MƏDƏNİYYƏT
Bolqarıstan Milli Radiosunun dinləyiciləri Azərbaycan mədəniyyəti haqqında məlumatlandırılıb
Sofiya, 8 noyabr, AZƏRTAC
Azərbaycanın Bolqarıstandakı səfiri Nərgiz Qurbanova Bolqarıstan Milli Radiosuna (BNR) müsahibəsində ölkəmizin mədəniyyəti haqqında ətraflı məlumat verib.
Səfir Azərbaycanın sürətlə inkişaf edən ölkə, iqtisadi inkişaf, regional layihələrdə iştirak, multikulturalizm, tolerantlıq və universal dəyərlərin təşviqi üzrə qlobal təşəbbüslərə verdiyi töhfə baxımından bölgədə lider dövlət olduğunu qeyd edib.
Azərbaycanın Bolqarıstanı dost ölkə hesab etdiyini bildirən səfir ölkələrimiz arasında uğurlu əməkdaşlıq ənənələrinin mövcud olduğunu deyib. Bakının 1970-1980-ci illərdə bu şəhərə təhsil almağa gedən çoxlu sayda bolqarlar üçün ikinci ev olduğunu qeyd edən səfir Bolqarıstan vətəndaşları Marian Kolev və Mariana Vasilevanın Azərbaycan Gimnastika Federasiyasının baş məşqçiləri olduğunu xatırladıb. Diplomat iki xalqın qonaqpərvərlik, yenilikləri kəşf etmək marağı və digər oxşar cəhətlərinin olmasından danışıb. Diplomat Bakıda insanların qədim zamanlardan məskunlaşmasının, ilk növbədə, şəhərin coğrafi mövqeyi, Şimaldan Cənuba və Qərbdən Şərqə gedən nəqliyyat yollarının, İpək Yolunun qovuşuğunda yerləşməsi, iqlim və enerji resursları ilə izah edildiyini bildirib. O, Xəzər dənizinin mirvarisi olan Bakının Cənubi Qafqazda ən böyük ticarət, mədəniyyət və elmi mərkəz, Xəzərin ən böyük limanı olduğunu vurğulayıb. Səfir Bakının qədim memarlıq abidələri olan Şirvanşahlar sarayı, İçərişəhər, Qız qalası, Qobustan Milli Parkı, paytaxtın müasir rəmzlərindən sayılan “Alov Qüllələri”, Kristal Zalı, Heydər Əliyev Mərkəzi haqqında da danışıb.
Aparıcının Azərbaycan muzeyləri ilə bağlı sualını cavablandıran səfir ölkəmizdə muzeylərin qədim tarixə və xüsusi inkişaf mərhələlərinə malik olduğunu qeyd edib. O, hazırda Azərbaycanda 250 muzeyin fəaliyyət göstərdiyini diqqətə çatdırıb. Diplomat Bakıda, həmçinin özünəməxsus muzeylərin – dünyada ilk Xalça Muzeyi, Ginnesin Rekordlar Kitabına düşmüş Miniatür Kitablar Muzeyinin mövcud olduğunu bildirib. Muzeylərin Azərbaycanın mədəniyyət siyasəti və diplomatiyasının vacib hissəsi olduğunu söyləyən səfir qeyd edib ki, 1993-cü ildə təsis edilmiş Beynəlxalq Muzeylər Şurasının Azərbaycan Milli Komitəsi muzey işi sahəsində aktiv fəaliyyət göstərir. Azərbaycanın Mədəniyyət və Turizm Nazirliyi UNESCO ilə birgə beynəlxalq konfranslar, “dəyirmi masa”lar, seminarlar təşkil edir. Azərbaycan hökumətinin mədəniyyətin bütün sahələri, o cümlədən muzey işi və idarəçiliyi sahəsinə qayğısından bəhs edən səfir muzeylərin qorunması, konservasiyası ilə bağlı çoxlu qanun və proqramların qəbul edildiyini diqqətə çatdırıb.
Azərbaycanda şəxsi muzeylər barədə suala cavabında səfir bu gün əksər insanların rəqəmsal əşyalardan istifadə etməsinə baxmayaraq, kitabların ən məşhur maddi əşyalardan olduğunu deyib. N.Qurbanova Bakı Miniatür Kitab Muzeyində bütün kitabların oxunaqlı olduğunu, lakin bunun üçün xüsusi böyüdücü cihazlardan istifadəyə ehtiyac duyulduğunu söyləyib. O, həmin muzeyin dünyada miniatür kitablara həsr olunan yeganə şəxsi muzey olduğunu bildirib. Səfir muzeyin Zərifə Salahovanın şəxsi kolleksiyasından ibarət olduğunu qeyd edib.
Azərbaycan və Bolqarıstan arasında mədəniyyət sahəsində əməkdaşlığın perspektivlərinə toxunan səfir 2015-ci il martın 3-də dövlətlərimizin başçılarının müvafiq Bəyannamə imzalaması ilə hər iki ölkənin strateji tərəfdaş olduğunu vurğulayıb. O, ölkələrimizin bir çox sahələr, o cümlədən mədəniyyət sahəsində uğurlu əməkdaşlıq etdiyini, 2011-ci ildə mədəniyyət sahəsində hökumətlərarası Sazişin imzalandığını, cari ilin sentyabr ayında Hökumətlərarası Komissiyanın Bakıda keçirilmiş sonuncu iclasında mədəni məsələlərin də müzakirə olunduğunu, mədəniyyət günlərinin, konsertlərin, sərgilərin, milli mətbəxin təqdimatının keçirilməsi barədə razılığa gəlindiyini diqqətə çatdırıb.
Diplomat Bakı Slavyan Universitetində Bolqar Dili və Mədəniyyəti Mərkəzi və Müqəddəs Kliment Oxridski adına Sofiya Universiteti nəzdində Azərbaycan Dili və Mədəniyyəti Mərkəzinin mədəni əlaqələrin inkişafında xüsusi rolunu qeyd edib. N.Qurbanova cari ilin sentyabrında Azərbaycanın Bolqarıstandakı səfirliyi və Xaricdə Yaşayan Bolqarlar üzrə Dövlət Agentliyinin birgə “Müqəddəs Kiril və Mefodiy və bolqar-bizans mədəniyyət əlaqələri” adlı rəsmlər toplusunu Bolqar Dili və Mədəniyyəti Mərkəzinə hədiyyə etdiyini bildirib. O, mədəniyyət sahəsində əməkdaşlığın inkişafına digər bariz nümunə kimi Heydər Əliyev Fondu tərəfindən “Trapezitsa” Memarlıq Muzeyi Qoruğunun bərpasının maliyyələşdirilməsini qeyd edib. Səfir sentyabrın 22-də baş tutan açılış mərasimində Azərbaycanın birinci xanımı, Heydər Əliyev Fondunun prezidenti Mehriban Əliyevanın, Fondun vitse-prezidenti Leyla Əliyevanın, Bolqarıstanın Baş naziri Boyko Borisovun iştirak etdiyini xatırladıb. O bildirib ki, Balkanlarda səma altında ən böyük muzey olan bu qoruğun bərpası layihəsi Şərqi Avropada Azərbaycanın mədəniyyət sahəsinə qoyduğu ən böyük sərmayədir. Səfir, həmçinin əlavə edib ki, 2017-ci ildə ölkələrimiz diplomatik münasibətlərin qurulmasının 25 illiyini qeyd edəcək və bu çərçivədə Bolqarıstanda Azərbaycan mədəniyyəti günlərinin keçirilməsi nəzərdə tutulub.
Müsahibə boyu Azərbaycanın məşhur bəstəkarlarının əsərləri səsləndirilib.
İqbal Hacıyev
AZƏRTAC-ın xüsusi müxbiri
Sofiya