REGİONLAR


Bölgələrdə Dövlət qulluqçularının peşə bayramı qeyd olunub

Bakı, 23 iyun, AZƏRTAC 

Hər il iyunun 23-ü ölkəmizdə Dövlət qulluqçularının peşə bayramı kimi qeyd olunur. Dövlət qulluqçularının peşə bayramı Prezident İlham Əliyevin 2006-cı il 25 may tarixli Sərəncamı ilə təsis edilib.

AZƏRTAC xəbər verir ki, Dövlət qulluqçularının peşə bayramı bölgələrdə, o cümlədən Qobustan rayonunda da geniş qeyd olunub.

Qobustan rayonunda 131 nəfər dövlət qulluqçusu çalışır. Onların 25 nəfəri qadındır. Dövlət qulluqçuları sırasında gənclərin sayı üstünlük təşkil edir.

Bu barədə Qobustanda Dövlət qulluqçularının peşə bayramına həsr olunmuş tədbirdə məlumat verilib.

Tədbirdən əvvəl rayonda çalışan dövlət qulluqçuları ümummilli lider Heydər Əliyevin abidəsini ziyarət edərək, önünə çiçəklər qoyublar.

Sonra tədbir icra hakimiyyətinin akt zalında davam etdirilib. Rayon icra hakimiyyətinin başçısı Adil Məmmədov dövlət qulluqçularını təbrik edib, onlara çətin və şərəfli işlərində uğurlar arzulayıb.

İcra hakimiyyətinin başçısı, eləcə də digər çıxış edənlər ötən əsrin sonlarında müstəqilliyini bərpa edən Azərbaycanda dövlət qulluğunun formalaşdırılması və inkişafı istiqamətində mühüm işlərin görüldüyünü, bu sahədə ümummilli lider Heydər Əliyevin müstəsna xidmətlərini qeyd ediblər.

Sonda səmərəli fəaliyyətlərinə görə bir qrup dövlət qulluqçusuna rayon icra hakimiyyətinin fəxri fərmanı verilib.

X X X

23 İyun - Dövlət qulluqçularının peşə bayramı Kürdəmirdə də təntənəli surətdə qeyd edilib.

AZƏRTAC xəbər verir ki, rayon icra hakimiyyətində keçirilən tədbirdə icra hakimiyyətinin başçısı Ceyhun Cəfərov dövlət qulluqçularını peşə bayramı münasibətilə təbrik edib, onlara gələcək fəaliyyətlərində uğurlar arzulayıb. Ölkəmizdə dövlət qulluğunun formalaşması və inkişafı prosesində ümummilli lider Heydər Əliyevin misilsiz xidmətlərini xatırladan C.Cəfərov bu siyasətin Prezident İlham Əliyev tərəfindən uğurla davam etdirildiyini diqqətə çatdırıb. Vurğulanıb ki, Dövlət qulluqçularının peşə bayramının qeyd olunması onların cəmiyyətin ictimai-siyasi, sosial-iqtisadi həyatındakı müstəsna roluna verilən ən yüksək qiymət olmaqla, məmurları dövlət quruculuğu prosesində daim fəal, əzmkar olmağa sövq edir.

Qeyd olunub ki, hazırda rayonda müxtəlif sahələrdə 224 dövlət qulluqçusu işləyir. Onlar vəzifə borclarını layiqincə yerinə yetirir, rayonun sosial-iqtisadi inkişafında əllərindən gələni əsirgəmirlər.

Tədbirin sonunda səmərəli fəaliyyətlərinə görə bir qrup dövlət qulluqçusuna rayon icra hakimiyyətinin fəxri fərmanları təqdim edilib.

X X X

Dövlətin və onun vətəndaşlarının qulluğunda durmaq şərəfli, həm də çətin və məsuliyyətlidir. Həyatını, bütün mənalı ömrünü bu sahəyə həsr edən insanlar böyük rəğbətə, dərin hörmətə və ehtirama layiqdirlər.

AZƏRTAC xəbər verir ki, bu fikir İsmayıllıda Dövlət qulluqçularının peşə bayramı gününə həsr edilən mərasimdə səsləndirilib.

İyunun 23-də 280 nəfərə yaxın dövlət qulluqçusunun iştirak etdiyi bayram tədbiri ümummilli lider Heydər Əliyevin abidəsi önündə dahi rəhbərin xatirəsinin anılması ilə başlayıb. Rayon rəhbərləri, hüquq-mühafizə orqanlarının işçiləri, idarə, müəssisə və təşkilatlarda çalışan dövlət qulluqçuları ümummilli lider Heydər Əliyevin abidəsi önünə tər çiçək dəstələri düzüb, hörmət və ehtiramlarını ifadə ediblər.

Tədbir rayon icra hakimiyyətinin iclas zalında davam etdirilib. İcra hakimiyyətinin başçısı Mirdaməd Sadıqov bayram münasibətilə dövlət qulluqçularını təbrik edib.

Çıxışlarda dövlət qulluqçularının xalqın xidmətçisi olduğu diqqətə çatdırılıb. Vurğulanıb ki, dövlət qulluqçusu başqaları üçün nümunə olmalı, Vətən, məslək uğrunda məsuliyyətini dərindən dərk etməlidir.

Tədbirdə bir qrup fəal dövlət qulluqçusuna rayon icra hakimiyyətinin fəxri fərmanı təqdim olunub.

X X X

Dövlət qulluğu mühüm əhəmiyyət daşıyan sahə, çətin və məsuliyyətli, eyni zamanda, şərəfli bir peşədir. Dövlətin nüfuzu, inkişafı dövlət qulluqçusunun, məmurun fəaliyyəti ilə bilavasitə bağlıdır.

AZƏRTAC xəbər verir ki, bu fikir Dövlət qulluqçularının peşə bayramı günü münasibətilə iyunun 23-də Zaqatala şəhərindəki Heydər Əliyev Mərkəzində keçirilən yığıncaqda səsləndirilib.

Tədbir iştirakçıları əvvəlcə Ulu Öndərin Mərkəzin qarşısında ucaldılan abidəsi önünə gül dəstələri düzərək, xatirəsini ehtiramla yad ediblər.

Yığıncaqda ölkəmizdə dövlət qulluğu sisteminin formalaşmasından, demokratik dövlət və vətəndaş cəmiyyəti quruculuğu prosesində dövlət qulluğunun rolundan geniş bəhs edilib. Diqqətə çatdırılıb ki, BMT Baş Məclisinin tövsiyəsi nəzərə alınaraq, Azərbaycan Prezidentinin 2006-cı il 25 may tarixli Sərəncamı ilə hər il iyunun 23-ü ölkəmizdə dövlət qulluqçularının peşə bayramı günü kimi qeyd olunur.

Tədbirdə çıxış edənlər ölkəmizdə dövlət qulluğu sisteminin formalaşması və inkişafında ümummilli lider Heydər Əliyevin xidmətlərini önə çəkib, Ulu Öndərin əsasını qoyduğu dövlətçilik konsepsiyasının hazırda onun layiqli davamçısı, Prezident İlham Əliyev tərəfindən yüksək peşəkarlıqla davam etdirildiyini diqqətə çatdırıblar.

Bildirilib ki, bu gün dövlət və vətəndaş cəmiyyəti quruculuğu prosesində dövlət qulluğunun təşkili tamamilə yeni prinsiplərə əsaslanır, dövlətlə vətəndaş arasında inam və etimad bərqərar olur. Həyata keçirilən dövlət qulluğu siyasəti qanunçuluq, hesabatlılıq, şəffaflıq, cavabdehlik prinsiplərinə əsaslanan dövlət idarəçiliyi sisteminin daha səmərəli inkişafına xidmət edir.

Tədbirin sonunda dövlət orqanlarında səmərəli fəaliyyətinə görə bir qrup dövlət qulluqçusuna rayon icra hakimiyyətinin fəxri fərmanları təqdim olunub.

X X X

Tərtər rayonunda 262 dövlət qulluqçusu fəaliyyət göstərir. Onlardan 34 nəfəri qadınlardır. 230 nəfərin dövlət qulluqçusu ixtisas dərəcəsi var. 220 nəfər inzibati, 28 nəfər isə yardımçı dövlət qulluğu vəzifələrində çalışır.

AZƏRTAC xəbər verir ki, bu barədə Dövlət qulluqçularının peşə bayramı günü münasibətilə iyunun 23-də Tərtər şəhərindəki Gənclər Mərkəzində keçirilən yığıncaqda bəhs edilib.

Tədbir iştirakçıları əvvəlcə ümummilli lider Heydər Əliyevin şəhərin mərkəzində ucaldılan abidəsi önünə gül dəstələri düzüb, xatirəsini ehtiramla anıblar.

Rayon icra hakimiyyətinin başçısı Müstəqim Məmmədov dövlət qulluqçularını peşə bayramı münasibətilə təbrik edib, respublikamızda dövlət idarəçiliyi sistemində həyata keçirilən islahatlardan, qazanılan uğurlardan danışıb. Ölkəmizdə dövlət qulluğunun formalaşması və inkişafı proseslərində ümummilli lider Heydər Əliyevin xidmətlərini xatırladan natiq bu siyasətin Prezident İlham Əliyev tərəfindən uğurla davam etdirildiyini diqqətə çatdırıb.

Bildirilib ki, respublikamızda demokratik, hüquqi və dünyəvi dövlət qurulması prosesində dövlət qulluğunun rolu və Birləşmiş Millətlər Təşkilatının Baş Məclisi tərəfindən iyunun 23-nün Dövlət Qulluğu Günü elan edilməsi nəzərə alınaraq, bu tarix Azərbaycanda da dövlət qulluqçularının peşə bayramı günü elan olunub. Dövlət qulluqçularının peşə bayramı Prezident İlham Əliyevin 2006-cı il 25 may tarixli Sərəncamı ilə təsis edilib.

Məlumat verilib ki, Dövlət qulluqçularının peşə bayramı münasibətilə Azərbaycan Prezidentinin Sərəncamı ilə rayon icra hakimiyyəti başçısının ərazi idarəetmə və yerli özünüidarəetmə orqanları ilə iş şöbəsinin baş məsləhətçisi İlqar Musayev “Tərəqqi” medalı ilə təltif olunub.

Tədbirin sonunda dövlət qulluğunda səmərəli fəaliyyətinə, rayonun ictimai-siyasi həyatında fəal mövqeyinə görə bir qrup dövlət qulluqçusuna rayon icra hakimiyyətinin fəxri fərmanları və qiymətli hədiyyələr, Qarabağ Regional Bilik Evi tərəfindən kitablar təqdim edilib.

X X X

İyunun 23-də Zərdab rayonunda Dövlət qulluqçularının peşə bayramı təntənəli surətdə qeyd edilib.

AZƏRTAC xəbər verir ki, rayonun idarə, müəssisə və təşkilatlarında çalışan dövlət qulluqçuları səhər saatlarında ümummilli lider Heydər Əliyevin abidəsini ziyarət edərək, önünə gül-çiçək dəstələri qoyublar.

Bayram münasibətilə təşkil olunan toplantıda rayon icra hakimiyyəti başçısının birinci müavini Rəhman Feyzullayev dövlət qulluqçularını peşə bayramı münasibətilə təbrik edib, Prezidentin 2017-ci il 21 iyun tarixli Sərəncamı ilə rayon icra hakimiyyəti başçısı aparatının baş məsləhətçisi Rafiq Əhməd oğlu Məmmədovun “Tərəqqi” medalı ilə təltif olunduğunu diqqətə çatdırıb.

Qeyd edilib ki, Azərbaycanın dövlətçilik tarixində böyük rolu olan ümummilli lider Heydər Əliyev kadr seçimində təkcə ideya-siyasi, intellektual meyarlara deyil, eyni zamanda, milli-mənəvi dəyərlərə də əsaslanıb. Hazırda Prezident İlham Əliyev də kadrların məsuliyyətinə, onların dövlət və ictimaiyyət qarşısında daşıdığı hüquqi, mənəvi öhdəliklər məsələsinə ciddi önəm verir.

Bildirilib ki, rayonda müxtəlif sahələrdə 191 nəfər dövlət qulluqçusu çalışır. Onlar bölgənin sosial-iqtisadi və mədəni inkişafına öz töhfələrini verirlər.

Sonda bir qrup fəal dövlət qulluqçusuna qiymətli hədiyyələr təqdim edilib.

X X X

Bu gün Ucarda müxtəlif sahələrdə çalışan dövlət qulluqçuları bölgənin ictimai-mədəni, sosial-iqtisadi həyatında mühüm qüvvə olmaqla rayonun, nəticə etibarı ilə ölkəmizin tərəqqisi naminə var qüvvələrini sərf edirlər. Təsadüfi deyil ki, ötən illərdə rayondan 8 nəfər, bu il isə daha 1 dövlət qulluqçusu Prezidentin Sərəncamı ilə “Dövlət qulluğunda fərqlənməyə görə” medalı ilə təltif olunub.

AZƏRTAC xəbər verir ki, iyunun 23-də Dövlət qulluqçularının peşə bayramı münasibətilə rayon icra hakimiyyətinin iclas zalında keçirilən tədbirdə bu barədə ətraflı danışılıb.

Çıxış edən dövlət qulluqçuları Vaqif Mehdiyev, Əbil Mehtiyev, Nurməmməd Tağıyev və Asif Şirinov bayram münasibətilə təbriklərini çatdırıb, bu şərəfli vəzifəni daim uca tutacaqlarını bildiriblər.

Sonda bir qrup fəal dövlət qulluqçusu rayon icra hakimiyyətinin fəxri fərmanı ilə təltif olunub.

X X X

Dövlət qulluqçularının peşə bayramı Lənkəranda da təntənə ilə qeyd edilib.

Tədbir iştirakçıları əvvəlcə Heydər Əliyev Xatirə Parkında Ümummilli Liderin abidəsi önünə gül dəstələri düzərək, dahi rəhbərin xatirəsini ehtiramla anıblar.

Toplantıda çıxış edən Lənkəran Şəhər İcra Hakimiyyətinin başçısı Taleh Qaraşov dövlət qulluqçularını əlamətdar gün münasibətilə təbrik edərək bildirib ki, müstəqil Azərbaycan dövlətinin inkişafında və möhkəmlənməsində dövlət qulluqçuları səylə çalışır, Vətənə, cəmiyyətə layiqincə xidmət edirlər.

Lənkəranda çalışan dövlət qulluqçularının rayonun ictimai-sosial həyatında böyük rol oynadıqlarını vurğulayan T.Qaraşov ölkəmizdə dövlət qulluqçularının hazırlanmasına, təhsilinə, iş təcrübəsinin təkmilləşdirilməsinə müntəzəm qayğı göstərildiyini, işdə fərqlənən kadrların əməyinə yüksək qiymət verildiyini diqqətə çatdırıb.

O, Lənkəran rayonunun Şiləvar kənd inzibati ərazi üzrə nümayəndəsi Afət Əkbərovun “Dövlət qulluğunda fərqlənməyə görə” medalı ilə təltif olunduğunu vurğulayıb və buna görə rayon ictimaiyyəti adından dövlətimizin başçısına minnətdarlığını bildirib.

Tədbirdə şəhər icra hakimiyyəti başçısının müavini-ictimai-siyasi və humanitar məsələlər şöbəsinin müdiri Rasilə Əliyevanın dövlət qulluqçularının peşə bayramı ilə bağlı məruzəsi dinlənilib.

Sonda dövlət qulluğunda fərqlənənlərin bir qrupuna fəxri fərmanlar verilib.

X X X

Masallı Rayon İcra Hakimiyyətində Dövlət qulluqçularının peşə bayramı gününə həsr olunmuş tədbirin iştirakçıları ümummilli lider Heydər Əliyevin abidəsi önünə gül dəstələri düzərək, Ulu Öndərə böyük hörmət ehtiramlarını bildiriblər.

AZƏRTAC xəbər verir ki, Dövlət qulluqçularının peşə bayramı münasibətilə keçirilən toplantıda çıxış edən Masallı Rayon İcra Hakimiyyətinin başçısı Rafil Hüseynov dövlət qulluqçularını təbrik edib. Bildirib ki, Prezident İlham Əliyevin 2006-cı il 25 may tarixli Sərəncamı ilə hər il iyunun 23-ü Dövlət qulluqçularının peşə bayramı kimi qeyd olunur.

Diqqətə çatdırılıb ki, Azərbaycan xalqının ümummilli lideri Heydər Əliyevin hakimiyyətə qayıdışından sonrakı illərdə, xüsusən yeni Konstitusiyanın qəbul edildiyi 1995-ci ildən sonrakı müddətdə dövlət idarəçiliyinin və dövlət qulluğunun təkmilləşməsi ilə bağlı ardıcıl islahatlar keçirilib, inzibati sistemin tənzimlənməsinə dair xeyli sayda qanun və fərmanlar qəbul edilib, ölkədə dövlət qulluğunun möhkəm normativ hüquqi bazası yaradılıb.

Tədbirdə Azərbaycan Respublikası Prezidentinin müvafiq Sərəncamı ilə Masallı Rayon İcra Hakimiyyəti başçısının Xırmandalı kənd inzibati ərazi dairəsi üzrə nümayəndəsi Məhərrəm İbrahimovun “Dövlət qulluğunda fərqlənməyə görə” medalı ilə təltif olunduğu bildirilib.

Masallı Rayon Məhkəməsinin sədri Hilal Xəlilov, rayon Ağsaqqallar Şurasının sədri Ələşrəf Niftiyev, rayon maliyyə idarəsinin rəis müavini Firəngiz Həsənova, dövlət qulluğu veteranı Hüseyn Əliyev, Masallı “ASAN Xidmət” Mərkəzinin uçot sektorunun müdiri Zahir Əliyev, rayon icra hakimiyyəti başçısının Xırmandalı kənd inzibati ərazi dairəsi üzrə nümayəndəsi Məhərrəm İbrahimov çıxışlarında qeyd ediblər ki, dövlət qulluqçularının işi daim ictimaiyyətin diqqət mərkəzindədir və onlar fəaliyyətlərində humanizm və sosial ədalət prinsiplərinə əsaslanan mənəvi normaları rəhbər tutmalıdırlar.

Tədbirin sonunda rayonda dövlət qulluğunda çalışanların bir qrupuna fəxri fərmanlar və hədiyyələr verilib.

X X X

Lerik Rayon İcra Hakimiyyətində dövlət qulluqçularının peşə bayramı münasibətilə keçirilən tədbirdə dövlət qulluqçularının rayonun ictimai-siyasi, sosial və mədəni həyatındakı fəaliyyəti yüksək qiymətləndirilib.

AZƏRTAC xəbər verir ki, toplantıda çıxış edən rayon icra hakimiyyətinin başçısı Rövşən Bağırov dövlət qulluğunda çalışanları peşə bayramı münasibətilə təbrik edib, ölkəmizdə dövlət quruculuğu sahəsində aparılan islahatların ümummilli lider Heydər Əliyevin adı ilə bağlı olduğunu bildirib.

Qeyd olunub ki, ulu öndər Heydər Əliyevin dövlətçilik ənənələri bu gün Prezident İlham Əliyev tərəfindən davam etdirilir. Uğurlu dövlət quruculuğu siyasətinin ardıcıl həyata keçirilməsi nəticəsində respublikamızda dövlət idarəetmə sisteminin, o cümlədən dövlət qulluğunun təkmilləşdirilməsi üçün mühüm işlər görülür. Dərindən düşünülmüş və elmi cəhətdən əsaslandırılmış proqramların hazırlanması və icrasının təmin edilməsi, Azərbaycanın yüksək iqtisadi sıçrayışına və stabil inkişafına etibarlı zəmin yaradan nəhəng quruculuq işləri hər bir vətəndaşımızda qürur hissi yaradır.

Diqqətə çatdırılıb ki, bu il bayram ərəfəsində rayon icra hakimiyyəti başçısının müavini-sosial-iqtisadi inkişafın təhlili və proqnozlaşdırılması şöbəsinin müdiri Habil Məlikov Azərbaycan Respublikası Prezidentinin Sərəncamı ilə “Dövlət qulluğunda fərqlənməyə görə” medalı ilə təltif edilib. Bu, rayonda çalışan dövlət qulluqçularına göstərilən diqqət və qayğının bariz nümunəsidir.

Tədbirdə rayon icra hakimiyyəti başçısının birinci müavini Cəlil Baxşıyevin dövlət qulluqçularının peşə bayramı ilə bağlı məruzəsi dinlənilib.

Milli Məclisin deputatı İqbal Məmmədov, Yeni Azərbaycan Partiyası Lerik rayon təşkilatının sədri Elxan Qənbərov və Dövlət İdarələri və İctimai Xidmət İşçiləri Həmkarlar İttifaqı Lerik rayon komitəsinin sədri Ələkbər Salayev dövlət qulluqçularını peşə bayramı münasibətilə təbrik edib, çətin və şərəfli işlərində onlara uğurlar arzulayıblar.

Sonra dövlət qulluğunda səmərəli və qüsursuz fəaliyyət göstərən bir qrup dövlət qulluqçusuna fəxri fərmanlar və hədiyyələr verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.