Bakı, 31 mart, AZƏRTAC

“British Council” və “PAŞA Bank”ın birgə əməkdaşlığı çərçivəsində reallaşdırılan “Biznes jurnalistika layihəsi”nin iştirakçıları martın 22-dən 29-dək Böyük Britaniyanın paytaxtı Londonda səfərdə olublar.

AZƏRTAC xəbər verir ki, layihəyə uyğun olaraq keçirilən sonuncu təlimə əsasən azərbaycanlı jurnalistlər London Fond Birjasının, dünyanın media nəhənglərindən olan BBC-nin, “The Daily Telegraph” qəzetinin iş şəraiti ilə yaxından tanış olub, Böyük Britaniya Parlamenti Lordlar Palatasında olublar.

Lordlar Palatasının 5 illik fəaliyyətinin bağlanış mərasiminə də qatılan media nümayəndələri ilə keçirilən görüşdə Palatanın üzvü, Thomson Fondunun təsisçisi Tom Çandos bildirib ki, azərbaycanlı jurnalistlər ilk dəfədir bu kimi yığıncaqda iştirak edirlər. “Bakı-2015” birinci Avropa Oyunlarının ölkəmiz üçün əhəmiyyətindən danışan T.Çandos idmanın insanları və ölkələri birləşdirən çox gözəl vasitə olduğunu vurğulayıb, oyunların Bakıda keçirilməsini Azərbaycan idmanının inkişafı üçün mühüm amil kimi qiymətləndirib. Bildirilib ki, birinci Avropa Oyunlarının Bakıda keçirilməsi Azərbaycana mühüm fayda verəcək.

Böyük Britaniya-Azərbaycan əlaqələrindən söz açan Tom Çandos deyib: “Ölkələrimiz arasında ticarət dövriyyəsinin artırılması üçün gözəl imkanlar mövcuddur. İqtisadiyyat, mədəniyyət, turizm, eləcə də idman sahələrində potensial imkanlardan daha geniş istifadə edilməsi Britaniya-Azərbaycan əlaqələrinə təkan verəcək. Eyni zamanda, media sahəsində münasibətlərin dərinləşdirilməsi də ikitərəfli əlaqələrin güclənməsində mühüm rol oynaya bilər”.

Səfər çərçivəsində jurnalistlər Londonun tarixi məkanlarına baş çəkib, o cümlədən London Tower Bridge, Victoriya and Albert Museum, London Greenwich, British Museum, Big Ben və digər görməli yerlərlə tanış olublar.

Layihə çərçivəsində keçirilən təlimlərin yekunu olaraq martın 27-də jurnalistlərə Birləşmiş Krallığın Thomson Fondunun rəsmiləri tərəfindən sertifikatlar təqdim edilib.

Qeyd edək ki, “Biznes jurnalistika layihəsi” artıq 4-cü dəfədir keçirilir. Layihədə iştirak etmək üçün Azərbaycanın aparıcı media qurumlarından iqtisadiyyat sahəsində ixtisaslaşan 11 jurnalist seçilib. Onların arasında AZƏRTAC-ın müxbiri Samirə Quliyeva da var.

Layihə dünyada minlərlə jurnalistin hərtərəfli inkişafı üzrə fəaliyyət göstərən və 100-dən çox ölkədə media sahəsində ən yüksək etik və peşəkar standartları təşviq edən Avropanın böyük media təşkilatlarından olan Birləşmiş Krallığın Thomson Fondu ilə birgə əməkdaşlıq çərçivəsində həyata keçirilib.