Xəbər verdiyimiz kimi, noyabrın 1-2-də Bakıda FİA GT seriyasından “Baku World Challenge” avtomobil yarışları üzrə dünya çempionatının final mərhələsi keçiriləcək. Yarışda 15 beynəlxalq komanda 30 avtomobillə mübarizə aparacaq. Eyni zamanda, “Formula-1” yarışı üzrə 10, drift üzrə isə 5 maşın nümayiş etdiriləcək.

AZƏRTAC xəbər verir ki, oktyabrın 31-də iştirakçı avtomobillərin paradı olub. Parada Dövlət Bayrağı Meydanından start verilib, Heydər Əliyev Mərkəzinin qarşısında yekun vurulub.

Yarış iştirakçılarını hərarətlə qarşılayan Bakı sakinləri onlarla xatirə şəkilləri çəkdiriblər.

Azərbaycan artıq üçüncü dəfədir ki, “World Challenge” avtomobil yarışlarına ev sahibliyi edir. Ötən il keçirilən yarışın səviyyəsi və nəticələri bizi builki tədbiri də yaxşı təşkil etməyə ruhlandırır.

Bu sözləri avtomobillərin paradından sonra Heydər Əliyev Mərkəzində təşkil olunan mətbuat konfransında “Aztexnika Ltd” MMC-nin prezidenti Mənuçöhr Əhədpur Xangah deyib.

O bildirib ki, Bakının belə mötəbər yarışlara ev sahibliyi etməsi Prezident İlham Əliyevin rəhbərliyi ilə Azərbaycanda həyata keçirilən davamlı inkişaf siyasətinin nəticəsində mümkün olub. Bu, Azərbaycanın dünyada nüfuzunu artırır. Azərbaycanda idmanın inkişafına öz töhfəsini verəcək bu yarış dünyanın diqqətini yenidən ölkəmizə yönəldəcək. Gələn il Azərbaycanda birinci Avropa Oyunlarının, 2020-ci ildə isə futbol üzrə Avropa çempionatının bir neçə oyununun keçiriləcəyini vurğulayan Mənuçöhr Əhədpur Xangah bunun beynəlxalq idman qurumlarının ölkəmizə yüksək etimadının göstəricisi olduğunu bildirib.

Azərbaycan Avtomobil Federasiyasının (AAF) baş katibi Anar Şükürov ölkəmizdə idmana göstərilən dövlət qayğısından danışıb. Bildirib ki, AAF ölkəmizdə idmanın bu növünün inkişaf etdirilməsi istiqamətində mühüm layihələr həyata keçirir. Azərbaycan 2016-cı ildə “Formula-1” üzrə Avropa Qran-pri yarışlarına ev sahibliyi edəcək. Bu ölkəmizin avtomobil idmanı sahəsində qazandığı nailiyyətlərin bir hissəsidir. Oktyabrın 11-də “V1 Challenge Azerbaijan” yarışının təqdimat şousu yüksək səviyyədə təşkil olunub.

Beynəlxalq Avtomobil Federasiyasına göstərdiyi dəstəyə görə, təşəkkürünü bildirən A.Şükürov ölkəmizdə gənc pilotların hazırlanması və təkmilləşdirilməsi istiqamətində görülən işlər barədə məlumat verib.

“SRO Motorsports Group”un prezidenti və baş icraçı direktoru Stefan Ratel və “İntl. Concept Event” şirkətinin baş icraçı direktoru Renaud Jinfils yarışa hazırlığın yüksək səviyyədə aparıldığını, ölkəmizin “Baku World Challenge” yarışlarına müvəffəqiyyətlə ev sahibliyi etdiyini və həftəsonunun Bakı sakinləri üçün əsl bayrama çevriləcəyini vurğulayıblar.

Qeyd olunub ki, avtoralli Bakıda uzunluğu 4 kilometr olan, Dövlət Bayrağı Meydanından dəniz sahili boyu xüsusi hazırlanmış yolda keçiriləcək. Mütəxəssislərin fikrincə, yolun həm geniş, həm də dar döngəli olması yarışı daha da maraqlı edəcək. Avtorallinin “Facebook”dakı rəsmi səhifəsinin 50 mindən artıq izləyicisinin olması bu yarışa göstərilən yüksək maraqdan xəbər verir.

Xatırladaq ki, ötən il təşkil olunan yarışda Belçikanın “Audi Club” komandasının pilotu Laurens Vantur “Audi R8” avtomobili ilə qalib gəlmişdi. Fransanın “Hexis Racing” komandasının pilotu Kevin Estre “McLaren” avtomobili ilə finişi ikinci, Almaniyanın “HTP Gravity Charouz” komandasının pilotu Alon Day isə üçüncü keçmişdilər.