REGİONLAR
Balakəndə keçirilən seminarda narkomaniyaya qarşı mübarizə tədbirlərindən bəhs olunub
Balakən, 30 iyul, AZƏRTAC
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının işçi qrupunun və Balakən rayon komissiyasının birgə təşkilatçılığı ilə iyulun 30-da Balakən şəhərindəki Heydər Əliyev Mərkəzində narkotik vasitələrin, psixotrop maddələrin və onların prekursorlarının qanunsuz dövriyyəsi və onlardan sui-istifadə ilə mübarizənin gücləndirilməsi ilə əlaqədar seminar-diskussiya keçirilib.
Tədbirdə işçi qrupunun üzvləri Raqif Allahverdiyev və Şahin İsmayılov, həmçinin rayonun aidiyyəti dövlət qurumlarının nümayəndələri iştirak ediblər.
AZƏRTAC xəbər verir ki, seminarı Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə rayon komissiyasının sədri Azad Balayev açaraq, Balakəndə narkomaniyaya qarşı görülən işlər və mövcud vəziyyət barədə məlumat verib.
İşçi qrupunun üzvü Raqif Allahverdiyev bildirib ki, narkomaniyanın getdikcə genişlənərək cəmiyyətin və dövlətin qarşısında duran vacib problemlərdən birinə çevrilməsi, gənclər arasında narkomanların sayının sürətlə artması, narkomaniya ilə əlaqədar cinayətlərin sayının çoxalması əksər dövlətlərdə olduğu kimi, ölkəmizdə də ciddi narahatlıq doğurur. Hazırda respublikamızda gənclərin sağlamlığının müdafiəsi üzrə işlər müvəffəqiyyətlə davam etdirilir, sağlam həyat tərzinin təbliği, gənclərin sağlam ruhda tərbiyə olunması, onların siqaret, alkoqol, narkomaniya və sair bu kimi zərərli vərdişlərdən uzaqlaşdırılması, asudə vaxtlarında idman-sağlamlıq və yaradıcılıq fəaliyyətinin genişləndirilməsi ilə bağlı maarifləndirmə və profilaktiki tədbirlər həyata keçirilir.
Diqqətə çatdırılıb ki, cəmiyyətimizdə narkomaniyaya düçar olan gənc və yeniyetmələrin vaxtında aşkar edilməsi və bu sahədə asılılığın aradan qaldırılması məqsədi ilə davamlı olaraq tibbi-profilaktik, eləcə də maarifləndirici tədbirlər həyata keçirilməlidir. Qeyd olunub ki, şagirdlərə sağlam həyat tərzinin aşılanmasında, onlar arasında zərərli vərdişlərə, xüsusilə narkotikaya qarşı meylin qarşısının alınmasında ümumtəhsil məktəblərinin pedaqoji kollektivləri qarşısında da mühüm vəzifələr durur.
Tədbirdə rayon gənclər və idman idarəsinin rəisi Rasim Paçalov, Mərkəzi Rayon Xəstəxanasının baş həkimi Hacıömər Nuriyev, rayonun imamı Elşən Poladov, rayon prokurorluğunun müstəntiqi Tale Səfərov çıxış edərək, mövzu ilə bağlı fikirlərini bildiriblər.
Sonda işçi qrupunun üzvləri seminar iştirakçılarının suallarını cavablandırıblar.