Sofiya, 23 iyun, AZƏRTAC

Azərbaycanla Bolqarıstan arasında diplomatik münasibətlərin qurulmasının 25-ci ildönümü çərçivəsində Azərbaycanın Bolqarıstandakı səfirliyi tərəfindən bu ölkənin KİV nümayəndələri ilə bir sıra görüşlər keçirilib, müsahibələr verilib və ölkə ictimaiyyətinin məlumatlandırılması istiqamətində fəaliyyət aparılıb.

Belə görüşlərdən biri səfir Nərgiz Qurbanovanın Bolqarıstan Jurnalistlər İttifaqının üzvləri ilə görüşü olub. “Bolqarıstan ilə Azərbaycan arasında 25 illik diplomatik əlaqələr – balans və perspektivlər” mövzusunda keçirilmiş görüş zamanı səfir 2015-ci ildə imzalanmış Strateji Tərəfdaşlıq haqqında Bəyannamənin iqtisadiyyat, elm, təhsil və mədəniyyət sahələrində ölkələrimizin prioritetlərini müəyyənləşdirdiyini bildirib. Diplomat səhiyyə, iqtisadiyyat, xüsusilə kənd təsərrüfatı, enerji və nəqliyyat sahələrində ikitərəfli əlaqələrin inkişaf etdiyini bildirərək Azərbaycan tərəfindən həyata keçirilən layihələrdən danışıb, Bolqarıstan-Qara dəniz-Gürcüstan-Azərbaycan marşrutunun reallaşması imkanlarını dəyərləndirib. “Cənub Qaz Dəhlizi” layihəsi barədə danışan səfir layihənin reallaşmasının strateji baxımdan dünya, xüsusilə region ölkələri üçün böyük əhəmiyyət kəsb etdiyini vurğulayıb. Görüş zamanı Azərbaycanın enerji siyasəti, TANAP, TAP, Bakı-Tbilisi-Ərzurum qaz kəməri layihələri barədə faydalı fikir mübadiləsi aparılıb, “Şahdəniz-2” layihəsi çərçivəsində 2020-ci ildən etibarən Azərbaycanın Bolqarıstana ildə 1 milyard kubmetr qaz ixrac ediləcəyi vurğulanıb. Səfir Bolqarıstanın tranzit ölkə kimi də Azərbaycanın marağını cəlb etdiyini diqqətə çatdırıb.

Səfir, həmçinin Azərbaycanın tarixi və mədəniyyətindən, multikulturalizm modelindən söhbət açıb. Azərbaycanda heç vaxt dinlərarası və ya millətlərarası zəmində problemlərin olmadığını söyləyən səfir Azərbaycan xalqının dünyanın bütün mədəni müxtəlifliyinə eyni dərəcədə hörmətlə yanaşdığını qeyd edib, Veliko Tırnovo şəhərindəki “Trapezitsa” Memarlıq Muzeyi Qoruğunun bərpa olunmasının buna əyani nümunə olduğunu bildirib. Azərbaycanın mədəni müxtəliflik, tolerantlıq və qarşılıqlı hörmət prinsiplərinə əsaslanaraq təkcə ölkə daxilində deyil, xaricdə də mədəni irsin dəstəklənməsi üzrə layihələr həyata keçirdiyini xatırladan N.Qurbanova Vatikan, Fransa, Pakistan, Bosniya və Herseqovinada və başqa ölkələrdə Heydər Əliyev Fondu tərəfindən aparılan xeyirxah fəaliyyət barədə iştirakçılara məlumat verib. Görüş zamanı Azərbaycanda mətbuatının zəngin tarixi barədə də danışılıb, dövlətin media və söz azadlığına dəstəyi vurğulanıb. Diplomat Azərbaycanın dövlət siyasətinin şəffaflıq və dözümlülük üzərində qurulduğunu vurğulayaraq ölkə əhalisinin 80 faizinin sərbəst şəkildə internetə çıxışının olduğunu, 2 milyon insanın sosial mediadan faydalandığını qeyd edib. Qeyd edək ki, Nərgiz Qurbanova “Əzəmət nümunələri - Azərbaycan xalq sənəti” adlı sərgi çərçivəsində Bolqarıstan Milli Radiosunun (BNR) türkdilli bölməsinə müsahibə verib. Müsahibə “Azərbaycan xalq sənəti Bolqarıstan sənətsevərlərini valeh etdi” sərlövhəsi ilə BNR-in rəsmi internet səhifəsində yayılıb. Ölkələrarası münasibətlərin inkişafında mədəni əlaqələrin əhəmiyyətini vurğulayan N.Qurbanova Azərbaycan mədəniyyəti və incəsənəti haqqında ətraflı məlumat verib, mədəni əlaqələrin dəstəklənməsi istiqamətində növbəti tədbirlərdən biri olaraq iki ölkənin xalça mütəxəssisləri arasında təmasların yaradılması üçün təşəbbüslərin göstəriləcəyini qeyd edib.

Səfir Nərgiz Qurbanova Bolqarıstan Milli Televiziyasına müsahibəsində ölkələrimiz arasında diplomatik əlaqələrin yaradılmasının 25 illiyi ilə bağlı ətraflı danışıb. O, ötən illər ərzində iki dövlət arasındakı əlaqələrin strateji tərəfdaşlıq səviyyəsinə yüksəldiyini, mühüm əməkdaşlıq layihələrinin inkişafına nail olunduğunu vurğulayıb. Enerji sahəsində əməkdaşlığın Azərbaycan və Bolqarıstan arasında əlaqələrin vacib hissəsini təşkil etdiyini söyləyən diplomat iki ölkənin Avropaya Azərbaycan qazını çatdıracaq “Cənub Qaz Dəhlizi”nin həyata keçirilməsində tərəfdaş olduqlarını bildirib və sözügedən dəhlizin əhəmiyyətindən danışıb. N.Qurbanova Azərbaycanın multikulturalizm modelini Bolqarıstanda tanıtmaq istədiyini bildirərək Veliko Tırnovo şəhərində Heydər Əliyev Fondunun dəstəyi ilə bərpa olunan “Trapezitsa” Memarlıq Muzeyi Qoruğundan danışıb. Bolqar xalqının dövlətçiliyinin möhkəmləndirilməsi baxımından Trapezitsanın önəminin Azərbaycan tərəfindən də yaxşı bilindiyini vurğulayan səfir Birinci vitse-prezident Mehriban Əliyevanın rəhbərlik etdiyi Heydər Əliyev Fondunun məhz bu səbəbdən sözügedən tarixi abidənin bərpa edilməsi qərarına gəldiyini diqqətə çatdırıb.

Bolqarıstanın nüfuzlu “A-Specto” jurnalı da səfir N.Qurbanova ilə müsahibə dərc edib. “Azərbaycan və Bolqarıstan arasında strateji tərəfdaşlıq: Enerjidən daha çox” adı altında dərc olunan müsahibədə səfir ölkəmiz barədə ətraflı məlumat verib. Diplomat ölkələrimiz arasındakı əlaqələrin böyük perspektivə malik olduğunu və zamanla strateji tərəfdaşlıq səviyyəsinə yüksəldiyini vurğulayıb. Ölkələrimiz arasında turizm, kənd təsərrüfatı, informasiya texnologiyaları və digər sahələrdə əməkdaşlıq imkanlarının olduğunu qeyd edən N.Qurbanova strateji tərəfdaşlıq barədə Birgə Bəyannaməyə istinad edərək əsas məsələlərin müzakirə olunmasında yeni əməkdaşlıq formatının - xarici işlər nazirləri səviyyəsində strateji dialoqun həyata keçirilməsinin vacibliyini qeyd edib.

Səfir Ermənistan-Azərbaycan, Dağlıq Qarabağ münaqişəsi barədə də məlumat verib. Diplomat Ermənistanın təxribatlardan çəkinmədiyini, ötən ilin aprel ayında cəbhə xəttində baş verən gərginliyin bunun bariz nümunəsi olduğunu, qoşunların təmas xətti boyunca Ermənistan silahlı qüvvələrinin Azərbaycan Silahlı Qüvvələrini və təmas xəttinə yaxın ərazilərdə sıx yaşayan mülki əhalini ağır artilleriya və iriçaplı silahlardan hədəfə aldığını bolqar oxucuların diqqətinə çatdırıb.

Müsahibə zamanı səfir Azərbaycanın müstəqil xarici siyasəti, dövlətimiz tərəfindən həyata keçirilən beynəlxalq və regional layihələr barədə də məlumat verib.

İqbal Hacıyev

AZƏRTAC-ın xüsusi müxbiri

Sofiya