Biləsuvar, 28 yanvar, Mahir Babayev, AZƏRTAC

Regionların sosial-iqtisadi inkişafı Dövlət Proqramının icrasının ikinci ilinin yekunlarına həsr olunan konfransda Prezident İlham Əliyev qeyri-neft sektorunun inkişafını mühüm vəzifə kimi qarşıya qoyub. Biləsuvarda fermerlər, torpaq mülkiyyətçiləri ilə keçirilən görüşdə bu sahədə görüləcək işlər, xüsusilə pambıqçılığın inkişaf etdirilməsi ətraflı müzakirə olunub.

AZƏRTAC xəbər verir ki, rayon icra hakimiyyətinin başçısı Mahir Quliyev bir vaxtlar pambıq rayonu kimi tanınan Biləsuvarda bu sahənin yenidən dirçəldilməsinin qarşıda duran vəzifələrdən olduğunu bildirib. Qeyd edilib ki, pambıqçılıq Biləsuvar üçün ənənəvi sahədir və sovetlər dövründə rayonda 14 min hektar pambıq əkilib, 37 min tondan çox xam pambıq istehsal olunub. Pambıqçılığın inkişafı üçün rayonda əlverişli torpaq-iqlim şəraiti ilə yanaşı, əhalinin böyük təcrübəsi və marağı da var. Son illər pambığın alış qiymətinin aşağı olması və hektara çəkilən xərclərin artması gəlirlərin azalmasına səbəb olub. Bu da pambıqçılığa marağı azaldıb. Prezident İlham Əliyevin pambıqçılığın əhalinin məşğulluğunun təmin edilməsində vacib sahələrdən biri kimi vurğulaması və verilən tapşırıqlar bu sahənin inkişafı üçün yeni imkanlar açır.

Diqqətə çatdırılıb ki, pambıqçılıqla məşğul olanlara illik 6 faizlə kreditlərin verilməsi nəzərdə tutulur. Hər hektar pambığa 630 manat sərf edilməsi planlaşdırılır ki, bununla da torpağın əkilməsi, gübrələrin verilməsi, texnika ilə təminat öz həllini tapacaq.

Fermerlər Prezident İlham Əliyevin konfransda səsləndirdiyi fikirləri alqışladıqlarını və dövlətimizin başçısının bu çağırışına əməli işləri ilə cavab verəcəklərini bildiriblər.

Görüşdə qərara alınıb ki, bu il rayonda pambıq sahələri 6-7 min hektara çatdırılsın. Bu isə 600 nəfərin daimi, 10 min nəfərin isə mövsümi işlə təmin olunması deməkdir.

Qeyd edək ki, ötən mövsümdə rayonda 3 min 95 hektar sahədə pambıq əkilib.