ELM VƏ TƏHSİL
Bu il magistraturaya qəbul imtahanının I mərhələsində daha hazırlıqlı bakalavrlar iştirak ediblər
Bakı, 13 aprel, AZƏRTAC
Dövlət İmtahan Mərkəzi (DİM) ali təhsil müəssisələrinin və AMEA-nın magistraturalarına bakalavrların qəbulu üçün aprelin 11-də keçirilmiş imtahanın birinci mərhələsinin nəticələri ilə bağlı statistik göstəriciləri açıqlayıb.
DİM-dən AZƏRTAC-a bildirilib ki, bu il imtahanda iştirak etmək üçün qeydiyyatdan keçən bakalavrların sayı ötən ilə nisbətən az olub. Belə ki, ötən il 24110, bu il isə 13081 bakalavr magistraturaya qəbul olmaq üçün ərizə təqdim edib. İmtahanların ödənişli olması ərizə verənlərin sayının azalması ilə nəticələnən amillərdən biridir. Eyni zamanda, əvvəllər imtahanda iştirak üçün tələb edilən məbləğ iki manat olduğundan namizədlərin müəyyən hissəsi hazırlaşmasa belə qeydiyyatdan keçirdi və ya qeydiyyatdan keçib imtahana gəlmirdi. Ötən il magistraturaya qəbul imtahanının birinci mərhələsində iştirak etmək üçün qeydiyyatdan keçmiş bakalavrlardan 1695-i imtahana gəlməmişdi. Bu il isə cəmi 109 nəfər imtahana gəlməyib. Göründüyü kimi, bu il qeydiyyatdan keçənlər daha məsuliyyətli davranıblar və imtahana gəlməyənlərin sayı ötən illə müqayisədə dəfələrlə azalıb. Bundan əlavə, bu il daha bilikli, öz potensialına güvənən, magistratura səviyyəsində təhsilini davam etdirmək üçün aydın məqsədi və istəyi olan namizədlərin ərizə qəbulunda iştirakı gözlənilirdi.
İmtahanın nəticələri gözləntilərin doğrulduğunu sübut edir. Bu il imtahanda iştirak edən bakalavrların (12972 nəfər) ümumi bilik səviyyəsi daha yüksək olub. Ötən il 22409 bakalavr imtahanda iştirak edib. Bal intervalları üzrə nəticələrin təhlili göstərir ki, ötən il imtahan iştirakçılarının 25,77 faizi (5774 nəfər) 51 və daha yuxarı bal topladığı halda, bu il həmin göstərici 57,99 faizə (7522 nəfər) bərabər olub. Həmçinin bu il 41 və daha yuxarı bal toplayanların faizi 81,64 (10590 nəfər) olub. Ötən il isə müvafiq göstərici 50,44 faiz (11303 nəfər) idi. Bu il ümumilikdə 2382 nəfər (18,36 faiz) 40 və daha aşağı bal toplayıb. Ötən il isə bu göstərici 11106 nəfər (49,56 faiz) idi. Buradan bir daha aydın olur ki, bu il imtahanda daha hazırlıqlı bakalavrlar iştirak ediblər və onların ümumi nəticələri daha yüksəkdir.
Xatırladaq ki, imtahanın birinci mərhələsində bakalavrlara məntiqi təfəkkür üzrə 50, xarici dil üzrə 25 və informatika üzrə 25 test tapşırığı təqdim olunur. Hər bir blok üzrə son 5 sual açıq formalı test tapşırıqlarından ibarətdir. İmtahan suallarının cavablandırılmasına 2 saat 30 dəqiqə vaxt ayrılır. Bakalavrların hər düzgün cavabı bir balla qiymətləndirilir.
Magistraturaya qəbul imtahanının II mərhələsi isə iyunun 4-də keçiriləcək və bakalavrların ixtisas fənləri üzrə bilikləri yoxlanılacaq.