İQTİSADİYYAT
Beynəlxalq konfransın iştirakçıları Sumqayıtdakı sənaye parkları ilə tanış olublar
Sumqayıt, 27 noyabr, Ətrabə Rzayeva, AZƏRTAC
Bakıda keçirilən Beynəlxalq sənaye konfransının iştirakçıları noyabrın 27-də Cənubi Qafqazın nadir istehsalat kompleksində - Sumqayıt Texnologiyalar Parkında (STP) olublar.
2009-cu ildə fəaliyyətə başlayan STP bu gün Azərbaycanın qeyri-neft sektorunda özünün layiqincə yerini tutan müəssisələrdən biridir. Hazırda parkın ümumi sahəsi 250 hektardır. Tərkibində 17 zavodu birləşdirən nəhəng texnoparkın 4500 nəfərdən artıq işçisi vardır.
AZƏRTAC xəbər verir ki, qonaqlar onlar üçün ayrılmış xüsusi avtobusla STP-nin zavodlarını gəzib, fəaliyyəti ilə yaxından tanış olublar. Bildirilib ki, Azərbaycanda qeyri-neft sahəsinin inkişafını strateji vəzifə elan edən Azərbaycan Prezidenti İlham Əliyev ölkədə texnoparkların yaradılması təşəbbüsü ilə çıxış edib. Texnoparklar kiçik və orta sahibkarlığın stimullaşdırılmasını nəzərdə tutan regional innovasiya zonasının formalaşdırılması layihəsi çərçivəsində inşa edilir. Parka daxil olan hər bir zavod aparıcı dünya istehsalçılarının ən müasir texnoloji avadanlığı ilə təchiz edilib.
Tanışlıq zamanı məlumat verilib ki, gələcəkdə STP ixrac təyinatlı məhsul istehsalı ilə məşğul olan 30 müəssisəni əhatə edəcəkdir. Yeni zavodlar istifadəyə veriləndən sonra işçilərin sayı artaraq 10 min nəfərdən çox olacaqdır. STP-də buraxılan məhsulun dünya standartlarına uyğunluq sertifikatı vardır. STP-nin məhsulu iki beynəlxalq ISO standartına sahib olduqdan sonra dünya bazarlarına çıxıb.
Qonaqlar ümumi sahəsi 2,8 hektar olan polimer məhsulu istehsal edən zavodun işi ilə də tanış olublar. Bildirilib ki, hazırda burada 400 nəfər işləyir. Sumqayıt Texnologiyalar Parkının ilk müəssisələri sırasında işə salınan zavodda əvvəlcə cəmi beş xətt fəaliyyət göstərirdi. Zavod genişləndirildikdən sonra onların sayı 25-ə çatdırılıb və hər biri saatda 1300 kiloqram polietilen boru emal edir. Müəssisədə idarəetmə tamamilə avtomatlaşdırılıb. Mütəxəssislər bildiriblər ki, bu, istehsal olunan məhsulun - müasir tələblərə cavab verən alüminium örtüklü çoxtəbəqəli polietilen və polipropilen boruların keyfiyyətinə zəmanət verir. Zavod hər gün 50 il müddətə zəmanət verilən, yüksək təzyiqə davamlı olan və korroziyaya uğramayan 396 ton polietilen boru istehsal etmək iqtidarındadır.
Qonaqlar, həmçinin kabel zavodunda, isti sinkləmə, habelə yüksəkvoltlu elektrik avadanlığı, günəş kollektorları istehsalı, ağır maşınqayırma, metal konstruksiyalar və vaqonların istehsalı zavodlarında olublar. Tanışlıq zamanı bildirilib ki, parkın bütün müəssisələri yüksək texnologiyalarla təchiz edilib. Burada Fransa, Almaniya, Yaponiya, İsveç və s. ölkələrin tanınmış istehsalçılarının avadanlığı yerləşdirilib. Qonaqlar burada istifadə olunan texnologiyaların çoxunun təkcə Azərbaycan üçün deyil, həm də bütün region üçün yenilik olması barədə məlumatı böyük maraqla qarşılayıblar və STP-dən zəngin təəssüratla ayrılıblar.
Sonra konfrans iştirakçıları Sumqayıt Kimya Sənaye Parkında (SKSP) olublar. Parkın direktor müavini Zaur Məmmədov müəssisənin təqdimatını keçirib. Bildirilib ki, parkın yaradılmasından məqsəd ölkədə innovativ və yüksək texnologiyalar əsasında rəqabətqabiliyyətli sənaye istehsalının inkişafı üçün münbit şərait yaratmaq, bu sahədə sahibkarlığı dəstəkləmək, qeyri-neft sektorunun davamlı inkişafını təmin etmək, əhalinin istehsal sahəsində məşğulluğunu artırmaqdır.
Qonaqlara parkın strukturu və fəaliyyəti barədə ətraflı məlumat verilib. Diqqətə çatdırılıb ki, Sumqayıt Kimya Sənaye Parkının rezidenti “Azertexnolayn” MMC-nin polad boru zavodu burada fəaliyyət göstərir. Eyni zamanda, daha iki zavodun inşasına başlanılıb. SKSP-nin digər rezidenti olan “SOCAR Polymer” MMC tərəfindən istehsal məqsədilə bütün avadanlıqların gətirilməsi başa çatdırılıb. Müəssisənin istehsal prosesinə 2016-cı ildə başlanılması planlaşdırılır. Yaxın vaxtlarda Sumqayıt Kimya Sənaye Parkının sosial zonasında yerləşəcək 16 mərtəbəli inzibati binanın, Peşə Tədris Mərkəzinin və 3 emalatxananın tikintisinə başlanılacaqdır.