MƏDƏNİYYƏT


Bərdə rayonunda mədəniyyət müəssisələrinin fəaliyyəti günün tələbləri səviyyəsində qurulub

A+ A

Bakı, 30 noyabr, AZƏRTAC

Mədəniyyət və turizm naziri Əbülfəs Qarayev noyabrın 30-da Bərdədə vətəndaşlarla görüşdən sonra rayondakı bir sıra mədəniyyət müəssisələrinin fəaliyyəti ilə tanış olub. Nazirlə bərabər ölkəmizdə səfərdə olan TÜRKSOY-un baş katibi Düsen Kaseinov da mədəniyyət ocaqlarına baş çəkib.

Nazirlikdən AZƏRTAC-a bildirilib ki, ilk olaraq Bərdə Dövlət Rəsm Qalereyasına gələn nazirə qalereyanın fəaliyyəti və fondda saxlanılan əsərlər haqqında məlumat verilib.

Nazir sonra rayon tarix-diyarşünaslıq muzeyində olub. Burada məlumat verilib ki, Azərbaycanın ən qədim yaşayış məskənlərindən və ilkin şəhər mədəniyyətinin formalaşdığı məkanlardan olan Bərdə eramızdan əvvəl II minillikdən son orta əsrlərə qədər geniş bir dövrü əhatə edən çoxlu maddi mədəniyyət abidələri ilə zəngindir. Bildirilib ki, 1982-ci ildən fəaliyyət göstərən muzeyin binası 2006-2008-ci illərdə əsaslı təmir edilib və 2009-cu il martın 2-də Prezident İlham Əliyevin iştirakı ilə istifadəyə verilib. Muzeydə Bərdənin tarixini, mədəniyyətini, etnoqrafiyasını, məişətini, adət-ənənəsini əks etdirən 2300 eksponat, o cümlədən qədim şəhərin maketi nümayiş etdirilir. Eksponatların bir çoxu rayonda aparılmış arxeoloji qazıntılar zamanı tapılıb.

Əbülfəs Qarayev daha sonra Bərdə şəhərindəki 1 və 4 nömrəli Uşaq incəsənət məktəblərinə baş çəkərək təhsil ocaqlarında yaradılan şərait, dərs vəsaitləri ilə təminat, tədrisin keyfiyyəti ilə maraqlanıb.

Nazir rayon mədəniyyət mərkəzinin fəaliyyəti ilə də tanış olub. Mərkəzin “Qarabağ” ansamblı qonaqların qarşısında “Qarabağ şikəstəsi”ni və “Sarı gəlin” mahnısını ifa edib.

Qonaqlar, həmçinin Bərdə türbəsi ilə tanış olublar. Məlumat verilib ki, orta əsr Azərbaycan memarlığının ən qiymətli abidələrindən biri də 1322-ci ildə inşa edilmiş Bərdə türbəsidir. Abidə dövrün görkəmli şəxsiyyətlərinin xatirəsini əbədiləşdirmək üçün tikilən bürcvarı türbələr qrupuna daxildir, yeraltı və yerüstü hissədən ibarətdir.

Nazir mədəniyyət müəssisələrinin fəaliyyətinin daha da yaxşılaşdırılması üçün tapşırıq və tövsiyələr verib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.