Bərdə, 29 avqust (AZƏRTAC). Bərdə rayonunun Alpout kəndində Azərbaycan Hökuməti və Dünya Bankının birgə maliyyələşdirdikləri İkinci Azərbaycan Kənd İnvestisiya Layihəsi tərəfindən həyata keçirilən "Yem sexinin tikintisi" layihəsinin açılışı olub.

AZƏRTAC xəbər verir ki, Dünya Bankının əməkdaşlarının, ictimaiyyətin nümayəndələrinin və kənd sakinlərinin iştirakı ilə keçirilən mərasimdə çıxış edən rayon icra hakimiyyəti başçısının birinci müavini Vahid Qarayev Bərdədə aqrar sektorun dinamik inkişafı ilə bağlı həyata keçirilən ardıcıl tədbirlərdən danışıb.

Kənd İnvestisiya Layihəsinin direktor müavini Gülbəniz Qənbərova, layihənin şimal-qərb zonası üzrə proqram mütəxəssisi Xudayar Gülmalıyev çıxışlarında layihə çərçivəsində görülən işlər barədə məlumat veriblər. Bildirilib ki, əhalisi əsasən heyvandarlıqla məşğul olan Alpoud kəndində keyfiyyətli yem istehsal edən sexə ehtiyac vardı. Layihə çərçivəsində yem sexi üçün bina və talvar tikilib, bir tonluq su çəni quraşdırılıb. Layihənin icrası nəticəsində Alpoud və ətraf kəndlərin sakinləri daha ucuz qiymətə yem məhsulları əldə edə biləcəklər.

Sakinlər kənddə heyvandarlığın inkişafına təkan olacaq layihələrin icrasına və kənd adamlarına qayğısına görə Azərbaycan Hökumətinə, Kənd İnvestisiya Layihəsinə və Dünya Bankına minnətdarlıqlarını bildiriblər.

Açılışı bildirən rəmzi qırmızı lent kəsildikdən sonra mərasim iştirakçıları yem sexində istehsal prosesi ilə tanış olublar.