İDMAN
“Baku Fires” klubunun 6 boksçusu beynəlxalq reytinq cədvəlinin ön sıralarında yer alıb
Bakı, 3 mart, AZƏRTAC
Dünya Boks Seriyası (WSB) boksçuların yeni fərdi reytinq cədvəlini açıqlayıb. Yeddi turdan sonra “Baku Fires” klubunun 6 üzvü reytinqdə ön sıralardadır.
AZƏRTAC xəbər verir ki, 56 kiloqram çəki dərəcəsində mübarizə aparan Məhəmməd Qurbanov 3 döyüşün hamısında qalib gələrək 1-ci yerdədir. Albert Səlimov çəkisi 60 kiloqram olan boksçular arasında rusiyalı Adlan Aburaşidov ilə birgə 1-2-ci yerləri bölüşür. Hər iki boksçu 3 qələbə qazanıb.
London Olimpiadasının iştirakçısı Heybətulla Hacəliyev (64 kq) hazırda reytinqdə 3-cü pillədədir. Milli komandamızın üzvü kubalı Yasiner Toledo və italiyalı Vinçenzo Manqiakapredən geri qalır.
Səksən bir kiloqram çəki dərəcəsində “Baku Fires” klubunda “1-ci nömrə” hesab olunan Soltan Migitinov ukraynalı Aleksandr Xiznyakla birgə 4-5-ci yerləri bölüşür. Bu çəkidə reytinqdə 1-ci yeri kubalı Xulio Sezar la Kruz Peraza tutur.
Abdulqadir Abdullayev (91 kq) bu mövsüm bütün görüşlərdə qalib gəlsə də, o hələ ki, 4-cü pillədədir. Ancaq boksçumuz ilk 3 yeri tutan idmançılardan 1 döyüş az keçirib. Superağır çəki dərəcəsində liderlərdən sayılan Arslanbek Mahmudov da 1-2-ci yerləri bölüşür. Boksçumuz kimi “Astana Arlans”ın xorvatiyalı üzvü Filip Hrqoviçin də 3 qələbəsi vardır.
WSB-nin cari mövsümündən sonra 17 idmançı planetin ən böyük yarışında iştirak etmək hüququ əldə edəcək. 49, 91 və super ağır çəki dərəcələrində bir, digər çəkilərdə isə 2 idmançı Olimpiya vəsiqəsinə sahib olacaq.