MƏDƏNİYYƏT


Bakının kinoteatrları - böyük kino aləminə bilet

Bakı, 7 mart, AZƏRTAC

Bu gün Bakı mənalı istirahət etmək üçün hər cür imkana malik bir şəhərdir. Əgər sizin üçün istirahətin sevimli növlərindən biri kinoya getməkdirsə, onda gözəl təchiz olunmuş kinozallar xidmətinizdədir.

Sizə Bakı və Abşeronda yerləşən ən müasir tələblərə cavab verən bir neçə böyük kinoteatrla tanış olmağı təklif edirik.

Klassika və premyeralar

Bakıda ən müasir, əsasən də böyük əyləncə komplekslərində yerləşən “IMAX” kimi müasir formatlı kinoteatrlar dünya kinoprokatının ən yeni filmlərinə baxmağı təklif edir. Paytaxt kinoteatrlarında təkcə ənənəyə çevrilmiş Hollivud blokbasterlərinə deyil, həm də Avropa kinosunun incilərinə, habelə Azərbaycan, Türkiyə və Rusiya kinematoqrafçılarının filmlərinə baxmaq olar. Bakı kinoteatrlarında bu gün istənilən repertuarı - dünya kinematoqrafının klassiklərindən tutmuş uşaqlar üçün cizgi fimlərinədək ən müxtəlif janrda filmləri tapmaq olar.

“Dolby Surround” və “Dolby Atmos” qabaqcıl səsləndirmə sistemləri, ən müasir 3D texnologiyaları, rahat kinozallar, kinoteatrların yaxınlığında yerləşən kafe və restoranların bolluğu şəhərimizin kinoteatrlarında sizin filmlərə baxmağınızı unudulmaz edəcək!

Nizami Kino Mərkəzi

1934-cü ildə tikilmiş “Nizami” kinoteatrı ölkənin ən qədim kinoteatrlarından biridir. Dahi şair və mütəfəkkir Nizami Gəncəvinin adını daşıyan kinoteatr vaxtilə seansdan əvvəl Azərbaycan caz və estrada kollektivlərinin çıxışları ilə şöhrət qazanmışdı.

Sovet dövründə burada kinofestivallar keçirilir, yerli və xarici filmlərin premyerası olurdu. Kinoya getmək hər bir bakılının ən çox sevdiyi istirahət növü idi. O illərdə repertuar indiki kimi müxtəlif olmasa da, kinoteatra getmək bütün ailə üçün həyəcan və sevinclə dolu hadisə idi. Premyera zamanı, istirahət və bayram günlərində kassaların qarşısında böyük növbələr düzülürdü.

Azərbaycan üçün çətin olan XX əsrin 80-ci illərinin sonu, 90-cı illərin birinci yarısında bakılıların kinoya getmək həvəsi bir qədər azaldı. 90-cı illərin sonu – 2000-ci ilin əvvəllərində ölkədə yeni formatda, ən qabaqcıl proyeksiya və səs avadanlığı ilə təchiz olunmuş kinoteatrlar yaradıldı. Bu kinoteatrlarda dünya kinematoqrafının premyeraları nümayiş etdirilirdi. Tədricən şəhər əhalisi və paytaxtın qonaqları yenidən kinokassaların qarşısında görünməyə başladılar. Bu gün Nizami Kino Mərkəzində və Bakının digər kinoteatrlarında uzun illər əvvəl olduğu kimi, yenə də qələbəlikdir.

“Azərbaycan kinosunun 2008-2018-ci illər üzrə inkişafına dair Dövlət Proqramı” çərçivəsində yenidən qurulan “Nizami” kinoteatrı 2011-ci ildə qapılarını tamaşaçıların üzünə açdı. Bu gün ona kino mərkəzi statusu verilib.

Nizami Kino Mərkəzində repertuardakı cari filmlərin, o cümlədən dünya kinoprokatının ən yaxşı yeni filmlərinin 3D formatında nümayişi ilə yanaşı, yerli filmlərin premyerası da keçirilir. Binanın foyesində kinoteatrın tarixini əks etdirən fotoşəkillərdən ibarət stendlər düzülüb. Kinoteatrın birinci mərtəbəsində 50 və 80 yerlik iki, ikinci mərtəbəsində 500 nəfərlik böyük zal yerləşir. Bu zalda Cənubi Qafqazda ən böyük - eni 18 metr olan ekran quraşdırılıb. Kino mərkəzinin beşinci mərtəbəsində 24 nəfərlik VIP kinozalı yerləşir.

Kino mərkəzinin bütün zalları ən son proyeksiya və səs sistemi ilə təchiz edilib ki, bu da istənilən filmə heç nə ilə müqayisə edilməyəcək rahat şəraitdə baxmağa imkan yaradır. Kino mərkəzinin birinci mərtəbəsində ticarət köşkü, ikinci mərtəbəsində kafe, dördüncü mərtəbəsində kafe-klub və mətbuat mərkəzi, beşinci və altıncı mərtəbələrdə isə 250 yerlik restoran yerləşir. Maraqlıdır ki, restoranın tavanı ilin fəsillərinə uyğun olaraq mexaniki üsulla açılır və örtülür.

Nizami Kino Mərkəzinin veb-saytı: www.nizamicinema.az

 

“Park Cinema”

“Park Cinema” Bakı və Abşeronun müxtəlif guşələrində, habelə Masallı şəhərində yerləşən 6 kinoteatrdan ibarət, o cümlədən ilk dəfə “IMAX” formatında kinozalı olan ilk kinoteatrlar şəbəkəsidir. İnamla inkişaf edən bu şəbəkə kino sənayesinin ən müasir, innovativ texnologiyalarından, proyeksiya avadanlığı və audiosistem sahəsində ən son nailiyyətlərdən istifadə edir.

Şəbəkənin 2010-cu ildə Bakıda açılan ilk kinoteatrı paytaxtın sakinləri və qonaqları arasında dərhal populyarlıq qazandı. Buna səbəb kinoteatrın zallarının müasir təchizatı, rəngarəng repertuarı, çevik tarif cədvəli, paytaxtın məşhur “Park Bulvar” ticarət-əyləncə mərkəzində yerləşməsidir. O dövr üçün istirahət vaxtını yeni olan bu cür formatda keçirmək, yəni ticarət mərkəzinə gedərək nəinki lazım olanları almaq, həm də orada dostlarla kafedə oturmaq, attraksion zallarında oynamaq və ya dünya kinoprokatının yeni filmlərinə baxmaq bakılıların çox xoşuna gəlmişdi.

“Park Cinema” şəbəkəsində çoxdan gözlənilən “Azercell|IMAX” kinoteatrı 2014-cü ilin sonunda açılıb və bununla da kinomanları xeyli sevindirib. Başqa cür ola da bilməz, axı bu, adi zallarla yanaşı, “IMAX” formatında zalın olduğu ilk kinoteatrdır. Özü də kinoteatr paytaxtın ən görkəmli memarlıq komplekslərindən biri olan, turizm rəmzi kimi tanınan “Flame Towers” binasında yerləşir.

Kinoteatrlar şəbəkəsinin sahibi olan “Kaspian Kapital” MMC-nin tərəfdaşları “20th Century Fox”, “Universal Pictures International”, “Paramount”, “Warner Bros. Pictures”, “Central Partnership”, “karo Premyer”, “Karoprokat”, “Vest”, “Naşe kino”, “Paradiz”, “Lyuksor”, “Art Pictures”, “Top Film Distribution” və kino sənayesində liderlik edən digər xarici şirkətlər və təşkilatlardır.

Kinoteatrlar şəbəkəsində dünya kinoprokatının ən yeni filmləri nümayiş etdirilir, jurnalistlər və blogerlər üçün müntəzəm olaraq premyera nümayişləri və müxtəlif mədəni-kütləvi tədbirlər keçirilir. Hər kinoteatrda tamaşaçıları müasir interyer, rahat kafe və barlar, yüksək səviyyəli xidmət və bütün mümkün əyləncələr gözləyir.

“Park Cinema” tamaşaçıların rahatlığı üçün bir çox xidmətlər təklif edir. Bu sıraya biletlərin internet saytında bronlaşdırılması və alınması daxildir. Korporativ müştərilərə qapalı nümayişin təşkili üçün bu və ya digər zalın icarəyə götürmək imkanı yaradılır.

Kinoteatrda bonus-yığım proqramı fəaliyyət göstərir. Kartları kassadan pulsuz almaq olar.

Kinoteatrın saytı: www.parkcinema.az

 

“CinemaPlus”

“CinemaPlus” Bakı və Abşeronun müxtəlif guşələrində və Gəncə şəhərində yerləşən, 6 kinoteatrı əhatə edən innovativ və müştəriyönlü şəbəkədir.

Şəbəkənin ilk kinoteatrı paytaxtın mərkəzində yerləşən “28 Mall” ticarət-əyləncə mərkəzində açılıb. 2016-cı ildə isə “Ganjlik Mall” ticarət mərkəzində “Dolby Atmos” texnologiyalı ölkənin ən böyük kinoteatrı fəaliyyətə başlayıb. “Dolby Atmos” sayəsində səs tamaşaçıya bütün istiqamətlərdən, o cümlədən zalın yuxarı hissəsindən çatır. Nəticədə tamaşaçı ekranda baş verənləri sadəcə izləmir, sanki hadisənin mərkəzində olur. Həmin il “CinemaPlus” şəbəkəsinə vaxtilə Bakıda ilk və yeganə kinoteatr olmuş və dünya standartlarına cavab verən əfsanəvi “Azərbaycan” kinoteatrı da qatıldı.

Xəzər sahilindəki Bilgəh elit qəsəbəsində “Amburan Mall” ticarət mərkəzinin 1-ci mərtəbəsində “CinemaPlus Amburan” premium-kinoteatrı yerləşir. Kinoteatrın zalları ispan istehsalı olan yüksək keyfiyyətli rahat kreslolarla təchiz edilib. Bundan başqa, “CinemaPlus Amburan” kinoteatrında “Master Image 3D” texnologiyası tətbiq olunur.

Həmçinin Bakıxanov qəsəbəsində “Aygun City” ticarət mərkəzində “CinemaPlus” premium-klass kinoteatrı yerləşir.

“CinemaPlus” kinoteatrlarının bütün zalları 3D-kontentini nümayiş etdirmək imkanı olan rəqəmsal proyeksiya sistemi, yüksək keyfiyyətli kinoekranlar və gücləndirilmiş parlaqlığın və dəqiq təsvirin texnologiyası olan “Enhanced 4K Barco” ilə təchiz edilib. Bütün bunlar və başqa amillər kinofilmləri ən yaxşı və əla keyfiyyətdə nümayiş etdirməyə imkan yaradır. Xarici filmlərin əksəriyyəti rus dilində göstərilir, bəzi filmlər orijinal ingilis subtitrləri ilə nümayiş etdirilir.

VIP zallarına getmək tamaşaçılarda unudulmaz təəssürat yaradacaq. Bu zallar filmlərə dəbdəbəli şəraitdə, italyan kreslosunda yarımuzanıqlı vəziyyətdə baxmağa imkan verir. Burada kino nümayişi zaman yemək və içki sifariş etmək mümkündür.

“CinemaPlus” üçün biletləri müxtəlif formalarda, o cümlədən kinoteatrın rəsmi saytından, şəhərin “PayPoint” köşklərindən, smartfonlar üçün əlavələrdən, habelə kinoteatrın kassalarından əldə etmək olar.

Kinoteatrda “CineClub” bonus-yığım sistemi proqramı fəaliyyət göstərir.

Kinoteatrın veb-saytı www.cinemaplus.az

Emil Eyyubov

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.