Bakı, 29 iyul, Elvira Məmmədova, AZƏRTAC

Azərbaycan Respublikası Prezidentinin sənayeləşmə siyasətinə uyğun olaraq, qeyri-neft sənayesində idxalı əvəz edən, rəqabətqabiliyyətli və ixracyönümlü məhsullar istehsal edən müəssisələrin təşkilinə, sahibkarlığın inkişafına dövlət dəstəyi tədbirləri daha da gücləndirilib. Bu sahədə sənaye parkları və məhəllələrinin yaradılması xüsusi əhəmiyyət kəsb edir.

AZƏRTAC xəbər verir ki, iyulun 29-da İqtisadiyyat Nazirliyinin təşkilatçılığı ilə keçirilən növbəti tədbir çərçivəsində Sumqayıt Kimya Sənaye Parkının 9-cu, Balaxanı Sənaye Parkının 5-ci rezidentinə şəhadətnamə, 12 sahibkara isə investisiya təşviqi sənədləri təqdim olunub.

Dövlət qurumlarının və sənayenin müxtəlif sahələrində fəaliyyət göstərən müəssisələrin nümayəndələrinin iştirak etdikləri tədbirdə iqtisadiyyat nazirinin müavini Niyazi Səfərov dövlət başçının sənayeləşmə siyasəti çərçivəsində görülən işləri diqqətə çatdırıb, ölkəmizdə sahibkarlığın inkişafi, biznes mühitinin davamlı olaraq yaxşılaşdırılması istiqamətində həyata keçirilən sistemli tədbirlər, aparılan islahatlar barədə məlumat verib. Qeyd edilib ki, sahibkarlıq sahəsində aparılan yoxlamaların 2 il müddətinə dayandırılması, lisenziya və icazələrin sayının və rüsumların əhəmiyyətli şəkildə azaldılması, sənədlərin alınma prosedurlarının sadələşdirilməsi, vergi və gömrük güzəştləri, qeyri-neft ixracının təşviqi tədbirləri və s. sahibkarlığın inkişafı üçün yeni imkanlar açıb. Bu cür dəstək mexanizmlərindən olan Sumqayıt Kimya Sənaye Parkı, Balaxanı Sənaye Parkı və Qaradağ Sənaye Parkı artıq fəaliyyət göstərir və burada rezidentlərin səmərəli fəaliyyəti üçün güzəştli rejim yaradılıb. Mingəçevir Sənaye Parkının təşkili istiqamətində tədbirlər davam etdirilir.

Bildirilib ki, regionlarda sahibkarlıq fəaliyyətinin genişləndirilməsi, yerli ehtiyatlardan səmərəli istifadə etməklə sənaye sahələrinin inkişaf etdirilməsi, istehsal prosesinin təşkilində infrastruktur xərclərinin azaldılması, sahibkarlar arasında kooperasiya əlaqələrinin gücləndirilməsi, məşğulluğun və məşğulluqda sənayenin xüsusi çəkisinin artırılması baxımından sənaye məhəllələrinin yaradılması da önəmlidir.

Artıq Neftçala Sənaye Məhəlləsində dövlət tərəfindən sahibkarlar üçün bütün zəruri infrastruktur yaradılıb. Hazırda istehsal sahələrində avadanlıqların yerləşdirilməsi və digər hazırlıq işləri aparılır. Sahibkarlar tərəfindən Neftçala Sənaye Məhəlləsində fəaliyyət göstərmək üçün Azərbaycan İnvestisiya Şirkətinə 8 layihə təqdim olunub. Bunlardan 4 layihə üzrə sahibkarlıq subyektləri rezident kimi qeydə alınıb.

Dövlət başçısının Masallı Sənaye Məhəlləsinin yaradılmasına dair Sərəncamına uyğun olaraq, bu istiqamətdə də müvafiq işlər görülür. Sahibkarlar tərəfindən Masallı Sənaye Məhəlləsinə böyük maraq göstərilir. Artıq sahibkarlar icra olunması üçün ümumi dəyəri 31 milyon manatdan çox olan 33 layihəyə dair təkliflər təqdim ediblər. Hazırda yerli potensial nəzərə alınmaqla, digər regionlarda da sənaye parkları və məhəllələrinin yaradılması istıqamətində tədbirlər görülür.

Tədbirdə vurğulanıb ki, investisiyaların təşviqi Azərbaycanda həyata keçirilən iqtisadi islahatların mühüm istiqamətlərindəndir. İndiyədək 18 sahibkara investisiya təşviqi sənədi verilib ki, bu layihələrin reallaşdırılması nəticəsində yerli istehsala 194 milyon manatdan çox investisiya yatırılacaq və 1700-ə yaxın yeni iş yeri açılacaq. Artıq investisiya təşviqi sənədi almış sahibkarlıq subyektlərinin sayı 30-a çatıb. İnvestisiya təşviqi sənədi verilən layihələr 7 iqtisadi rayonu əhatə edir. Ümumiyyətlə, investisiya təşviqi sənədi verilmiş layihələr çərçivəsində 300 milyon manata yaxın investisiya qoyuluşu və 2700-ə yaxın iş yerinin yaradılması nəzərdə tutulur.

Tədbirdə investisiya təşviqi və parklar üzrə şəhadətnamə alan sahibkarlar layihələr üzrə təqdimatlarla çıxış ediblər.

Sonra sahibkarlara investisiya təşviqi sənədi, Sumqayıt Kimya Sənaye Parkının yeni rezidenti “Alco Lubricant Company” MMC-yə və Balaxanı Sənaye Parkının yeni rezidenti “MET-AK” MMC-yə qeydiyyat şəhadətnamələri təqdim edilib.

Sumqayıt Kimya Sənaye Parkının yeni rezidenti - “Alco Lubricant Company” MMC Almaniya texnologiyası əsasında sürtgü yağlarının istehsalını, topdan və pərakəndə satışını təşkil edəcək. Layihənin investisiya dəyəri 10 milyon ABŞ dollarıdır. Layihə çərçivəsində illik istehsal gücü 30 min ton olan zavod inşa olunacaq. Bu məqsədlə yaxın zamanlarda Sumqayıt Kimya Sənaye Parkının 2.5 hektar ərazisində zavodun tikintisinə başlanacaq. Müəssisənin 2017-ci ilin ikinci yarısında fəaliyyətə başlaması gözlənilir. Müasir avadanlıq və texnologiyalarla təchiz ediləcək zavodda 100-ə yaxın yerli mütəxəssis işlə təmin olunacaq. Zavodun məhsulları daxili bazarın tələbatını ödəməklə yanaşı, xarici ölkələrə də ixrac olunacaq. Ümumilikdə, Sumqayıt Kimya Sənaye Parkının rezidentləri tərəfindən sənaye parkına 1,1 milyard ABŞ dolları investisiyanın yatırılması və 2200-dən çox iş yerinin yaradılması nəzərdə tutulur.

Balaxanı Sənaye Parkının 5-ci rezidenti olan “MET-AK” MMC üçün sənaye parkında 2000 kvadratmetr sahə ayrılıb. Burada plastik məmulatların emalı sahəsi yaradılacaq. Layihənin reallaşdırılmasına 16,5 milyon manat investisiya yatırılacaq. Emal sahəsində 130-dan çox yeni iş yeri açılacaq. Ümumilikdə, Balaxanı Sənaye Parkının rezidentləri tərəfindən 23 milyon manata yaxın investisiyanın yatırılması və 200-dən çox iş yerinin yaradılması nəzərdə tutulur.

Hazırda sənaye parklarına və məhəllələrinə yeni rezidentlərin cəlb edilməsi istiqamətində bir sıra şirkətlərlə danışıqlar aparılır.