SİYASƏT


Bu ilin I yarısında Bakıda Azərbaycan və Körfəz Əməkdaşlıq Şurası ölkələri arasında strateji və iqtisadi forum keçiriləcək

Bakı, 23 yanvar, AZƏRTAC

2017-ci ilin birinci yarısında Azərbaycan Respublikası və Körfəz Əməkdaşlıq Şurası (KƏŞ) üzv ölkələri arasında Bakı şəhərində strateji və iqtisadi forumun keçirilməsi nəzərdə tutulur.

Xarici İşlər Nazirliyinin mətbuat xidmətindən AZƏRTAC-a bildiriblər ki, Forumun məqsədi iqtisadiyyat, ticarət, sərmayələr, enerji, turizm, kənd təsərrüfatı, ərzaq təhlükəsizliyi, nəqliyyat, mədəniyyət və idman kimi sahələrdə qarşılıqlı faydalı əməkdaşlığın inkişaf etdirilməsi üçün birgə layihələrin müəyyən edilməsi və biznes dairələri arasında birbaşa təmasların təşviq olunmasıdır. Tədbirdə Azərbaycan və KƏŞ üzv dövlətlərinin yüksək vəzifəli rəsmiləri, müvafiq olaraq xarici işlər, iqtisadiyyat, ticarət və sənaye nazirlikləri, ticarət palataları, iş adamları, özəl şirkətləri, suveren fondları və maliyyə-investisiya korporasiyalarının nümayəndələrinin geniş tərkibdə iştirakı nəzərdə tutulur. Forumun təşkili ilə əlaqədar məsələlərin müzakirəsi məqsədilə Xarici İşlər Nazirliyinin nümayəndə heyəti 2016-cı ilin dekabrında KƏŞ-in Ər-Riyadda yerləşən mənzil-qərargahına səfər edib və görüşlər keçirib.

Azərbaycan Respublikası və KƏŞ arasında təsisatlanmış əməkdaşlığın əsasını 2013-cü ilin iyununda Bakı şəhərində Azərbaycan Respublikasının Xarici İşlər Nazirliyi və Körfəz Əməkdaşlıq Şurasının Baş Katibliyi arasında imzalanmış Məsləhətləşmələr Mexanizmi haqqında Anlaşma Memorandumu təşkil edir. İkitərəfli əsasda Azərbaycan Respublikası ilə Körfəz Əməkdaşlıq Şurası ölkələri arasında əməkdaşlıq və qarşılıqlı anlaşmaya əsaslanan ənənəvi dostluq münasibətləri mövcuddur.

Azərbaycan Respublikasının Prezidenti İlham Əliyevin 2017-ci ili Azərbaycanda “İslam Həmrəyliyi İli” elan etməsi, ölkəmizin İslam Həmrəyliyi Oyunlarına ev sahibliyi etməsi, son illər ərzində KƏŞ üzv dövlətləri ilə Azərbaycan arasında həyata keçirilən yüksək səviyyəli qarşılıqlı səfərlər, tərəflərin əlaqələrin inkişafı naminə nümayiş etdirdikləri siyasi iradə, turizm və insanlararası təmasların artması əməkdaşlığın inkişafı üçün yeni əlverişli imkanlar yaradır.

Azərbaycan Respublikası və KƏŞ üzv ölkələri arasında Bakı şəhərində keçirilməsi nəzərdə tutulan strateji və iqtisadi forum hərtərəfli əməkdaşlığın inkişafına mühüm töhfə verəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.