Quba, 25 fevral, Elxan Yusifli, AZƏRTAC

Quba Soyqırımı Memorial Kompleksi açıq-aydın göstərir ki, yerli əhali 1918-ci ildə hansı əzabları çəkib və qeyri-humanist münasibətlərlə rastlaşıblar. Bu kimi hadisələr bizə bir yerdə sülh şəraitində yaşamağın əhəmiyyətini və önəmini bir daha xatırlatdı.

AZƏRTAC xəbər verir ki, bu sözləri Böyük Britaniyanın Azərbaycandakı səfiri İrfan Siddiq Quba Soyqırımı Memorial Kompleksini və ərazidəki kütləvi məzarlığı ziyarəti zamanı söyləyib.

Fevralın 25-də Qubaya səfəri çərçivəsində Quba kütləvi məzarlığında olan səfirin diqqətinə çatdırılıb ki, bu ərazi 2007-ci ilin aprelində aşkarlanıb. Kütləvi məzarlıqdan əksəriyyəti uşaq, qadın və qocalara məxsus olan 400-dən çox insanın sümükləri tapılıb. AMEA-nın Arxeologiya və Etnoqrafiya İnstitutu tərəfindən aparılan tədqiqatlar nəticəsində məlum olub ki, məzarlıqda kütləvi şəkildə basdırılanlar ötən əsrin əvvəllərində erməni silahlıları tərəfindən vəhşicəsinə öldürülən yerli sakinlərdir.

Səfiq İrfan Siddiq Azərbaycan Prezidenti İlham Əliyevin təşəbbüsü və Heydər Əliyev Fondunun dəstəyi ilə yaradılan Quba Soyqırımı Memorial Kompleksi ilə də tanış olub. Məlumat verilib ki, kompleksdə XX əsrin əvvəllərində Quba şəhərinin görüntüləri, müxtəlif dövrlərdə burada aparılmış tikinti-quruculuq işləri, əhalinin həyat tərzi haqqında fotoşəkillər var. Buradakı xüsusi bölmədə Azərbaycan Xalq Cümhuriyyətinin yaranma tarixi, bununla bağlı maraqlı fotolar da yer alıb. Kompleksdə quraşdırılan sensor ekranlı monitordakı xüsusi xəritədə ermənilərin ötən əsrdə xalqımıza qarşı həyata keçirdikləri soyqırımları barədə bir neçə dildə məlumat əldə etmək mümkündür.

Quba Soyqırımı Memorial Kompleksi ilə tanışlıqdan sonra britaniyalı diplomat xatirə kitabına ürək sözlərini yazıb.

Səfiq İrfan Siddiq bu səfərin bölgəni yaxından tanımaq və Qubanın tarixini öyrənmək üçün gözəl imkan yaratdığını qeyd edib.

Böyük Britaniyanın Azərbaycandakı səfiri Qubaya səfəri çərçivəsində dağ yəhudilərinin yığcam yaşadıqları Qırmızı qəsəbədə, rayon icra hakimiyyətində və xalçaçılıq müəssisəsində də olacaq.