Bakı, 30 may, AZƏRTAC

Beynəlxalq Futbol Assosiasiyaları Federasiyasında (FİFA) yaşanan korrupsiya qalmaqalı, təşkilatın bir sıra yüksək vəzifəli məmurunun həbsi fonunda keçirilən prezident seçkiləri, Yozef Blatterin bu posta beşinci dəfə seçilməsi xəbər gündəmini demək olar ki, zəbt edib.

AZƏRTAC xarici KİV-lərə istinadla xəbər verir ki, seçkilər Yozef Blatterin dünya futbol assosiasiyaları arasında böyük nüfuz sahibi olduğunu bir daha təsdiqlədi. Seçkilər ərəfəsində Sürixdə FİFA-nın yüksək vəzifəli 7 məmurunun həbsi, ABŞ ədliyyəsinin korrupsiya və pulların yuyulması, 2016-cı il və 2020-ci il dünya çempionatlarının ev sahiblərinin seçilməsi ilə bağlı açdığı cinayət işləri Y.Blatterin kreslosunu laxlada bilmədi. Sadəcə kiçik bir sensasiya ondan ibarət oldu ki, 79 yaşlı prezident bu posta birinci turda seçilmədi. Bunun üçün onun cəmi 7 səsi çatmadı. Digər namizəd, İordaniya şahzadəsi Əli bin əl-Hüseynin seçkilərdən geri çəkilməsi ilə ikinci tura ehtiyac qalmadı.

KİV-lərin dünya futbol hökuməti adlandırdıqları FİFA 111 il əvvəl – 1904-cü ildə Danimarka, Fransa, Niderland, İspaniya, İsveç və İsveçrə tərəfindən yaradılıb. Futbolun vətəni – İngiltərə isə təşkilata bir il sonra qoşulub. Hazırda FİFA 209 federasiyanı birləşdirir.

Beynəlxalq Futbol Assosiasiyaları Federasiyası planetin ən populyar idman növünə dəmir əli ilə rəhbərlik edir. Futbolla 500 milyon insan bu və ya digər formada əlaqəlidir. Onlar oyunçular və azarkeşlər, klub menecerləri və idman şərhçiləridir.

FİFA-nın himayəsi altında keçirilən ən mühüm futbol hadisəsi – dünya çempionatıdır. Dörd ildən bir təşkil olunan mundial federasiyaya yüz milyonlarla gəlir gətirir. Təşkilatın bank hesablarında dünya çempionatı oyunlarının televiziya yayım hüququndan əldə etdiyi və sponsorlardan aldığı təxminən 1,4 milyard avro var. Təkcə 2010-cu ildə Cənubi Afrikada keçirilən dünya çempionatının yayım hüququna televiziya kompaniyaları 2,2 milyard avro ödəyib. Mundial oyunlarının televiziya yayımları FİFA-nın gəlirlərinin 90 faizini təşkil edir.

Yozef Blatter FİFA-ya 1998-ci ildən başçılıq edir. Bundan əvvəl o, təşkilatın prezidenti postuna 2002, 2007 və 2011-ci illərdə seçilib. FİFA-ya rəhbərlik müddətinə görə isveçrəli yalnız fransız Jül Rime (1921-1954) və braziliyalı Joao Avelanjdan (1974-1998) geri qalır.

Seçkilərdən sonra konqresdəki çıxışında təşkilatı FİFA-nın növbəti rəhbərinə yaxşı vəziyyətdə təhvil verəcəyini bəyan edən Y.Blatter deyib : “Prezidentlik müddətimin sonunda FİFA-nı sələfimə çox əla vəziyyətdə təhvil verəcəyəm. Həmin vaxt o, çox güclü təşkilat olacaq”.

FİFA-nın prezidenti bu gün keçirdiyi mətbuat konfransında istefaya getməsi ilə bağlı tələbləri isə belə cavablandırıb: “Mən konqresdə dediyim kimi, məsuliyyətdən yayınmıram və onu öz üzərimə götürürəm. Biz FİFA-nın gəmisini bulanıq sudan çıxaracağıq. Mandatımın sonunadək onu sakit limana gətirə biləcəyimə ümid edirəm. FİFA bu sınaqlardan uğurla çıxacaq, daha yaxşı və möhkəm olacaq”.