REGİONLAR
Balakən Gömrük İdarəsi: İxrac olunan yüklər arasında fındıq, tütün və xurma üstünlük təşkil edib VİDEO
Zaqatala, 3 may, Mustafa Dadaşov, AZƏRTAC
Prezident İlham Əliyevin rəhbərliyi ilə son illər respublikamızda qeyri-neft sektorunun inkişafı, sahibkarlıq mühitinin yaxşılaşdırılması, özəl sektora dövlət dəstəyinin artırılması ilə bağlı həyata keçirilən tədbirlər, mütərəqqi islahatlar ölkə iqtisadiyyatının dinamik inkişafı üçün əsaslı stimul yaradıb. Qeyri-neft sektorunun inkişafı istiqamətində əldə edilən nailiyyətlər, ölkənin ixrac potensialının artması bu sahədə görülən işlərin məntiqi nəticəsi kimi qiymətləndirilir. Gömrük orqanları da respublikamızda həyata keçirilən iqtisadi siyasətə öz töhfəsini verməyə çalışır. “Bir pəncərə”, “Elektron bəyannamə”, “Yaşıl dəhliz” və digər yeniliklər sahibkarlıq və investisiya mühitinin yaxşılaşdırılması, şəffaflığın artırılması, ticarətin sürətli, asan və maneəsiz həyata keçirilməsi üçün atılan mühüm addımlardır.
AZƏRTAC xəbər verir ki, bu fikirlər mayın 3-də Zaqatala şəhərində sahibkarların iştirakı ilə keçirilən “Azərbaycan Respublikasında ixracın stimullaşdırılması” mövzusunda tədbirdə səsləndirilib.
Dövlət Gömrük Komitəsi Balakən Gömrük İdarəsinin təşkilatçılığı ilə keçirilən tədbirdə Zaqatala, Balakən və Qax rayonlarından olan iş adamları, sahibkarlar iştirak ediblər.
Tədbirdə Balakən Gömrük İdarəsinin rəisi Vüqar Qismətov çıxış edərək, ölkəmizdə həyata keçirilən gömrük siyasətindən danışıb. Bildirilib ki, Azərbaycanın iqtisadi inkişafı, onun suverenliyinin təmin edilməsi digər sahələrlə yanaşı, ölkənin gömrük siyasəti ilə də bilavasitə bağlıdır. Son dövrlər Azərbaycanda uğurlu gömrük siyasətinin davamlılığı təmin edilib, gömrük işinin təkmilləşdirilməsi, gömrük orqanlarının maddi-texniki və normativ-hüquqi bazasının möhkəmləndirilməsi, dünya gömrük sisteminə inteqrasiyası istiqamətində bir sıra addımlar atılıb. Azərbaycan iqtisadiyyatında əldə edilən uğurların əsas səbəblərindən biri də ölkəmizdə sahibkarlıq fəaliyyətinə göstərilən dövlət dəstəyi, sahibkarlıq subyektlərinin inkişafı məqsədilə atılan mühüm addımlardır.
Diqqətə çatdırılıb ki, ötən il “Gömrük xidməti ilə biznes subyektlərinin nümayəndələrindən ibarət İctimai Şura haqqında Əsasnamə” təsdiq edilib. Bu Şuranın əsas məqsədi xarici iqtisadi fəaliyyət iştirakçıları və gömrük orqanları arasında yaranan problemlərin aradan qaldırılması, iş adamları və biznes strukturları arasında gömrük işi sahəsində hüquq mədəniyyətinin səviyyəsinin artırılmasıdır.
Tədbirdə Zaqatala Rayon İcra Hakimiyyəti başçısının müavini İlkin Şəfizadə çıxış edərək, rayonda ənənəvi sahələrin inkişaf etdirilməsi, ixracyönümlü məhsulların istehsalının artırılması istiqamətində həyata keçirilən tədbirlər barədə məlumat verib.
Balakən Gömrük İdarəsi Fəaliyyətin Qiymətləndirilməsi Bölməsinin rəisi Fərhad Bəhramov çıxışında son iki ildə idarə tərəfindən həyata keçirilən ixrac əməliyyatları barədə məlumat verib. Bildirilib ki, 2016-cı ildə Balakən Gömrük İdarəsi tərəfindən sahibkarlıq subyektləri ilə bağlı 794 ədəd ixrac gömrük bəyannaməsi qeydə alınıb. Bu bəyannamələr üzrə yük dövriyyəsinin ümumi həcmi 17 milyon 35 min 558 kiloqram, dəyəri isə 96 milyon 954 min 227 ABŞ dolları təşkil edib. 2015-ci illə müqayisədə ötən il ixrac gömrük bəyannamələrinin sayı 254 ədəd çox olub. Eyni zamanda, yük dövriyyəsinin həcmi 5 milyon 665 min 885 kiloqram, dəyəri isə 23 milyon 343 min 266 ABŞ dolları artıb. Bu o deməkdir ki, 2016-cı ildə Balakən Gömrük İdarəsi tərəfindən ölkəyə 23 milyon ABŞ dollarından çox əlavə vəsait daxil olub. İxrac olunan yüklərin əsasını fındıq, tütün, xurma və digər kənd təsərrüfatı məhsulları təşkil edib.
Görüşdə Azərbaycan Fındıq İstehsalçıları Assosiasiyasının sədri İsmayıl Orucov, sahibkar Abduləziz Əhmədov və başqaları çıxış edərək, gömrük orqanlarının nümayəndələri ilə keçirilən belə görüşlərin sahibkarların maarifləndirilməsi baxımından əhəmiyyətini xüsusi vurğulayıblar.
Sonda sahibkarların gömrük qanunvericiliyi ilə bağlı sualları cavablandırılıb.