Şərur, 28 iyun, AZƏRTAC

Naxçıvan Muxtar Respublikasında taxıl biçini uğurla davam edir. Muxtar respublikada bu ilin məhsulu üçün 26 min 795 hektar sahədə buğda, 4 min 784 hektar sahədə isə arpa əkilib. Taxılçılıqla məşğul olan torpaq mülkiyyətçilərinə dövlət tərəfindən maliyyə dəstəyinin göstərilməsi, onların keyfiyyətli toxum sortları və texnikalarla təminatı bol məhsul istehsalına, biçin kampaniyasının vaxtında və itkisiz başa çatdırılmasına imkan verir.

Bu il muxtar respublikanın Şərur rayonunda da 7637 hektar sahədə taxıl əkilib. Bunun 7321 hektarı buğda, 316 hektarı arpadır. Bu günədək torpaq mülkiyyətçilərinə, ümumilikdə, 174 min manat kredit verilib ki, bunun da böyük hissəsindən taxılçılıq üçün istifadə edilib. Bundan başqa, taxılçılıqla məşğul olan hər bir torpaq mülkiyyətçisinə 1 hektar üçün sürtgü yağı alınmasına görə 50 manat, biçin üçün 40 manat vəsait ödənilib. Sahələrə herbisid verilməsi də diqqətdə saxlanılıb.

Şərur rayonunda taxılçılar yüksək reproduksiyalı toxumla təmin ediliblər. Rayonda fəaliyyət göstərən “Aqrotexservis” Səhmdar Cəmiyyətinin toxumçuluq təsərrüfatı bu sahədə mühüm rol oynayır. Artıq bir neçə ildir ki, bəzi taxılçılar özlərinin istehsal etdikləri toxumlardan da istifadə edirlər.

Rayonda taxılçılıqla məşğul olan torpaq mülkiyyətçilərinin sayı hər il daha da artır. Danyeri kənd sakini Ramiz Əliyev 43, Yaycı kənd sakini Kamil Bağırov 42, Düdəngə kənd sakini Faiq Ağayev 30, Xanlıqlar kənd sakinləri İsa Salmanov 38, Musa Salmanov 17, Oğlanqala kənd sakini Madar Abdullayev 17 hektar sahədə taxıl əkiblər. Sahələrdə bol məhsul yetişib. Bir neçə gündür ki, taxıl tədarükünə başlanılıb. Hələlik 20 kombaynın gücündən istifadə olunur ki, bunun 10-u fiziki şəxslərə, 10-u isə “Naxçıvan Aqrolizinq” Açıq Səhmdar Cəmiyyətinin Şərur rayon bazasına məxsusdur. Hazırda rayonun Qorçulu, Oğuzkənd, Xətai kəndlərində də taxıl biçini uğurla davam etdirilir.

Arazqırağı yaşayış məntəqəsi olan Qorçulu kəndində bu mövsümdə 30 hektar sahədən taxıl tədarük ediləcək. Malik Qurbanovun taxıl zəmisində məhsuldarlıqla maraqlanırıq: 40 sentnerdir. Deyir ki, neçə illərdir taxılçılıqla məşğul olur. Bu sahə üçün dövlətimiz tərəfindən müəyyən edilmiş güzəştlərdən təyinatı üzrə istifadə edib. Çəkdiyi zəhmət də hədər getməyib.

Kombayn Fətulla Əliyevin sahəsinə üz tutur. Fətulla 5 hektar sahədə taxıl əkib. Onun zəmisində də yaxşı məhsul yetişib. “Sovet dövründə ümidimizi dükanlara gətirilən una bağlamışdıq. Bu gün dövlətimiz öz qapımızda bizə hər cür şərait yaradıb. Torpaq, su, gübrə, texnika verir, yardım edir, dəyirman da nə qədər istəsən... Daha nə lazımdır? Qalır, zəhmətə qatlaşasan, əziyyət çəkəsən ki, süfrən də bol olsun. Kim ki, zəhmətdən qorxmur, canına cəfa verməyi bacarır, onun gün-güzəranı da istədiyi kimidir”, - deyə Fətulla Əliyev bildirir.

Bu gün Şərurun hansı kəndinə üz tutsaq, taxılçılığa böyük önəm verildiyini görərik. Bu da onunla bağlıdır ki, insanlar özlərinin əkib-becərdikləri məhsuldan istifadəyə üstünlük verirlər. Sevindirici haldır ki, bu gün Şərur rayonunda və ümumilikdə, muxtar respublikada bir qarış torpaq da əkilməmiş qalmır, dövlətimiz bu qiymətli sərvətdən səmərəli istifadə olunması üçün hərtərəfli şərait yaradır. Zəhmətdən qorxmayan naxçıvanlılar isə bu şəraitdən səmərəli istifadə edir, ölkəmizin iqtisadiyyatının güclənməsinə çalışırlar.

AZƏRTAC-ın Naxçıvan Muxtar Respublikasındakı bürosu