid və şagirdlərin 16 yaşınadək icbari təhsili müddəası yer alıb.
Təhsillə bağlı aparılan müzakirələrin səmərəli olacağına əminliyini vurğulayan Yaponiyanın Bakıdakı səfiri Tsuquo Takahaşi tədbirin təşkilatçılarına təşəkkürünü bildirib.
AİB-in Mərkəzi və Qərbi Asiya Departamentinin dövlət idarəçiliyi, maliyyə və ticarət sektorunun direktoru Betty Vilkinson mövzu ilə bağlı fikirlərini bölüşüb.
Kanadanın uşaq və gənclər xidməti naziri müavininin köməkçisi Aryeh Giterman, Birləşmiş Ərəb Əmirliklərinin Elm və İnsan İnkişafı Komitəsi direktorlar şurasının sədri Abdulla əl-Kərəm ölkələrinin təhsil sistemindən bəhs ediblər.
Sonra biliklərə əsaslanan bazar iqtisadiyyatı üçün daha yüksək ixtisaslı mütəxəssislərin hazırlanmasını təmin etmək məqsədilə ölkəmizin təhsil sistemi təhlil olunub.
Ekspertlər Azərbaycanda biliklər cəmiyyətinin qurulmasının əsas elementi olan 12 illik təhsil sistemi ilə bağlı təcrübə mübadiləsi aparıblar.
Konfrans mayın 26-da başa çatacaq.
Xatırladaq ki, AİB-in Azərbaycanda keçirilmiş 48-ci illik toplantısında Asiya-Sakit okean regionunda inklüziv artım və innovasiyanın möhkəmləndirilməsinin vacibliyi geniş müzakirə edilib. Tədbirdə qeyd olunub ki, insan kapitalının inkişaf etdirilməsi bu baxımdan mühüm amildir.