İQTİSADİYYAT
Bir il əvvəl yaradılmış İİTKM dünyanın ən yaxşı beyin mərkəzləri sırasına daxil olub
Bakı, 20 aprel, AZƏRTAC
Azərbaycan Prezidenti İlham Əliyevin 2016-cı il 21 sentyabr tarixli Sərəncamı ilə yaradılan “Azexport” portalı indiyədək qeyri-neft sektoruna 100 milyon ABŞ dollarına yaxın məbləğdə ixrac sifarişləri alıb. İlin sonunadək bu rəqəmin bir neçə dəfə artacağı gözlənilir.
AZƏRTAC xəbər verir ki, bu barədə İqtisadi İslahatların Təhlili və Kommunikasiya Mərkəzinin (İİTKM) icraçı direktoru Vüsal Qasımlı aprelin 20-də qurumun birillik fəaliyyətinin nəticələrinə dair keçirdiyi mətbuat konfransında məlumat verib.
Sifarişlərdən aydın olur ki, dünya bazarında əsasən kənd təsərrüfatı məhsullarına - meyvə şirəsi, meyvə kompotu, quru süd, şərab, yumurta, toyuq əti, fındıq ləpəsi, soğan, kartof, mərci, həmçinin hazır məhsullara, o cümlədən şərab və konyaklara, sənaye məhsullarına, mebelə tələbat daha çoxdur.
Mərkəzin qısa müddətdə ABŞ-ın Pensilvaniya Universiteti tərəfindən hazırlanan reytinqdə dünyanın ən yaxşı beyin mərkəzlərinin sırasına daxil olduğunu bildirən V.Qasımlı deyib: "Hazırda İİTKM-də Harvard, London, Bonn və başqa nüfuzlu universitetlərdən məzun olmuş 10-a yaxın iqtisad doktoru fiskal, monetar, rəqabət, biznes mühiti, aqrar, sənaye, dövlət müəssisələri, elektron ticarət, xarici bazarlar və sair mövzularda tədqiqatlara cəlb olunub. Aparılan tədqiqatlara Avropa İttifaqı, Dünya Bankı, BMT və başqa qurumların nüfuzlu ekspertləri cəlb ediliblər ki, bu da ölkədə islahatların gündəliyinin formalaşmasına töhfə verir. "Azərbaycan Respublikasında biznes mühitinin əlverişliliyinin artırılması və beynəlxalq reytinqlərdə ölkəmizin mövqeyinin daha da yaxşılaşdırılması ilə bağlı əlavə tədbirlər" haqqında Azərbaycan Prezidentinin 2016-cı il 13 iyul tarixli Sərəncamına uyğun olaraq yaradılmış Komissiyanın fəaliyyətinin effektiv təşkil olunması istiqamətində İİTKM də yaxından iştirak edir".
Bildirilib ki, İİTKM Azərbaycanda inzibati rayonların iqtisadi fəaliyyət nəticələri və rəqabətqabiliyyətli sahələrinin müəyyən edilməsi və təhlilinin aparılması məqsədilə ilk dəfə regionların investisiya reytinqini tərtib edib. Reytinqin tərtib edilməsi zamanı qabaqcıl beynəlxalq təcrübə öyrənilib və Dünya İqtisadi Forumu tərəfindən hazırlanmış Dünya Rəqabətlilik İndeksinə oxşar yanaşma tətbiq olunub.
Prezident İlham Əliyevin "Paylarının (səhmlərinin) nəzarət zərfi dövlətə məxsus olan hüquqi şəxslərin fəaliyyətində səmərəliliyin artırılması ilə bağlı əlavə tədbirlər haqqında” 2016-cı il 5 sentyabr tarixli Sərəncamına uyğun olaraq Mərkəz tərəfindən 4 istiqamətdə müvafiq tədbirlər planının hazırlanması prosesi həyata keçirilib və qaydalara dair tədbirlər paketi hazırlanib.
Eyni zamanda, Prezident İlham Əliyevin 2016-cı il 16 mart tarixli Sərəncamına əsasən "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"nə müvafiq olaraq inkişaf planlarının işlənilməsi məqsədilə yaradılmış İşçi Qrupu ilə əməkdaşlıq qurulub. Strateji Yol Xəritəsinin hazırlanmasına dəstək verilməsi və geniş ictimaiyyətin iştirakını təmin etmək üçün yerli və xarici ekspertlər, mütəxəssislər, məsləhətçi şirkətlər və elmi təşkilatların və dövlət qurumlarının, vətəndaş cəmiyyəti nümayəndələrindən ibarət 11 prioritet sektor üzrə alt-işçi qruplar yaradılaraq intensiv surətdə ictimai müzakirələr aparılıb. "Alt işçi qruplarına cəlb olunmuş yüzlərlə ekspert dövlət, təhsil, akademik və biznes dairələrini, habelə vətəndaş cəmiyyətini əhatə edib. "Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında" Prezidentin 2016-cı il 6 dekabr tarixli Fərmanının 2.2. bəndi ilə strateji yol xəritələrində nəzərdə tutulmuş fəaliyyətlərlə bağlı monitorinq, qiymətləndirmə və kommunikasiya tədbirlərinin keçirilməsi İqtisadi İslahatların Təhlili və Kommunikasiya Mərkəzinə tapşırılib", - deyə V.Qasımlı diqqətə çatdırıb.
Bildirilib ki, "Rəqəmsal Ticarət Qovşağı kimi Azərbaycan Respublikasının mövqeyinin gücləndirilməsi və xarici ticarət əməliyyatlarının genişləndirilməsi ilə bağlı əlavə tədbirlər" haqqında Prezident Fərmanının icrasını təmin etmək məqsədilə İqtisadi İslahatların Təhlili və Kommunikasiya Mərkəzi 10-dan çox dövlət qurumları ilə birlikdə "ixrac üçün vahid pəncərə", elektron pul kisəsi və elektron imzaların qarşılıqlı tanınması sahəsində mühüm işlər görüb. Qısa müddətdə Azərbaycanın Rəqəmsal Ticarət Qovşağı barədə ABŞ, Rusiya, Polşa, Türkiyə və başqa ölkələrin nümayəndələri ilə müzakirələr aparılıb.
Vüsal Qasımlı qeyd edib ki, ötən bir il ərzində islahatların kommunikasiyası İİTKM-in elektron resurslarında - iqtisadiislahat.org, ecoreform.az, ereforms.org saytlarında, Facebook, Twitter və Youtube səhifələrində, eləcə də KİV-də və sosial şəbəkələrdə üç dildə işıqlandırılıb.
Bundan başqa, "İslahatlar icmalı" və "İxrac icmalı"nın nəşrinə başlanılıb. Hər iki icmal xarici dillərə də tərcümə olunaraq, yüz minlərlə ünvana göndərilir.
Hesabat ilində AMEA və "Microsoft"la Anlaşma Memorandumu imzalanıb. Bir sıra beynəlxalq təşkilatlar – BMT, Avropa İttifaqı, Beynəlxalq Valyuta Fondu, İqtisadi Əməkdaşlıq və İnkişaf Təşkilatı, SİGMA, Beynəlxalq Maliyyə Korporasiyası, Dünya Bankı və digər təşkilatlarla çoxsaylı birgə tədbirlər, həmçinin Almaniya, İsveçrə, ABŞ səfirləri ilə görüşlər keçirilib. Hesabat ilində İİTKM-in əməkdaşları ABŞ, Hindistan, Yaponiya, İtaliya, Estoniya, Tailand, Türkiyə və başqa ölkələrə səfər edərək iqtisadi islahatlar barədə çıxışlar ediblər.
İİTKM-in icraçı direktoru əlavə edib ki, nüfuzlu xarici ekspertləri cəlb etməklə Mərkəzdə sənaye parkları və sənaye məhəllələrinin fəaliyyəti, monitorinqi və qiymətləndirilməsi, gəlir-xərc analizi, iqtisadi zonaların qurulmasında texniki-iqtisadi əsaslandırma, keçid iqtisadiyyatlı ölkələrdə makroiqtisadi stabilləşmə və iqtisadi artım, data (məlumat) jurnalistikası, qida məhsullarının istehsalçılarına və təchizatçılarına olan tələblər və digər mövzularda 20-dək təlim keçirilib və müdavimlərə beynəlxalq sertifikatlar təqdim olunub.