Bakı, 7 yanvar, AZƏRTAC

Uruqvayın Xarici İşlər Nazirliyi bu ölkənin xarici siyasət idarəsi başçısının Dünya Erməni Milli Şurasının və Ermənistan-Uruqvay Şurasının nümayəndələri ilə yanvarın 4-də keçirilmiş görüşünün yekunlarına dair məlumatın mətnini yayıb.

Rəsmi Montevideonun bu rəsmi məlumatı yaymaqla özünü saldığı vəziyyətdən daha səfeh vəziyyət təsəvvür etmək çətindir. Bir tərəfdən, ölkənin Xarici İşlər Nazirliyinin yaydığı rəsmi məlumatda «de la Republica de Nagorno Karabagh» frazası var, digər tərəfdən, xarici siyasət idarəsi nədənsə, həmin qurumun tanına biləcəyi barədə(?) gələcək zamanda yazır. Burada qəti mövqe tutmaq lazımdır – ya siz öz “dqr”inizi tanıyırsınız, ya da, elə sizin fikrinizcə, təbiətdə mövcud olmayan şeyin adını çəkməyin. Çünki qondarma “dqr”in Uruqvay tərəfindən tanınması haqqında sənəd yoxdur! Bu, əqidəli ateistin “İlahi, ümumiyyətlə, bilirəm ki, sən yoxsan, amma sənə yalvarıram, mənə kömək et!” deyə dua etdiyi absurd vəziyyəti xatırladır.

“Ermənistan Respublikasının 1918-ci ilin mayından 1920-ci ilin dekabrına qədər mövcud olmuş sərhədləri daxilində ərazi bütövlüyü” məsələsinə gəldikdə isə, cənab nazir, sizə bildiririk ki, Yerevanın həmin illərdə birtərəfli qaydada bəyan etdiyi sərhədlər real mövcud olan faktiki sərhədlərdən çox fərqlənirdi. Göstərilən dövr ərzində isə həmin sərhədlər dəfələrlə (bir qayda olaraq, azalma tərəfinə) dəyişmişdi, buna görə sizin məhz hansı sərhədləri nəzərdə tutduğunuzu dəqiqləşdirmək lazım idi. Əgər 1920-ci il 2 dekabr tarixli Aleksandropol müqaviləsi (yeri gəlmişkən, daşnak hökuməti tərəfindən imzalanmış) ilə müəyyən edilmiş sərhədlərdən söhbət gedirsə, Azərbaycan heç də bunun əleyhinə deyil, çünki bu halda Ermənistanın ərazisi, indiki sərhədlər daxilindəki ərazi ilə müqayisədə, demək olar ki, üç dəfə azalmalıdır.

Nəhayət, bir halda ki, Uruqvayda ayrıca götürülmüş bir dövrdə ərazi bütövlüyünü xatırlamaq qərara alınıb, onda rəsmi Montevideo Osmanlı İmperiyasının çiçəkləndiyi dövrdə - Möhtəşəm Süleyman zamanında ərazi bütövlüyünü və ya Səfəvilər sülaləsinin zenitdə olduğu illərdə onun ərazi bütövlüyünü nə üçün dəstəkləmir?! Ən pis halda, XIX əsrin əvvəlində, dünya xəritəsində Uruqvay adlı dövlətin olmadığı bir vaxtda İspaniyanın ərazi bütövlüyünü nə üçün dəstəkləmir?..