Bakı, 8 iyun, Məhərrəm Əlioğlu, AZƏRTAC

Bakıda keçiriləcək birinci Avropa Oyunlarında iştirak edəcək ölkələrin idmançıları və nümayəndə heyətləri ölkəmizə gəlməkdə davam edirlər.

AZƏRTAC xəbər verir ki, Oyunlarda iştirak edəcək türkiyəli idmançıların bir qrupu iyunun 8-də Azərbaycana gəlib.

Qardaş ölkə idmançılarını Heydər Əliyev Beynəlxalq Aeroportunda “Bakı-2015” Əməliyyat Komitəsinin əməkdaşları, Türkiyənin Azərbaycandakı səfiri İsmayıl Alper Coşqun və birinci Avropa Oyunlarının könüllüləri qarşılayıblar.

Türkiyənin birinci Avropa Oyunlarında idmanın 20 növü üzrə 190, o cümlədən 80 qadın, 110 kişi atlet ilə təmsil olunacağını bildirən nümayəndə heyəti rəhbərinin müavini Ozan Çetiner jurnalistlərə müsahibəsində deyib: “Azərbaycan bizim üçün dost və qardaş ölkədir. Biz eyni dildə danışırıq və Azərbaycanda özümüzü doğma Vətənimizdəki kimi hiss edirik. Azərbaycanın 50 ölkənin qatılacağı birinci Avropa Oyunlarını yüksək səviyyədə təşkil etdiyini bilirəm. Oyunlar uğurla başa çatacaq. İnşallah, həm azərbaycanlı, həm də türkiyəli idmançılar çoxlu medal qazanaraq ölkələrimizi uğurla təmsil edəcəklər”.

Sinxron üzgüçülük üzrə Türkiyə millisinin baş məşqçisinin köməkçisi Laçın Akçal isə Oyunlarla bağlı fikrilərini bölüşərək deyib: “Türkiyə millisi olaraq ilk dəfə keçirilən Avropa Oyunlarına qatıldığımız üçün özümüzü çox xoşbəxt hesab edirik. Birinci Avropa Oyunları möhtəşəm idman tədbiridir. Biz bu mühüm yarışda Türkiyəni uğurla təmsil edib medallar qazanmaq üçün var gücümüzlə mübarizə aparacağıq”.

Sinxron üzgüçülük üzrə komandanın baş məşqçisi Natalya Maşçuq isə Bakıya gəlməsindən qürur duyduğunu vurğulayaraq bildirib: “Çox şadam ki, Bakıdayam. Komandamız gənclərdən ibarət olmasına baxmayaraq, Avropanın ən güclü 12 kollektivi arasındadır. Birinci Avropa Oyunlarında iştirak etməklə tarix yazacağıq”.

Qeyd edək ki, Türkiyə yığma komandasının nümayəndələri xüsusi avtobuslarla Atletlər kəndinə yola salınıb.