İQTİSADİYYAT


Bolqarıstanın qızılgül yağı istehsalı ilə məşğul olan şirkətləri məhsullarını Bakıda təqdim edəcəklər

A+ A

Sofiya, 12 avqust, AZƏRTAC

Bolqarıstanda akkreditə olunan bir qrup səfir Azərbaycanın bu ölkədəki səfiri Nərgiz Qurbanovanın təşəbbüsü ilə Pavel Banya və Kazanlık şəhərlərinə səfər edib, lavanda və qızılgül yağı istehsalı ilə məşğul olan şirkətlərdə görüşlər keçiriblər.

Səfər çərçivəsində nümayəndə heyəti Pavel Banya şəhərinin meri Stanimir Radevski tərəfindən qəbul edilib. Görüşdə səfirlərə məlumat verilib ki, Pavel Banya Bolqarıstanın “qızılgül vadisi”ndə qızılgül və lavanda yağı istehsal edən əsas şəhərlərdən biridir. Mineral suların zənginliyi ilə məşhur olan şəhərin iqtisadiyyatında balneoloji turizm ikinci yeri tutur. Pavel Banya dünyanın bir sıra şəhərləri ilə dostluq münasibətləri yaradıb. Eyni zamanda, şəhərin Rusiya, Türkiyə, İspaniya və İtaliyanın müvafiq şəhərləri ilə qardaşlaşmış əlaqələrinin mövcud olduğu qeyd edilib.

Şirkətlərdə keçirilən görüşlərdə bu bölgədə yetişdirilən və özünəməxsus ətri ilə fərqlənən qızılgülün “damascena roza” növü olduğu bildirilib. İlk dəfə İranın Şiraz əyalətində yetişdirilən bu gül növü orta əsr xaç yürüşləri zamanı Suriyadan Avropaya gətirilib. Bolqarıstanın şimal-şərq bölgəsi qızılgül istehsalında kəmiyyətinə, mərkəzi hissəsi isə keyfiyyətinə görə fərqlənir. İstehsal zamanı müxtəlif bölgələrdən gətirilən güllər qarışdırılır. Dünyada qızılgül yağı istehsalının 40 faizi Bolqarıstanın üzərinə düşür ki, bu da təqribən ildə 1,5-2 ton yağ istehsalı deməkdir. Bir kiloqram yağ istehsalı üçün bir hektar ərazi və on nəfər işçi qüvvəsi tələb olunur. Yağın istehsalının 80 faizini əl əməyi təşkil edir. Dünya bazarında bu yağın 1 kiloqramının qiyməti 4 min avrodur. Dünyanın aparıcı ətir firmalarının istifadə etdiyi bu yağ ümumi ətrin 1 faizini təşkil edərək digər inqrediyentlərin təsirini artırır.

Görüşlərdə son vaxtlar Bolqarıstanda mineral su ilə qızılgül suyunun qarışdırılaraq istehsalı tendensiyasının mövcud olduğu barədə məlumat verilib. Bildirilib ki, bu sudan, həmçinin tibbi məqsədlər üçün istifadə edilir.

Səfir N.Qurbanova görüşdə çıxış edərək cari ilin sentyabr ayında Azərbaycan ilə Bolqarıstan arasında Ticarət, İqtisadiyyat, Elm və Texniki Əməkdaşlıq üzrə Hökumətlərarası Komissiyanın dördüncü iclasının keçiriləcəyi barədə məlumat verib. O, qızılgül yağı istehsalı ilə məşğul olan şirkətləri öz məhsullarını təqdim etmək məqsədilə bolqar nümayəndə heyətinin tərkibində Bakıya dəvət edib.

Sonra səfirlər şirkətlərin məhsulları ilə tanış olublar.

İqbal Hacıyev

AZƏRTAC-ın xüsusi müxbiri

Sofiya

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.