MƏDƏNİYYƏT


“Banu” kolleksiyasından olan yaylıq ictimaiyyətə təqdim edilib

Bakı, 3 iyun, AZƏRTAC

“Qarabağ”, "Xarı bülbül”, "Qarabağ xalçası”, “Qarabağ kilimi”, “Qobustan”, “Azərbaycan narı” qalstuklarının və yaylıqlarının yaradıcısı, İtaliyanın Andrew’s Ties ticarət markasının Azərbaycandakı rəsmi təmsilçisi Yavər Məmmədov növbəti dəfə özünün möhtəşəm layihəsini – “Banu” kolleksiyasından olan yaylığı ictimaiyyətə təqdim edib.

Yavər Məmmədov AZƏRTAC-a bildirib ki, “Banu” kolleksiyasından olan bu yaylıq XIX əsr Azərbaycan xalqının görkəmli şairi, rəssamı, ictimai xadimi, xeyriyyəçisi, Qarabağ xanı Mehdiqulu xan Cavanşirin qızı, "Xan qızı” ədəbi təxəllüsü ilə tanınan Qarabağın şahzadəsi Xurşidbanu Natəvanın xatirəsinə ithaf olunub.

Yaylıq Qarabağla bağlı 8 tarixi hadisəni təmsil edən illüstrasiyadan, Qarabağı simvolizə edən elementlərin əks olunduğu 4 səkkizguşəli medalyondan, məşhur Qarabağ xalçalarından birini, eləcə də Azərbaycan xanımını simvolizə edən qadın şəklinin əks edildiyi mərkəzi rəsmdən ibarətdir. Yaylığın perimetrində Qarabağın ermənilər tərəfindən işğal olunmuş ərazilərinin adları və bölgəyə məxsus kilim elementləri əks edilib.

Yaylıq 90 santımetr ölçüdə olmaqla kvadrat formadadır, İtaliyada yüksək keyfiyyətli ipəkdən istehsal edilib. Yaylığın nəfis tərtibatlı qutusu və yaylıq üzərində olan bütün elementlərin ətraflı izahı verilmiş kitabçası vardır.

“Banu” kolleksiyası artıq Andrew’s Ties ticarət markasının Səməd Vurğun küçəsi 56-da yerləşən butikində satışa çıxarılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.