İQTİSADİYYAT


Bir ildə əhalisindən 6 dəfə çox turist qəbul edən şəhər: Antalya

A+ A

Bakı, 1 avqust, AZƏRTAC

Ötən günlərdə “Azərbaycan Hava Yolları” (AZAL) və “Summer Tour” şirkətinin dəstəyi ilə bir qrup azərbaycanlı jurnalistin Antalyaya üç günlük maraqlı və yaddaqalan səfəri təşkil olundu. Səfər son zamanlarda Türkiyədə baş verən siyasi proseslər və uğursuz alınan hərbi çevriliş cəhdinin qardaş ölkənin turizm sektoruna təsir etmədiyini əyani şəraitdə görmək məqsədi daşıyırdı.

Antalya: İlin 300 günü günəşli olan şəhər

Antalya Türkiyənin cənubunda, Aralıq dənizi qərb sahillərində, körfəz ilə Toros daşlarının əhatəsində yerləşən məşhur kurort şəhəridir. Antalya Türkiyənin əhalisinin ən sıx olduğu beşinci, sahəsinə görə isə altıncı böyük şəhəridir. Türkiyənin turizm paytaxtı hesab edilən bu şəhər mavi dənizi və gözəl çimərlikləri ilə seçilir. Antalya şəhəri 1980-ci ildən sonra əlverişli iqliminə görə sürətlə inkişaf etmiş turizm bölgəsinə çevrilib. Ərazisi 1,4 min kvadratkilometr, əhalisi təxminən 2,2 milyon olan Antalyaya il ərzində orta hesabla 10 milyondan çox turist qəbul edir. Türkiyənin Aralıq dəniz sahilləri ekoloji baxımdan ən təmiz ərazilər hesab olunur. Şəhər özünəməxsus arxitekturası, tarixi abidələri ilə də məşhurdur.

Antalya Kemer, Belek, Alanya və Side kimi turizm bölgələri ilə məşhur, turistlərin daim istirahət üçün seçdiyi şəhərdir. Burada turist axınının daha çox qeydə alındığı bölgə Qala içi adlanan qədim şəhərdir. Antalyanın görməli yerlərinin əksəriyyəti də demək olar ki, bu ərazidə yerləşir. Buradakı evlərin çoxu mehmanxana və restorana çevrilib. Yivli minarə isə Antalyanın simvolu hesab edilir. Əsası XIX əsrdə qoyulan Saat qülləsi, Xıdırlıq qalası, Adrianın qapıları, Düden şəlaləsi, Atatürk və Mərmərli parkları da şəhər sakinləri və qonaqların sevimli istirahət məkanlarıdır. Türkiyənin ən zəngin muzeylərindən biri məhz Antalyadadır. Burada Osmanlı imperiyasınaqədərki dövrün tapıntıları, romalılara aid heykəllərlə işlənmiş sarkofaqlar nümayiş edilir.

Turistlərin istirahət üçün seçdikləri ən təhlükəsiz bölgə

Səfər çərçivəsində biz Antalyanın Belek bölgəsindəki beş ulduzlu otellərdən olan “Rixos Premium Belek”, “Maxx Royal Belek Golf Resort”, “Kaya Palazzo Golf Resort” və “Regnum Carya Golf & SPA Resort”də olduq. Bu otellər Belek bölgəsinin ən məşhur otelləri sayılır və müxtəlif ölkələrdən, əsasən də ailəli turistlərin sevimli məkandır.

Öz ailəsi ilə yay tətilini məhz Antalyada keçirməyi seçən azərbaycanlı turist Rəfael Nuri bizimlə söhbətində artıq 14 gündür ki, bu möhtəşəm bölgədə istirahət etdiyini bildirdi. Bir neçə ildir ki, tətilini Belekdə keçirdiyini deyən həmyerlimiz Antalyanı məhz tam rahat, sərbəst və təhlükəsiz şəhər olduğu üçün seçdiyini dedi. Bildirdi ki, Türkiyədəki son hadisələr turistlərin tətil üçün qardaş ölkəni seçməsində təsir etməyib. O azərbaycanlı turistlərin də sayının günbəgün artdığını əlavə etdi.

Qazaxıstanlı turist Azamat Abdıyev isə Antalyanı məhz əsrarəngiz təbiəti, valehedici dənizi və çimərlikləri üçün seçdiyini dedi. O, şəhərdə təhlükəsizlik tədbirlərinin ən yüksək səviyyədə təşkil edildiyini, bunun da turistlərin istirahət üçün məhz Antalyanı seçməsindəki əsas faktorlardan biri olduğunu bildirdi.

Ukraynalı turist Anna Bıstrenka isə hər zaman Antalyanı görmək arzusunda olduğunu və bu heyrətamiz turizm bölgəsində istirahətindən zövq aldığını dedi. Qeyd etdi ki, tam təhlükəsiz şəraitdə bu səfalı və qədim şəhərin tarixi yerlərini ziyarət edib.

Ailəsi ilə yay tətili keçirmək üçün Antalyanı seçən ingiltərəli turist Din Viçhens Türkiyənin cənnət bölgəsində aldığı xoş təəssüratları bölüşərək dedi: “Antalyada ilk dəfədir oluram. Həqiqətən də bu bölgə gözəl təbiətə, qədim tarixə malikdir. Bilirdim ki, Türkiyə tanınıb-seçilən turist məkanları ilə məşhurdur. Antalyada bunu öz gözlərimlə gördüm”.

Türkiyə Otelçilər Federasiyasının (TÜROFED) idarə heyəti sədri Osman Ayık ilə söhbətimizdə isə o bildirdi ki, federasiyanın 15 bölgədə təşkilatı var. TÜROFED-ə üzv təxminən 2 min 500-dən çox otel nümayəndəsi var.

“Son hadisələr onu göstərdi ki, türk xalqı öz demokratiyasına sahib çıxdı. Hazırda Türkiyədə tam sabitlikdir. İnsanla rahat bir şəkildə öz işləri ilə məşğuldurlar. Turizm bölgələrində insanlar çimərliklərdə və otellərdə tam təhlükəsiz şəraitdə öz tətilini keçirirlər. Biz qardaş Azərbaycandakı dostlarımızı da istirahətlərini səmərəli keçirmələri üçün Antalyaya dəvət edirik. Türkiyə azərbaycanlı qardaşlarımızın da ölkəsidir və onlar burada tam rahat tətil edə bilərlər”, - deyə O.Ayık əlavə etdi.

Antalya valisi: Ötən il 35 min azərbaycanlı turist Antalyaya səfər edib

Səfər çərçivəsində azərbaycanlı jurnalistlərin Antalya valisi Münir Karaloğlu ilə görüşü oldu. Antalyanın turizm potensialından danışan vali bildirdi ki, şəhərdə çoxlu saraylar, muzeylər, antik kəndlər və 385 beş ulduzlu otel var.

Antalyanın turizm sektorunun 1983-cü ildən inkişaf etməyə başladığını deyən M.Karaloğlu məhz 1985-ci ildə bu şəhərin maksimum sayda - ildə 2 milyon turist qəbul etdiyini dedi. İndi isə hər il Antalyaya Rusiya, Almaniya, İngiltərə, Hollandiya, Azərbaycan və digər ölkələrdən milyonlarla turist gəlir.

“2015-ci ildə 35 min azərbaycanlı turist Antalyaya səfər edib. Bu ilin iyununda isə 8 mindən çox azərbaycanlı yay tətili üçün məhz bu şəhəri seçib. Bu da onu göstərir ki, Antalyanı görmək istəyən, öz tətilini bu əsrarəngiz bölgədə keçirmək istəyən azərbaycanlıların sayı ilbəil artır”, - deyə M.Karaloğlu əlavə edib.

O bildirdi ki, təkcə 2015-ci ildə Antalyaya 12 milyon 800 minədək turist gəlib. Bu da o deməkdir ki, ötən il Antalya öz əhalisindən 6 dəfə çox turist qəbul edib. Antalya ilin 300 günü günəşli olan, yayı isti və quru, qışı mülayim və yağmurlu şəhərdir. Türkiyənin turizm gəlirinin 35 faizi Antalyanın hesabına ödənilir. Ümumilikdə Türkiyənin ildə ən çox turist çarpayısı satılan şəhəri də 65 faiz göstərici ilə məhz Antalyadır.

M.Karaloğlu əlavə etdi ki, Antalya Türkiyədə ən çox antik kənd olan vilayətidir. Ötən il Antalyada “G-20” ölkələri liderlərinin sammiti təşkil edilib və hazırda şəhər “Antalya Ekspo 2016” sərgisinə ev sahibliyi edir. O, son zamanlarda Türkiyədə baş verən siyasi proseslərin və uğursuz alınan hərbi çevriliş cəhdinin turizm sektoruna təsir etmədiyini, hər il olduğu kimi istər Avropadan, istərsə də digər qitələrdən turistlərin Antalyanı seçdiklərini bildirdi. Qeyd etdi ki, turistlərin istirahət üçün Antalyanı seçmələrində ən vacib amillərdən biri məhz bu şəhərin tam təhlükəsiz olmasıdır.

“Antalya Ekspo 2016”da Azərbaycan milli pavilyonu

Azərbaycanlı jurnalistlər Antalyada 53 ölkə və bir neçə beynəlxalq təşkilatın təmsil olunduğu “Antalya Ekspo 2016” Beynəlxalq Botanika Sərgisi (International Horticultural Exposition) ilə tanış oldular. Məlumat verildi ki, “Antalya Ekspo 2016” iştirakçıların sayına görə 1990-cı ildə Yaponiyanın Otaka şəhərində keçirilmiş “Ekspo”dan sonra ikinci olub. “Antalya Ekspo 2016” Beynəlxalq Botanika Sərgisinin fəlsəfəsi “Gələcək nəsillər üçün yaşıl bir dünya”, mövzusu “Çiçək və uşaq”, şüarı isə “Gələcəyi yaşıllaşdır”dır.

Heydər Əliyev Mərkəzinin dəstəyi ilə “Antalya Ekspo 2016” təxminən 2 min kvadratmetr ərazini əhatə edən Azərbaycan milli pavilyonu qurulub. Azərbaycanın milli pavilyonunda ölkəmizin zəngin faunası, unikal biomüxtəlifliyi və bağçılıq mədəniyyəti nümayiş etdirilir. Pavilyon özünəməxsus konsepsiyası və Azərbaycanın zəngin təbiətinin gözəlliklərinin təqdimat forması ilə seçilir. Ziyarətçilər burada qiyabi də olsa Azərbaycanın təbiətinə səyahət edir, zəngin təbiətin şahidinə çevrilirlər. Milli pavilyonda Azərbaycana həsr olunan, onun təbii gözəlliklərindən ilhamlanaraq yaradılan sənət növlərindən ibarət sərgi də təqdim edilir. Pavilyondakı “Təbiətin rəngləri” sərgisində bir tərəfdən Azərbaycanın gözəl təbiətinin yaratdığı imkanlar, digər tərəfdən incəsənəti tərənnüm olunur.

Sərgidə Azərbaycan xalçaçılıq sənətinin tarixi və bu günündən bəhs edilir. Xalçaçılığın müasir dövrümüzədək Azərbaycanda dekorativ-tətbiqi sənətin ən mühüm sahəsi olaraq tanındığı, bol boya qaynaqlarının Azərbaycanda xalçaçılıq sənətinin inkişafının ən mühüm amillərindən biri olmasından bəhs edilir. Qədim dövrlərdən indiyədək Azərbaycanda bitki və təbii mineral mənşəli boya çeşidlərindən istifadə olunur. Bir çox yerli bitki və ağac növlərinin kökləri, soyulmuş qabıqları, meyvələri və yarpaqlarından təbii və davamlı boya əldə etmək mümkündür.

Sərgidə Azərbaycan xalçalarının zərif naxışları, nəfis Azərbaycan xalılarının rəsmləri olan orta əsrlər Avropa rəssamlarının əsərlərini nümayiş etdirən multimedia layihəsi, Azərbaycan Xalça Muzeyinin eksponatları, Azərbaycan xalçaçılıq elminin banisi Lətif Kərimovun eskizləri, eyni zamanda, müasir rəssamlar Vüqar Muradov, Elçin Vəliyev və heykəltəraş Butunay Haqverdiyevin əsərləri nümayiş olunur.

“Antalya Ekspo 2016” oktyabrın 30-dək davam edəcək. Bu o deməkdir ki, Antalyada istirahət edən və ya bu cənnət məkana getməyə hazırlaşan həmyerlilərimiz “Antalya Ekspo 2016” Azərbaycan milli pavilyonunu ziyarət etmək şansı var.

Nihad Budaqov

AZƏRTAC-ın aparıcı müxbiri

Bakı-Antalya-Bakı

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.