Bakı, 27 iyul, AZƏRTAC

Kənd Təsərrüfatı Nazirliyinin iribuynuzlu heyvanlar arasında brusellyoza qarşı başladığı peyvəndləmə kampaniyasına Azərbaycan Dövlət Aqrar Universitetinin (ADAU) tələbələri də qoşulub.

Nazirliyin mətbuat xidmətindən AZƏRTAC-a bildiriblər ki, ADAU-nun baytarlıq təbabəti və zoomühəndislik fakültəsinin 16 tələbəsi Quba, Qusar, Bərdə və Şəmkir rayonlarında peyvəndləmə kampaniyasında iştirak edib.

Tələbələrin səfəri nazirliyin həyata keçirdiyi Kənd Təsərrüfatının Rəqabət Qabiliyyətinin Gücləndirilməsi Layihəsi çərçivəsində təşkil olunub. Universitet tələbələri nəzəri biliklərini təcrübədə tətbiq etməyi öyrənməklə yanaşı, peyvəndlənmə zamanı ölkəmizdə səfərdə olan və brusellyoz xəstəliyinə qarşı yeni mübarizə proqramının tərtibatçısı, layihənin beynəlxalq məsləhətçisi, tanınmış epidemioloq Ronald Ceksonla Qusar rayonunda görüşüb, onun tövsiyələrini dinləmək imkanı qazanıblar.