CƏMİYYƏT


Bu il 65 min 272 şəxs üçün peşə hazırlığı və əlavə təhsil kursları, peşəyönümü tədbirlər təşkil edilib

Bakı, 10 avqust, AZƏRTAC

Cari ilin yanvar-iyul aylarında Əmək və Əhalinin Sosial Müdafiəsi Nazirliyi tərəfindən təşkil olunan peşə hazırlığı və əlavə təhsil kurslarına, peşəyönümü tədbirlərinə ümumilikdə 65 min 272 nəfər cəlb olunub.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, onlardan 2 min 476 nəfəri üçün nazirlik yanında Dövlət Məşğulluq Xidməti tərəfindən əmək bazarının tələblərinə uyğun peşələr üzrə peşə hazırlığı və əlavə təhsil kursları təşkil edilib. Avtomobil təmiri üzrə çilingər, qənnadçı, əməliyyatçı mühasib, elektrik qaynaqçısı, elektrik montyoru, xalçaçılıq, mebel quraşdırıcısı, kompüter istifadəçisi, dərzi və s. peşələr üzrə təşkil olunan kursları bitirənlərə peşə sertifikatları təqdim olunub. Qeyd olunan dövrdə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun 1 saylı Sağlamlıq imkanları məhdud gənclərin Peşə Reabilitasiya Mərkəzinə isə 155 nəfər gənc qəbul edilib. Burada gənclərə yeni peşələr öyrədilməklə yanaşı, onların dövlət hesabına yataqxana, yemək, tibbi-fizioterapevtik xidmətlərlə təminatı da həyata keçirilib.

Gənclərin peşə və ixtisaslar üzrə düzgün istiqamətləndirilməsi onların gələcəkdə əmək bazarına inteqrasiyasında və əmək bazarının tənzimlənməsində xüsusi önəm kəsb edir. Bu məqsədlə aparılan işlərin davamı olaraq, cari ilin yanvar-iyul aylarında Dövlət Məşğulluq Xidməti tərəfindən 62 641 nəfər gənc peşəyönümü tədbirlərinə cəlb olunub. Onlara əmək bazarında peşə və ixtisaslara olan tələbat, məşğulluq xidmətləri, aktiv məşğulluq tədbirləri barədə məlumatlar, peşəyönümü məsləhətləri verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.