CƏMİYYƏT
Biznes və insan hüquqları üzrə İşçi Qrupun toplantısında korporativ sosial məsuliyyət mövzusu müzakirə olunub
Bakı, 1 iyul, AZƏRTAC
Azərbaycan Respublikasının İnsan Hüquqları üzrə Müvəkkili yanında biznes və insan hüquqları üzrə İşçi Qrupun növbəti toplantısı keçirilib.
“Korporativ sosial məsuliyyət biznes və insan hüquqlarının mühüm elementi kimi” mövzusuna həsr olunan toplantıda Milli Məclisin iqtisadi siyasət komitəsinin sədri Ziyad Səmədzadə, İşçi Qrupunda təmsil olunan İqtisadiyyat və Sənaye, Əmək və Əhalinin Sosial Müdafiəsi, Ədliyyə, Vergilər, Kənd Təsərrüfatı, Ekologiya və Təbii Sərvətlər nazirliklərinin, Mərkəzi Bank, Ailə, Qadın və Uşaq Problemləri üzrə Dövlət Komitəsi, Azərbaycan Həmkarlar İttifaqları Konfederasiyası, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, habelə digər aidiyyəti dövlət qurumlarının nümayəndələri, QHT təmsilçiləri iştirak ediblər.
Tədbirdə çıxış edən Z.Səmədzadə korporativ sosial məsuliyyət mövzusunun yeni və aktual olduğunu diqqətə çatdırıb. Sahibkarlar tərəfindən insan hüquqlarına riayət olunmasının, pozuntu hallarının qarşısının alınması istiqamətində tədbirlərin gücləndirilməsinin zəruriliyini qeyd edən Z.Səmədzadə gələcəkdə problemlərin təhlili, həlli mexanizmlərinin təkmilləşdirilməsi baxımından bu cür tədbirlərin davam etdirilməsinin əhəmiyyətini vurğulayıb.
Ombudsman çıxışında İşçi Qrupun ötən müddət ərzində biznes və insan hüquqları sahəsindəki fəaliyyəti barədə məlumat verib, təşkil edilmiş “dəyirmi masa”ların aktual mövzulara həsr olunduğunu bildirib.
Müvəkkil korporativ məsuliyyət anlayışının biznes qurumlarının istehlakçılara, işçilərə və digər marağı olan şəxslərə münasibətdə sosial məsuliyyəti, korporativ idarəetməni, korporativ etikanı və ekoloji-sosial məsuliyyət kimi mühüm istiqamətləri ehtiva etdiyini bildirib. O, biznes və insan hüquqları kontekstində korporativ sosial məsuliyyətlə bağlı beynəlxalq təcrübəyə nəzər yetirib, BMT-nin “Qlobal Müqavilə”si və bu qurumun İnsan Hüquqları Şurası tərəfindən təsdiq olunmuş “İnsan hüquqları aspektində sahibkarlıq fəaliyyətinin rəhbər prinsipləri”nin biznes və insan hüquqları sahəsində qəbul olunmuş beynəlxalq sənədlər üçün baza rolunu oynadığını, korporativ məsuliyyətlə bağlı mühüm beynəlxalq standartların və rəhbər normaların bu sənədlərdə öz əksini tapdığını vurğulayıb.
E.Süleymanova ölkəmizdə korporativ məsuliyyətin mahiyyətini müəyyən edən məsələlərin Azərbaycan Respublikasının qanunvericilik aktlarında və tövsiyə xarakterli digər sənədlərdə öz əksini tapdığını, buna baxmayaraq qeyd edilən sahədə müvafiq normaları ehtiva edən vahid sənədin işlənib hazırlanmasının zəruriliyini nəzərə çatdırıb.
Müvəkkil korporativ sosial məsuliyyətin təbliğ edilməsinin əhəmiyyətindən söhbət açaraq bu sahədə ölkə Prezidentinin 2011-ci il 27 dekabr tarixli Sərəncamı ilə təsdiq edilmiş və uğurla həyata keçirilən Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramında, habelə “Azərbaycan 2020: gələcəyə baxış” İnkişaf Konsepsiyasında mühüm müddəaların, o cümlədən korporativ məsuliyyət üzrə strategiyanın, dövlət proqramlarının hazırlanması, qanunvericiliyə müvafiq dəyişikliklərin edilməsi, dövlət orqanları ilə QHT-lər arasındakı qarşılıqlı işgüzar münasibətlərin inkişaf etdirilməsi, müvafiq maddi-texniki bazanın gücləndirilməsinin nəzərdə tutulduğunu qeyd edib.
Ombudsman, eyni zamanda, biznes qurumlarında qabaqcıl korporativ idarəetmə mexanizmlərinin tətbiq olunmasında mühüm əhəmiyyət kəsb edən “Azərbaycan Korporativ İdarəetmə Standartları”, “Korporativ Etika Məcəlləsi” kimi tövsiyə xarakterli sənədlər barədə də məlumat verib.
Tədbirdə “Biznes və insan hüquqları sahəsində beynəlxalq hüquqi sənədlərə ümumi baxış”, “Müəssisələrdə qabaqcıl idarəetmə təcrübəsinin tətbiqi, korporativ idarəetmə standartları”, “Bank sektorunda korporativ sosial məsuliyyət siyasəti və mövcud vəziyyət” barədə məruzələr dinlənilib, beynəlxalq hüquqi sənədlərin milli qanunvericiliyə implementasiyası və bu sahədə milli fəaliyyət proqramının işlənib hazırlanması ilə bağlı müzakirələr aparılıb.
Görüşdə İşçi Qrupun gələcək fəaliyyət istiqamətləri də müzakirə olunub.