REGİONLAR


Bölgələrdə təhsil ocaqlarında ilk zəng səslənib

A+ A

İsmayıllı, 15 sentyabr, AZƏRTAC

Cülyan kənd tam orta məktəbində 247 nəfər şagird təhsil alır. Keçən tədris ilində 25 nəfər XI sinfi bitirib. Onlardan 12 nəfəri ali məktəblərə qəbul üçün sənəd verib, 8 nəfər tələbə adını qazanıb. Abituriyentlərdən 5 nəfəri 600-dən yuxarı bal toplayıb. Test imtahanlarında nəticələri 690 bala çatan Taleh Ağayev Prezident təqaüdünə layiq görülüb.

AZƏRTAC xəbər verir ki, sentyabrın 15-də Bilik günü münasibətilə İsmayıllı rayonunun Cülyan kəndində keçirilən təntənəli mərasimdə qeyd olunan bu və başqa uğurlar, eləcə də digər təhsil ocaqlarında söylənilənlər ümummilli lider Heydər Əliyev tərəfindən hazırlanan və Prezident İlham Əliyev tərəfindən davam etdirilən dövlət təhsil siyasətinin verdiyi bəhrələr kimi dəyərləndirilib.

Mərasimlərdəki çıxışlarda təhsilə göstərdiyi diqqət və qayğıya, rayonun inkişafındakı hərtərəfli dəstəyə görə Prezident İlham Əliyevə minnətdarlıq ifadə olunub.

Qeyd edilib ki, bu il məzun Ağalətif Lətifov 700 bal toplayaraq ən yüksək nəticəyə nail olub. Ümumilikdə 300 nəfərə yaxın məzun tələbə adını qazanıb. Onlardan 28 nəfəri 600-dən yuxarı bal toplayıb, 2 nəfər Prezident təqaüdünə layiq görülüb.

Bildirilib ki, qarşıdakı dərs ilində İsmayıllı məktəblərində 11400 şagird təhsil alacaq. Onlardan 970 nəfər məktəbə hazırlıq siniflərində oxuyacaq.

Həmin gün Heydər Əliyev adına İvanovka kənd tam orta məktəbində də Bilik günü təntənəli surətdə qeyd olunub.

Bu münasibətlə keçirilən mərasimdə təhsil nazirinin müavini Firudin Qurbanov, rayon icra hakimiyyəti başçısının müavini Mahmud Süleymanov, Bakı Beynəlxalq Multikulturalizm Mərkəzinin məsləhətçisi Valentin Kulik, məktəbin direktoru Mixail Uryupin, valideyn Marina Nikitina və başqaları Bilik günü münasibətilə məktəbin müəllim və şagird kollektivlərini təbrik edib, onlara təhsildə, Azərbaycanda həyat tərzinə çevrilən tolerant mühitin, multikultural dəyərlərin qorunmasında uğurlar arzulayıblar.

Mərasimin sonunda Valentin Kulik məktəbin kitabxanasında şagirdlərlə multikulturalizm haqqında müzakirələr aparıb, onlara mövzu ilə bağlı dolğun informasiya verib.

X X X

Şamaxı rayonun Mədrəsə qəsəbə tam orta məktəbinin şagirdləri Bilik gününü yeni istifadəyə verilən təhsil ocağında qarşılayıblar. 380 yerlik binada keyfiyyətli təlim-tədris üçün hər cür şərait yaradılıb. Burada müasir istilik, havalandırma və işıqlandırma sistemləri quraşdırılıb, yanğın təhlükəsizliyi və içməli su təminatı məqsədilə su çəni qurulub. Məktəbdə 19 sinif otağı, fizika və kimya laboratoriyaları, kompyuter otağı, geniş akt və idman zalı, yeməkxana və digər xidmət otaqları var.

AZƏRTAC xəbər verir ki, bütün bunlar barədə sentyabrın 15-də məktəbdə Bilik günü münasibətilə keçirilən təntənəli mərasimdə danışılıb. Tədbirdə çıxış edən məktəbin direktoru Ağamustafa Teymurov, kənd ağsaqqalı Əhməd Qasımov, müəllim İstək Məmişova yeni tədris ocağının istifadəyə verilməsinə, ümumilikdə, regionlara göstərilən diqqət və qayğıya görə dövlətimizin başçısına minnətdarlıqlarını bildiriblər.

Mərasimdə çıxış edən rayon icra hakimiyyətinin başçısı Asif Ağayev şagird və müəllimləri təbrik edib, onlara təhsildə uğurlar arzulayıb. İcra hakimiyyətinin başçısı son illər respublikamızda, o cümlədən rayonda təhsilin səviyyəsinin yüksəldilməsinə, maddi-texniki bazasının möhkəmləndirilməsinə göstərilən dövlət qayğısından, Prezident İlham Əliyevin bu sahəyə göstərdiyi diqqətdən danışıb, yeni tədris ocaqlarının tikintisində Heydər Əliyev Fondunun xidmətlərindən bəhs edib. Vurğulanıb ki, hazırda Şamaxıda 72 ümumtəhsil məktəbi fəaliyyət göstərir. Regionların sosial-iqtisadi inkişafına dair birinci Dövlət Proqramından bəri həmin məktəblərdən 25-i üçün yeni bina tikilib, 5 məktəb isə əsaslı təmir edilib.

Sonda yeni tədris ocağında yaradılan şəraitlə tanışlıq olub.

X X X

Azərbaycanda həyata keçirilən təhsil islahatları, bu sahəyə göstərilən dövlət qayğısı təhsilin inkişafına mühüm töhfələr verir. Prezident İlham Əliyevin təhsilə, onun maddi-texniki bazasının möhkəmləndirilməsinə göstərdiyi qayğı respublikamızın digər bölgələrində olduğu kimi, Ağsu rayonunda da ümumtəhsil məktəbləri üçün onlarla yeni binanın tikilməsi, əsaslı təmir olunması ilə nəticələnib. Yeni binaların inşasında Heydər Əliyev Fondunun xidmətləri də az olmayıb.

AZƏRTAC xəbər verir ki, bütün bunlar barədə Ağsu rayonunda sentyabrın 15-də Bilik günü münasibətilə ümumtəhsil məktəblərində keçirilən təntənəli mərasimlərdə səsləndirilib.

Qeyd edək ki, 2016/2017-ci dərs ilində rayonda 18-i ibtidai, 16-sı ümumi orta, 35-i tam orta məktəb olmaqla, 69 ümumtəhsil məktəbi fəaliyyət göstərəcək. Məktəblərdə 8500 nəfər şagirdin təlim-tərbiyəsi ilə 1167 nəfər müəllim məşğul olacaq. Cari ildən başlayaraq 24 məktəbdə 26 məktəbə hazırlıq qrupu fəaliyyətə başlayacaq.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.