Moskva, 12 may, AZƏRTAC

Rusiya Azərbaycanlı Gənclər Birliyinin (RAGB) sədri Leyla Əliyevanın təşəbbüsü ilə “Bakı-2015” birinci Avropa Oyunlarına dəstək məqsədilə Moskvada keçirilən “RAGB - 2015” Universiadası Heydər Əliyev Kuboku uğrunda ənənəvi mini-futbol turniri ilə başa çatıb. Turnir Azərbaycan Respublikasının Gənclər və İdman Nazirliyinin dəstəyi ilə təşkil edilib.

“Lujniki” stadionunda keçirilmiş yarışlarda 24 ən güclü komanda mübarizə aparıb. Onlardan 5-i Rusiyanın regionlarını təmsil edib. Novosibirskdəki “Rusiya-Azərbaycan Evi”nin komandası turnirdə ilk dəfə iştirak edib.

Turnirin açılışında çıxış edən RAGB idarə heyətinin üzvü Emin Hacıyev Azərbaycan xalqının ümummilli lideri Heydər Əliyevin anadan olmasının 92-ci ildönümü münasibətilə tədbir iştirakçılarını təbrik edib. Ulu Öndərin müasir müstəqil Azərbaycan dövlətinin memarı və qurucusu olduğunu qeyd edən E.Hacıyev vurğulayıb ki, vahid və yekdil diasporumuzun yaradılması məhz Heydər Əliyevin adı ilə bağlıdır. Vətənimizdən kənarda yaşayan azərbaycanlıların dövlətimizin diqqət və qayğısını daim hiss etdiklərini deyən RAGB-nin idarə heyətinin üzvü turnir iştirakçılarına təşkilatın sədri Leyla Əliyevanın təbrikini çatdırıb. O, “RAGB - 2015” universiadasında iştirak edənlərə minnətdarlığını bildirərək birinci Avropa Oyunlarını ölkəmiz üçün böyük tarixi hadisə kimi qiymətləndirib.

Mərasimdə çıxış edən Ümumrusiya Azərbaycan Konqresinin icraçı direktoru İlqar Hacıyev universiadanın bağlanışının və mini-futbol üzrə turnirin xalqımızın ümummilli lideri Heydər Əliyevin anadan olduğu gündə keçirilməsinin əhəmiyyətini vurğulayıb. Azərbaycanın xilasının, dirçəlişinin və sürətli inkişafının Ulu Öndərin adı ilə bağlı olduğunu qeyd edən İ.Hacıyev bildirib ki, Prezident İlham Əliyevin mayın 9-da Moskvada keçirilən Qələbə paradında iştirakı Azərbaycan ilə Rusiya arasında dostluq münasibətlərinin sübutudur.

Azərbaycanın Rusiyadakı səfirliyinin müşaviri Vüqar İmaməliyev turnir iştirakçılarına səfir Polad Bülbüloğlunun xoş arzularını çatdırıb, onlara uğurlar arzulayıb.

Sonra yarışlar başlanıb. Mini-futbol turnirində birinci yerə Novosibirski təmsil edən komanda çıxıb. İkinci yerə Rusiya Xalqlar Dostluğu Universitetinin təmsilçiləri layiq görülüb. Yarışda 3-4-cü yerləri Azərbaycanın Rusiyadakı səfirliyinin və Moskva Dövlət Humanitar-İqtisadiyyat Universitetinin komandaları bölüşdürüb.

Qalib komandalara Heydər Əliyev Kuboku, diplomlar və medallar təqdim olunub.

Turnirdə ən yaxşı oyunçu və qapıçı Novosibirsk komandasından Roman Lavrentiyev və Andrey Qojenko, ən yaxşı bombardir isə Moskva Dövlət Humanitar-İqtisadiyyat Universiteti komandasının kapitanı, universitetin rektoru Vaqif Bayramov olub.

Daha sonra “RAGB - 2015” universiadasının bütün yarışlarının qalibləri mükafatlandırılıb. Universiadada stolüstü tennis üzrə qadınlar arasında birinci yerə Maliyyə Universitetinin tələbəsi Nərgiz Zeynalova, kişilər arasında O.Kutafin adına Moskva Dövlət Hüquq Universitetinin tələbəsi Samir Şükürov çıxıblar. Qadınlar arasında marafonun qalibi K.Timiryazev adına Moskva Kənd Təsərrüfatı Akademiyasının tələbəsi Olqa Romanova, kişilər arasında həmin akademiyanın tələbəsi Bolat Koça olub.

Voleybol turnirində birinci yerə “Vətən” komandası, oğlanlar arasında isə Maliyyə Universitetinin komandası çıxıblar. Basketbolçuların yarışında isə ən yaxşı oyunu Dövlət İdarəçilik Universitetinin tələbələri göstəriblər.

Universiadanın bütün qaliblərinə medallar və kuboklar verilib.

Turnirin ən yaxşı oyunçusu, Novosibirskdən olan Roman Lavrentiyev AZƏRTAC-a müsahibəsində bildirib ki, bütün komandalar məşqlərə və yarışlara ciddi yanaşıblar. Bu, yarışlar ərzində onların qələbəyə can atmasından da aydın görünürdü. “Çox şadam ki, komandamız turnirin qalibi oldu. Kubokla yanaşı, mən yarışlarda özümə dostlar da qazandım”, - deyə Roman Lavrentiyev bildirib.

Fəridə Abdullayeva

AZƏRTAC-ın xüsusi müxbiri

Moskva