CƏMİYYƏT


Baytarlıq laboratoriyası rəhbərlərinin forumu keçirilib

Bakı, 19 iyul, AZƏRTAC

Kənd Təsərrüfatı Nazirliyi yanında Dövlət Baytarlıq Nəzarəti Xidmətinin (DBNX) inzibati binasında baytarlıq laboratoriyası rəhbərlərinin forumu keçirilib.

DBNX-nin mətbuat xidmətindən AZƏRTAC-a bildiriblər ki, forumu Dövlət Baytarlıq Nəzarəti Xidmətinin rəisi vəzifəsini icra edən Azər Süleymanov açıb. Bildirib ki, tədbir 2016-cı il və 2017-ci ilin altı ayı ərzində görülmüş işlərin yekununa və qarşıda duran vəzifələrin müzakirəsinə həsr olunub.

ABŞ-ın Təhlükənin Azaldılması üzrə Müdafiə Agentliyinin (DİTRA) dəstəyi ilə laboratoriyalarda xeyli iş görüldüyünü qeyd edən A.Süleymanov Azərbaycan Respublikasında laboratoriyaların inkişaf etdirilməsi, onların maddi-texniki bazasının möhkəmləndirilməsi, mütəxəssislərin hazırlanması, laboratoriyalarda standart əməliyyat prosedurlarının həyata keçirilməsi, biotəhlükəsizlik, biomühafizə üzrə təlimlərin təşkili, ümumiyyətlə, laboratoriya sisteminin tamamilə yenidən qurulması və mütəxəssis hazırlanması istiqamətində bir çox tədbirlərin görüldüyünü deyib. Diqqətə çatdırıb ki, görülmüş işlər nəticəsində Kənd Təsərrüfatı Nazirliyinin 12 zona baytarlıq laboratoriyasından beşi İkinci Bioloji Təhlükəsizlik Səviyyəsində (BTS-2) tamamilə yenidən qurulub, müasir laboratoriya avadanlıqları ilə təmin edilib. Həmçinin Respublika Baytarlıq Laboratoriyasının virusologiya şöbəsi DİTRA-nın həyata keçirdiyi proqram çərçivəsində həm avadanlıqlarla təmin edilib, həm də mütəxəssislərin hazırlanması işləri həyata keçirilib.

Son illər ərzində görülən işlərdən biri də mərkəzi referens laboratoriyasının, yəni Üçüncü Bioloji Təhlükəsizlik Səviyyəsində (BTS-3) laboratoriyanın qurulması işlərinin aparıldığını deyən A.Süleymanov bildirib ki, bu işlər həm Səhiyyə Nazirliyinin, həm də Amerika hökumətinin dəstəyi ilə həyata keçirilir. Hazırda BTS-3 səviyyəli laboratoriyanın mütəxəssislərinə təlimlərin keçirilməsi, avadanlıqların karbürasiyası və digər işlər aparılır. Bu ilin sonunadək BTS-3 səviyyəli laboratoriyanın tikintisinin və tamamlama işlərinin başa çatdırılması və fəaliyyətə başlaması nəzərdə tutulur.

Azər Süleymanov, həmçinin qeyd edib ki, son dövrlərdə Azərbaycan Respublikasında hər bir sahədə olduğu kimi, kənd təsərrüfatı üzrə də bir çox nailiyyətlər əldə olunub və tədbirlər həyata keçirilib. Görülmüş işlərdən biri də “Baytarlıq şəhərciyi”nin salınmasıdır. “Baytarlıq şəhərciyi”ndə üç inzibati və köməkçi binalar tikilib, isitmə-soyutma və havalandırma sistemləri, yeməkxana və s. quraşdırılıb.

“Baytarlıq şəhərci”yində olan Dövlət Baytarlıq Nəzarəti Xidmətinin və Respublika Baytarlıq Laboratoriyasının inzibatı binaları tamamilə yenidən qurularaq istifadəyə verilib. Respublika Baytarlıq Laboratoriyası müasir avadanlıqlarla təmin olunub və BTS-2 səviyyəsində bütün lazımi şərait yaradılıb. Həmçinin heyvan xəstəlikləri və qida təhlükəsizliyi ilə əlaqədar şöbələr yaradılıb, həmin şöbələr lazımi laboratoriya avadanlıqları ilə təmin edilib. Baytarlıq Elmi-Tədqiqat İnstitutunun binası isə yenidən tikilib və müasir iş şəraiti yaradılıb.

A.Süleymanov respublikanın bütün rayonlarında baytarlıq idarələri və diaqnostik kabinetlər üçün binaların tikildiyini və bu binalarda yerləşən diaqnostik kabinetlərin müasir laboratoriya avadanlıqları ilə təmin olunduğunu bildirib. Həmçinin qeyd edib ki, baytarlıq idarələrində də müasir iş şəraiti yaradılıb. Bundan başqa respublikada mövcud olan 111 baytarlıq-sanitariya ekspertiza laboratoriyasının hamısı 27 adda laboratoriya avadanlıqları ilə təmin olunub.

Diqqətə çatdırılıb ki, hazırda 7 zona baytarlıq laboratoriyasının tikintisi gedir və bu ilin sonuna kimi həmin laboratoriyalardan 6-nın tikintisinin başa çatdırılması və avadanlıqlarla təmin edilməsi nəzərdə tutulub. Beyləqan zona Baytarlıq Laboratoriyasının isə 2018-ci ildə tikinti-quraşdırma işlərinin aparılması və avadanlıqlarla təmin edilməsi planlaşdırılır.

A.Süleymanov baytarlıq xidmətinin maddi-texniki bazasının gücləndirilməsi istiqamətində dövlətimiz tərəfindən bütün tədbirlərin həyata keçirildiyini və bunun nəticəsi olaraq son illər respublikada epizootik vəziyyətin sabit olmasını qeyd edərək bildirib ki, əvvəlki illərdə regiondakı qonşu ölkələrdə dabaq, nodulyar dermatit, “quş qripi” və digər xəstəliklər baş verdiyi halda, respublikamızda bu xəstəliklər qeydə alınmayıb. Bu isə ölkəmizdə aparılan qoruyucu kompleks baytarlıq-sanitariya, profilaktik tədbirlər nəticəsində mümkün olub və Azərbaycanda epizootik vəziyyət sabit qalıb.

Laboratoriya direktorlarının forumunun ildə bir dəfə keçirildiyini vurğulayan A.Süleymanov qeyd edib ki, bu tədbirdə 5 zona baytarlıq laboratoriyasının hər biri gördükləri işlər haqqında qısaca da olsa hesabat verirlər. Bu ənənəni davam etdirdiklərini bildirən A.Süleymanov vurğulayıb ki, bu il əlavə olaraq digər zona baytarlıq laboratoriyalarının direktorları da foruma dəvət olunublar. Bu ona görə edilib ki, ilin sonuna kimi həmin laboratoriyalar da BTS-2 səviyyəsində yenidən qurulacaq, laboratoriya avadanlıqları ilə təmin ediləcək.

Forumda Respublika Baytarlıq Laboratoriyasının direktoru F.Quliyev, Bərdə zona Baytarlıq Laboratoriyasının direktoru Ə.Yahyayev, Göygöl zona Baytarlıq Laboratoriyasının direktoru M.Ələkbərova, Quba zona Baytarlıq Laboratoriyasının direktoru Ə.Məmmədov, Qax zona Baytarlıq Laboratoriyasının direktoru N.İmanov, Sabirabad zona Baytarlıq Laboratoriyasının direktor əvəzi R.Mirzəxanov çıxış edərək, 2016-cı il və 2017-ci ilin altı ayı ərzində görülən işlərdən danışaraq hesabat veriblər.

ABŞ-ın DİTRA-nın Bakı ofisinin rəhbəri Aleksandr Şiller 5 zona baytarlıq laboratoriyasının yenidən qurulmasından, laboratoriyaların müasir avadanlıqlarla təmin edilməsindən, Amerika hökumətinin dəstəyindən danışıb, laboratoriyalarda işlərin standartlara uyğun aparılmasını qeyd edib.

Baytarlıq laboratoriyalarında menitorluğu həyata keçirən “Blak and Viç” şirkətinin Azərbaycan nümayəndəliyinin rəhbəri Vladimir Bondar 5 zona baytarlıq laboratoriyasında təhlükəsizlik sistemində nəzarət və mövcud çatışmazlıqlarla tanış olduqlarını və tezliklə yeni sistem quraraq problemin aradan qaldırılacağını bildirib.

Forumun sonunda Dövlət Baytarlıq Nəzarəti Xidmətinin rəisi vəzifəsini icra edən Azər Süleymanov DİTRA təşkilatının və “Blak and Viç” şirkətinin rəhbərliyinə təşəkkür edərək, laboratoriya direktorlarına lazımi tapşırıq və tövsiyələrini verib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.