Biləsuvar, 18 aprel, Mahir Babayev, AZƏRTAC

Bu ilin birinci rübündə Biləsuvarda iqtisadiyyatın bütün sahələrində uğurlar qazanılıb, sənaye və kənd təsərrüfatının inkişafı davam edib. Hesabat dövründə rayonda ümumi məhsul buraxılışının həcmi 40,1 milyon manat olub. Ümumi məhsul buraxılışında kənd təsərrüfatının 8,1, sənayenin 7,6, ticarətin 21,2, tikintinin 2,3, nəqliyyat və rabitənin isə 0,9 milyon manata payı olub. Üç ayda əsas kapitala yönələn investisiyalar 2,9 milyon manat, pərakəndə əmtəə dövriyyəsi isə 64,4 milyon manat təşkil edib. Adambaşına düşən ümumi məhsul buraxılışının həcmi 397 manat, orta aylıq əməkhaqqı isə 271 manat olub. Əhalinin gəlirləri 65 milyon manat, adambaşına düşən gəlirlərin həcmi isə 961 manat təşkil edib.

AZƏRTAC xəbər verir ki, bu faktları 2017-ci ilin birinci rübünün yekunlarına və qarşıda duran vəzifələrə həsr olunan hesabat yığıncağında Biləsuvar Rayon İcra Hakimiyyətinin başçısı Mahir Quliyev səsləndirib.

Bildirilib ki, rayonda tikinti, abadlıq-quruculuq sahələrində aparılan işlər cari ilin birinci rübündə də davam etdirilib. Prezident İlham Əliyevin Sərəncamı ilə ayrılan vəsait hesabına şəhər ərazisindəki aztəminatlı ailələrin yaşadığı 25 çoxmənzilli binada təmir işləri aparılıb və artıq işlər yekunlaşmaq üzrədir. Bununla yanaşı, 9 çoxmənzilli yaşayış binasında təmir işləri aparılması üçün 725 min manat vəsait ayrılıb və rüb ərzində 150 min manatlıq iş görülüb. Burada 105 nəfər işlə təmin olunub. Həmçinin Ələt-Astara magistral avtomobil yolunda 110 min manatlıq təmir işi aparılıb.

Ötən dövrdə rayonda əhalinin elektrik enerjisi və təbii qazla təmin edilməsi məqsədilə şəhər mərkəzində və kəndlərdə 3,2 kilometr elektrik naqili və 131 elektrik dirəyi yenisi ilə əvəzlənib, 335 metr sip kabel çəkilib, müxtəlif kilovatlıq elektrik transformatları təmir olunub, bütün yaşayış məntəqələri 100 faiz təbii qazla təmin olunub.

Yığıncaqda aqrar sahənin kompleks inkişafından danışılaraq qeyd edilib ki, Biləsuvar kənd təsərrüfatı rayonu olduğu üçün iqtisadiyyatın əsasını da bu sahədən gələn gəlirlər təşkil edir. Vurğulanıb ki, Azərbaycan Prezidentinin ölkəmizdə pambıqçılığın inkişafına göstərdiyi diqqət və qayğıdan bəhrələnən mülkiyyətçilər 2017-ci ildə 11 min hektar sahədə pambıq əkini aparmağı qarşılarına məqsəd qoyublar. Ötən dövrdə pambıq emalı müəssisələri ilə bağlanmış müqavilələr nəticəsində sahələrdə keyfiyyətli şum aparılıb, digər aqrotexniki tədbirlər görülüb, sahələr pambıq əkini üçün tam hazır vəziyyətə gətirilib. Artıq bir çox sahədə pambıq əkininə başlanılıb. Hesabat gününədək rayon üzrə 4038 hektar sahədə yüksək reproduksiyalı çiyid səpini həyata keçirilib. Pambıq əkini sürətlə davam edir. Pambıqçılar bu il 27 min tondan çox pambıq istehsal etməyi qarşılarına məqsəd qoyublar. Bu isə öz növbəsində 22 min iş yeri, 10 milyon manata yaxın gəlir, 3 milyon manat subsidiya deməkdir.

Məlumat verilib ki, rayonda pambıqçılığın inkişafı ilə yanaşı, kənd təsərrüfatının digər sahələri də diqqət mərkəzində olub və hesabat dövründə bu sahələrdə də müvafiq tədbirlər həyata keçirilib. 2017-ci ilin birinci rübünə rayon üzrə 622 hektar sahədə yazlıq bitkilər əkilib.

Yığıncaqda təhsil, səhiyyə, mədəniyyət və digər təşkilatların işi ətraflı müzakirə edilib, konkret tapşırıqlar verilib.