SİYASƏT
Bolqarıstanın İqtisadiyyat Akademiyasının kollektivi ulu öndər Heydər Əliyevin fəaliyyəti barədə məlumatlandırılıb
Buxarest, 10 may, AZƏRTAC
Azərbaycanın Bolqarıstandakı səfiri Nərgiz Qurbanova Dimitr Apostolov Tsenov adına İqtisadiyyat Akademiyasının rektoru İvan Marçevskinin dəvəti ilə Bolqarıstanın Sviştov şəhərinə səfər edib. Səfər çərçivəsində səfir İ.Marçevski, Sviştov şəhərinin meri Qenço Qençev, Sviştov şəhərinin Bələdiyyə Şurasının sədri Kristian Kirilov ilə görüşlər keçirib və Bolqarıstanın üçüncü ən böyük universiteti olan Apostolov Tsenov adına İqtisadiyyat Akademiyasında ümummilli lider Heydər Əliyevin anadan olmasının 94-cü ildönümünə həsr edilən mühazirə ilə çıxış edib.
Mühazirə çərçivəsində, həmçinin Müqəddəs Kliment Oxridski adına Sofiya Universitetində Bakı Slavyan Universitetinin (BSU) Azərbaycan Dili və Mədəniyyəti Mərkəzinin təşkilatçılığı ilə “Heydər Əliyevin kəlamları” kitabının təqdimatı keçirilib.
İ.Marçevski ilə görüşdə N.Qurbanova ölkələrimiz arasında uğurla inkişaf edən əlaqələrdən söz açaraq cari ilin ikitərəfli münasibətlərdə əlamətdar olduğunu vurğulayıb. O, bu il Azərbaycan və Bolqarıstan arasında diplomatik münasibətlərin qurulmasının 25-ci ildönümünün qeyd edildiyini diqqətə çatdırıb.
Səfir iki ölkə arasında siyasi, iqtisadi, mədəni əlaqələrlə yanaşı, təhsil sahəsində də əməkdaşlığın inkişaf etməsindən məmnunluğunu bildirib.
İ.Marçevski rəhbərlik etdiyi ali təhsil ocağının tarixi və fəaliyyəti barədə məlumat verib. O, akademiyanın Azərbaycan Dövlət Aqrar Universiteti (ADAU) ilə əməkdaşlıq haqqında saziş imzaladığını, cari ildə ADAU ilə birgə Avropa İttifaqının “Erasmus” proqramı çərçivəsində mübadilə proqramına müraciət edildiyini xatırladıb. Rektor Azərbaycan universitetləri ilə daha sıx əməkdaşlıqda, rəhbərlik etdiyi akademiyaya azərbaycanlı tələbələrin cəlb edilməsində maraqlı olduğunu söyləyib. Səfir Azərbaycan və Bolqarıstan universitetləri arasında əməkdaşlığın genişləndirilməsinin ikitərəfli münasibətlərə töhfə verəcəyini bildirib.
Daha sonra səfir akademiyanın tələbə və akademik heyəti qarşısında ümummilli lider Heydər Əliyevin anadan olmasının 94-cü ildönümünə həsr edilən mühazirə ilə çıxış edib.
Müsəlman şərqində ilk dünyəvi, demokratik dövlətin 1918-ci ildə Azərbaycanda yaradıldığını, XX əsrin sonunda Azərbaycanın ikinci dəfə müstəqillik bayrağını qaldırdığını bildirən diplomat 1991-ci il oktyabrın 18-də Azərbaycan Respublikasının dövlət müstəqilliyinin bərpa olunması haqqında Konstitusiya qanununun qəbul olunduğunu diqqətə çatdırıb.
Müstəqilliyimizin ilk illərində Azərbaycanın çətin iqtisadi vəziyyətlə, vətəndaş müharibəsi təhlükəsi ilə üzləşdiyini qeyd edən N.Qurbanova bu vəziyyətin Ermənistanın Azərbaycana qarşı təcavüzü, Azərbaycan ərazilərinin 20 faizinin işğalı və bir milyondan çox insanın öz doğma yurdlarından didərgin düşməsi ilə daha da ağırlaşdığını söyləyib. O, ölkənin belə çətin vəziyyətdə güclü bir rəhbərə ehtiyac duyduğunu, bu baxımdan 1993-cü ilin Azərbaycan xalqının tarixində dönüş ili olduğunu, həmin il ümummilli lider Heydər Əliyevin hakimiyyətə gəlməsi ilə Azərbaycan tarixində inkişaf və sabitlik dövrünün başlandığını, onun hakimiyyətdə olduğu illərdə Azərbaycanın bütün istiqamətlər üzrə çox böyük uğurlara imza atıldığını qeyd edib. Bildirib ki, ümummilli lider Heydər Əliyevin rəhbərliyi altında ölkənin gələcək inkişafının istiqamətlərini müəyyən edən strateji qərarlar qəbul edildi. Azərbaycanın bazar iqtisadiyyatına malik müasir demokratik ölkəyə transformasiyası yolunda geniş siyasi və iqtisadi islahatlar həyata keçirildi.
Səfir hazırda ümummilli lider Heydər Əliyevin siyasi kursunun Azərbaycan Prezidenti İlham Əliyev tərəfindən uğurla davam etdirildiyini diqqətə çatdırıb. O qeyd edib ki, həyata keçirilən uğurlu daxili və xarici siyasət Azərbaycanı Cənubi Qafqazın lider ölkəsinə çevirib. N.Qurbanova nəhəng nəqliyyat dəhlizlərinin kəsişməsində yerləşən Azərbaycanın regionda bütün tranzit layihələrin əvəzolunmaz iştirakçısı olduğunu bildirib.
Diplomat Azərbaycanın müxtəlif sivilizasiyaların qovuşduğu məkan olaraq, ayrı-ayrı millətlərin və konfessiyaların nümayəndələrinin sülh, əmin-amanlıq və qarşılıqlı anlaşma şəraitində yaşadığı ölkə kimi tanınması, ölkəmizdə multikulturalizm, tolerantlıq və dini dözümlülüyün dövlət siyasəti səviyyəsində inkişaf etdirilməsi barədə də məlumat verib. O, Azərbaycanda tolerantlıq mühiti hər zaman ən yüksək səviyyədə olduğu üçün ölkəmizdə multikulturalizm, millətlər və dinlər arasındakı münasibətlərə, dialoqa həsr edilmiş beynəlxalq səviyyəli bir çox tədbirlər keçirildiyini deyib.
Azərbaycan-Bolqarıstan əməkdaşlığından danışan səfir əlaqələrin bütün sahələrdə - siyasi, iqtisadi, mədəni və s. sahələrdə uğurla inkişaf etdiyini bildirib.
Heydər Əliyev Fondunun dəstəyi ilə Bolqarıstanın Veliko Tırnovo şəhərində “Trapezitsa” Memarlıq Muzeyi Qoruğunun bərpa olunmasının ikitərəfli mədəni əlaqələrə yeni töhfə verdiyini vurğulayan səfir bu layihənin Heydər Əliyev Fondunun Cənub-Şərqi Avropada mədəniyyət sahəsində ən böyük sərmayəsi olduğunu diqqətə çatdırıb. O, həmçinin Bakı Slavyan Universitetində fəaliyyət göstərən Bolqar Dili və Mədəniyyəti Mərkəzi, bolqarşünaslıq ixtisası üzrə 50 tələbənin təhsil alması barədə məlumat verib. Diplomat, həmçinin 2013-cü ildən Müqəddəs Kliment Oxridski adına Sofiya Universitetində Bakı Slavyan Universitetinin Azərbaycan Dili və Mədəniyyəti Mərkəzinin fəaliyyətə başladığı barədə məlumat verərək bu mərkəzlərin ölkələrimiz arasında mədəni əlaqələrin genişlənməsinə töhfə verdiyini söyləyib. N.Qurbanova universitetin müəllim heyəti tərəfindən bolqar dilinə tərcümə edilmiş və Azərbaycan Dili və Mədəniyyəti Mərkəzinin müdiri Sofiya Şıqayeva-Mitreskanın redaktorluğu ilə çap olunmuş “Heydər Əliyevin kəlamları” kitabı barədə tədbir iştirakçılarına məlumat verib.
Mühazirənin sonunda N.Qurbanova universitetin tələbə və müəllim heyətinin ölkəmizin iqtisadi inkişafı, beynəlxalq əməkdaşlığı, enerji siyasəti barədə suallarını cavablandırıb, iştirakçılara “Heydər Əliyevin kəlamları” kitabları hədiyyə olunub.
Səfər Bolqarıstan KİV-lərində geniş işıqlandırılıb.
İqbal Hacıyev
AZƏRTAC-ın xüsusi müxbiri
Sofiya