REGİONLAR


Bakılı məktəblilər Naxçıvandan xoş təəssüratlarla ayrılıblar

A+ A

Naxçıvan, 27 mart, Rauf Əliyev, AZƏRTAC

Martın 24-dən 27-dək respublikamızın bir sıra regionlarında olduğu kimi, Naxçıvan Muxtar Respublikasında da “Ölkəmizi tanıyaq” devizi ilə keçirilən növbəti maarifləndirici tur-aksiya başa çatıb. Bu münasibətlə Naxçıvan şəhərində yerləşən Gənclər Mərkəzində məktəblilərlə görüş keçirilib.

AZƏRTAC xəbər verir ki, tədbirdə Naxçıvan Muxtar Respublikası Ali Məclisinin Sədri yanında Gənclər Fondunun icraçı direktoru Məmməd Babayev tur-aksiya iştirakçılarını salamlayıb, bu cür tədbirlərin əhəmiyyətindən danışıb. Qeyd edib ki, Azərbaycan Respublikasının Prezidenti cənab İlham Əliyevin tapşırığına əsasən keçirilən tur-aksiyalar məktəblilərin ölkəmizin tarixini, mədəniyyətini, adət-ənənələrini, müstəqillik illərində əldə edilmiş nailiyyətləri dərindən öyrənmələri baxımından böyük əhəmiyyətə malikdir.

Naxçıvan Muxtar Respublikasının təhsil naziri Məmməd Qəribov bildirib ki, “Ölkəmizi tanıyaq” tur-aksiyası məktəblilərin respublikamızın bölgələrini tanıması, tarixi-mədəni abidələri ilə yaxından tanış olması baxımından böyük əhəmiyyətə malikdir. Tur-aksiyalar gənc nəslin vətənpərvərlik ruhunda tərbiyə olunmasına, onların dünyagörüşünün formalaşmasına da öz töhfəsini verir. Bu baxımdan bakılı məktəblilərin muxtar respublikaya səfəri onların bu qədim diyarın tarixi, mədəniyyəti, sosial-iqtisadi inkişafı ilə yaxından tanış olmalarına geniş imkan yaratdı.

Məmməd Qəribov Azərbaycanın qədim diyarı olan muxtar respublikada təhsil sahəsində əldə edilən nailiyyətlərdən də ətraflı söhbət açıb.

Naxçıvan Muxtar Respublikasının gənclər və idman naziri Azad Cabbarov qeyd edib ki, ölkəmizdə həyata keçirilən dövlət gənclər siyasətinin başlıca məqsədlərindən biri gənc nəslin Vətənə, xalqımızın milli-mənəvi dəyərlərinə hörmət və məhəbbət ruhunda tərbiyə olunmasıdır. “Ölkəmizi tanıyaq” devizi ilə keçirilən maarifləndirici tur-aksiyalar da məhz bu amala xidmət edir. Bu gəzintilər ölkəmizin tarixini dərindən öyrənməklə yanaşı, gənclərimizə ümummilli lider Heydər Əliyevin rəhbərliyi ilə milli dövlət quruculuğu sahəsində görülmüş işlərlə, Azərbaycan Respublikasının Prezidenti İlham Əliyevin həyata keçirdiyi dinamik sosial-iqtisadi inkişafla həm də muxtar respublikanın nümunəsində tanış olmaq imkanı yaradıb.

Azad Cabbarov deyib ki, bu gün muxtar respublikada dövlət gənclər siyasəti uğurla həyata keçirilir. Bunun nəticəsində gənclər muxtar respublikanın ictimai-siyasi, iqtisadi və mədəni həyatında daha da fəal iştirak edir, gənc istedadlara dövlət qayğısı artırılır. Bu gün gənclər milli-mənəvi dəyərlərimizə hörmət ruhunda tərbiyə olunur, yeni ideyaların təşəbbüskarı və dövlət idarəçiliyində aparıcı qüvvə kimi formalaşır, böyük nailiyyətlər əldə edirlər. Muxtar respublikada bədən tərbiyəsi və idmanın kütləviliyinə nail olunması, müasir idman infrastrukturunun yaradılması, gənclərin idmana marağının artırılması da daim diqqət mərkəzində saxlanılır.

Tədbirin sonunda tur-aksiya iştirakçılarına hədiyyələr təqdim olunub.

Dörd gün ərzində bu qədim diyarın tarixi və mədəniyyəti ilə tanış olan məktəblilər martın 27-də Naxçıvan Beynəlxalq Hava Limanından Bakı şəhərinə yola salınıblar.

X X X

“Ölkəmizi tanıyaq” devizi ilə keçirilən maarifləndirici tur-aksiya çərçivəsində Bakı şəhərində səfərdə olan naxçıvanlı şagirdlər də həmin gün muxtar respublikaya qayıdıblar.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.