ELM VƏ TƏHSİL
Beynəlxalq konfransda informasiya-kommunikasiya texnologiyalarının müasir vəziyyəti müzakirə olunub
Oktyabrın 27-də Azərbaycan Texniki Universitetində (AzTU) bu ali məktəbin Rabitə və Yüksək Texnologiyalar Nazirliyi ilə birgə təşkil etdiyi “İnformasiya-kommunikasiya texnologiyalarının müasir vəziyyəti və inkişafı perspektivləri” mövzusunda beynəlxalq elmi-texniki konfrans öz işinə başlayıb.
AZƏRTAC xəbər verir ki, əvvəlcə konfrans iştirakçıları ümummilli lider Heydər Əliyevin universitetin foyesindəki büstünün önünə gül dəstələri düzüblər.
Konfransın plenar iclasında AzTU-nun rektoru, professor Havar Məmmədov tədbirin əhəmiyyətindən, aktual mövzuya həsr olunmasından danışıb. XXI əsrin yüksək texnologiyalar əsri olduğunu söyləyən rektor dünyada baş verən qloballaşma prosesində informasiya-kommunikasiya texnologiyalarının (İKT) mühüm rolunu qeyd edib. Prezident İlham Əliyevin ölkədə İKT-nin inkişafına göstərdiyi diqqəti xüsusi vurğulayan rektor deyib ki, bu gün elə sahə yoxdur orada İKT tətbiq edilməsin.
AzTU-nun yüksək texnologiyalarla təchizatından danışan rektor universitetdə İKT-dən geniş istifadə edildiyini, burada daxili informasiya şəbəkəsinin fəaliyyət göstərdiyini bildirib. H.Məmmədov İKT sahəsində Cənubi Koreya mütəxəssisləri ilə əməkdaşlığın və birgə layihələrin əhəmiyyətini qeyd edib, universitetdə informasiya texnologiyaları üzrə yüksək ixtisaslı kadrların hazırlandığını diqqətə çatdırıb.
Rektor iki gün davam edəcək tədbirdə vacib mövzularda məruzələrin dinləniləcəyini, konfransın öz məqsədlərinə nail olacağına əminliyini bildirib, iştirakçılarına uğurlar arzulayıb.
İclasda Azərbaycan Milli Elmlər Akademiyası (AMEA) İdarəetmə Sistemləri İnstitutunun direktoru, akademik Telman Əliyevin “İdarəetmə Sistemləri Elmi-Tədqiqat İnstitutunun aktual layihələri” mövzusunda məruzəsi dinlənilib. T.Əliyev rəhbərlik etdiyi elm müəssisəsinin son illərdəki fəaliyyətindən, həyata keçirdiyi layihələrdən, əldə olunan nailiyyətlərdən və Azərbaycan alimlərinin uğurlarından danışıb. Ölkəmizə ilk hesablama maşınlarının gətirilməsində və İKT-nin inkişafında ulu öndər Heydər Əliyevin əvəzsiz rolu xüsusi vurğulanıb.
Daha sonra rabitə və yüksək texnologiyalar nazirinin birinci müavini İltimas Məmmədov “Azərbaycan Respublikasında informasiya cəmiyyətinin inkişafı haqqında” mövzusunda məruzəsində təmsil etdiyi qurumun fəaliyyətindən danışıb. Bildirilib ki, 2014-cü ildə nazirlik yenidən qurulub, onun strategiyası və əsasnaməsi təsdiq olunub. İKT sektorunun dünyada dinamik inkişaf edən sahə olduğunu diqqətə çatdıran nazir müavini bu sektorun Azərbaycanda da xüsusi diqqət mərkəzində olduğunu, son illər bu sahəyə böyük məbləğdə sərmayə qoyulduğunu bildirib.
Ölkəmizdə rəqəmsal yayımın tətbiqindən söz açan nazir müavini hazırda Azərbaycan ərazisinin 98 faizinin rəqəmsal yayımla əhatə olunduğunu bildirib. Daha sonra İ.Məmmədov nazirliyin həyata keçirdiyi müxtəlif layihələr və onların əhəmiyyətindən ətraflı danışıb, Rabitə və Yüksək Texnologiyalar Nazirliyinin AzTU ilə səmərəli əməkdaşlığının bundan sonra da davam etdiriləcəyini vurğulayıb.
Daha sonra konfrans işini altı bölmədə davam etdirib. Bölmə iclaslarında yerli və xarici alimlərin, mütəxəssislərin mövzuya dair məruzələri dinlənilərək müzakirə olunub.
Konfrans işini oktyabrın 28-də bölmə iclasları ilə davam etdirəcək.