ELM VƏ TƏHSİL
Bilik Fondu Praqada “Azərbaycanın geologiya elmi Çexiyada” mövzusunda sərgi açıb VİDEO
Bakı, 3 dekabr, AZƏRTAC
Azərbaycan Respublikasının Prezidenti yanında Bilik Fondu dekabrın 3-də Praqada “Azərbaycanın geologiya elmi Çexiyada” mövzusunda sərgi açıb.
Fondun informasiya təminatı sektorundan AZƏRTAC-a bildiriblər ki, “Azərbaycan elmi xaricdə” proqramı çərçivəsində keçirilən sərgi üç gün davam edəcək.
Əvvəlcə Karlov Universitetində “dəyirmi masa” təşkil olunub. “Azərbaycan-Çexiya: tarixi-mədəni münasibətlər” mövzusunda keçirilən müzakirələrdə elm, təhsil, siyasət, incəsənət sahələrində, eləcə də iş adamları arasında əlaqələrin daha da genişləndirilməsi ətrafında fikir mübadiləsi aparılıb.
Bilik Fondunun icraçı direktoru Oqtay Səmədov iki dost ölkənin ortaq dəyərlərindən danışıb, tarixi-mədəni əlaqələrin yüksələn xətt üzrə inkişaf etdiyini vurğulayıb.
Karlov Universitetinin Yaxın Şərq və Afrika Ölkələri üzrə İnstitutunun professoru Eduard Gombar, Çexiyanın Türkiyədəki sabiq səfiri, dilçi alim Tomas Lane, Azərbaycan Milli Elmlər Akademiyasının müxbir üzvü Arif İsmayılzadə və Təbiət Tarixi Muzeyinin direktoru Tariyel Eybətov, petrologiya üzrə tanınmış çex tədqiqatçısı Shah Vali Faryad, Çexiya Milli Təbiət Muzeyinin direktoru Jirina Daskova və muzeyin əməkdaşı, tanınmış paleontoloq Jiri Kvacek, Çexiya Sənaye Nazirliyinin təmsilçisi Pavel Kavina, universitetin geologiya üzrə professoru Pavel Bosak müzakirələrdə çıxış edərək bildiriblər ki, Azərbaycan ilə Çexiya arasında tarixi-mədəni münasibətlər genişləndirilərək indiki qloballaşma dövrünə uyğunlaşdırılmalıdır. Natiqlər bildiriblər ki, hazırda ölkələr arasında münasibətlərin müxtəlif sahələrdə inkişafı üçün münbit zəmin var.
Karlov Universitetində keçirilən sərginin açılışında bu ali məktəbin rektoru Tomas Zima Azərbaycan və Çexiyanın enerji sahəsində tərəfdaş olduqlarını diqqətə çatdırıb. Çexiyanın enerji tələbatının 20 faizindən çoxunu Azərbaycanın ödədiyini xatırladan rektor deyib ki, belə layihələr iki ölkə arasındakı elmi mübadilənin inkişafına təkan verir.
Azərbaycanın Çexiyadakı səfiri Fərid Şəfiyev elmimizin xaricdə tanıdılması məqsədi ilə Bilik Fondunun həyata keçirdiyi layihələri yüksək dəyərləndirib və bildirib ki, belə tədbirlərin bütün elm sahələrini əhatə etməsi vacibdir. Səfirin sözlərinə görə, elmimizin tanıdılması tələbə və müəllim mübadiləsinə, həmçinin Azərbaycanın tarixi, mədəniyyəti, ədəbiyyatı və siyasətinin təbliğinə şərait yaradacaq.
Azərbaycanlı alimlər geologiya elmində qazandıqları nailiyyətləri, ölkəmizin ərazisində aşkara çıxardıqları qiymətli qədim eksponatları, dəmir, qızıl, gümüş, alunit, polimetal və başqa yataqların əks olunduğu xəritələri nümayiş etdirib, çex alimləri ilə əməkdaşlıq münasibətləri qurublar.
Sərgiyə qatılan çexiyalı alimlər deyiblər ki, nümayiş olunan eksponatlar Azərbaycanın geologiya elmi - zəngin yeraltı və yerüstü sərvətləri haqqında onlara xeyli məlumat verib.
Yaxın günlərdə “Azərbaycan elmi xaricdə” proqramı çərçivəsində Bilik Fondunun xətti ilə Azərbaycandan Çexiyaya gedən alimlərin mühazirələri dinləniləcək.