Yardımlı, 26 iyul, Bağır Əliyev, AZƏRTAC

Yardımlı Rayon İcra Hakimiyyətinin geniş şura iclasında bu ilin birinci yarısının yekunları və qarşıda duran vəzifələr müzakirə edilib.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, xatirəsini ehtiramla anıblar.

İclasda hesabat məruzəsi ilə çıxış edən rayon icra hakimiyyətinin başçısı Ayaz Əsgərov bildirib ki, 2017-ci ilin birinci yarısında rayonda kənd təsərrüfatının və sahibkarlığın inkişaf etdirilməsi, tikinti-abadlıq-quruculuq işləri, sosial məsələlərin həlli istiqamətində bir sıra işlər görülüb.

Qeyd olunub ki, bu ilin altı ayında rayonda 27 milyon 571 min manatlıq ümumi məhsul istehsal edilib. Bunun 461 min manatı sənaye, 11 milyon 92 min manatı kənd təsərrüfatına aid olub. Bu müddətdə rayon əhalisinə 10 milyon 741 min manatlıq ticarət, 644 min manatlıq nəqliyyat, 186 min manatlıq rabitə xidməti göstərilib, 4 milyon 446 min manatlıq tikinti-quraşdırma işləri görülüb. Rayonda 969 yeni iş yeri açılıb. Onların 837-si daimi iş yeridir.

Bildirilib ki, yüksək dağlıq ərazidə yerləşən Yardımlı rayonunda aqrar bölmədə uğurlu nəticələr qazanılıb. 2016-cı ildə rayonda 10 hektar sahədə tütün əkini aparılmışdısa, bu il 43 hektara çatdırılıb. Tütün məhsulunun yığılaraq qurudulması və satışı üçün rayonun Urakəran kəndində tütün qurutma müəssisəsi istifadəyə verilib. Bu dövrdə rayonda 108 hektar sahədə fındıq bağları salınıb, 890 hektar kartof, 3549 hektar payızlıq taxıl əkilib. Bunun 3455 hektarını payızlıq buğda, 78 hektarını payızlıq arpa, 16 hektarını isə vələmir təşkil edir. Bu, əvvəlki illərlə müqayisədə xeyli çoxdur. Hazırda rayonda taxıl biçini kampaniyası uğurla davam edir. Ötən il hər hektara orta məhsuldarlıq 18 sentner olmuşdusa, bu il 24 sentner olacağı gözlənilir.

Məruzə və çıxışlarda rayonda aparılan tikinti-quruculuq işlərindən də danışılıb. Qeyd olunub ki, rayon kənd təsərrüfatı idarəsinin inzibatı binasının tikintisi başa çatdırılıb, icra hakimiyyəti üçün inşa edilən yeni inzibati binada və idman kompleksində tikinti işləri davam etdirilir. Honuba-Şıxlar və Avaş kəndlərində həkim məntəqəsi tikilərək istifadəyə verilib, Avur kəndində isə modul tipli yeni məktəb binası tikilir. Masallı-Yardımlı avtomobil yolunda təmir işləri aparılıb, Yardımlı şəhərinə 74 kilometr su və 45 kilometr kanalizasiya xətlərinin çəkilməsi davam etdirilir. Həmçinin Vərov, Bürzünbül, Vərgədüz, Bilnə, Horavar, Əngövül, Əfçədulan, Yolacaq və Horoni kəndlərinə su xətti çəkilərək, 6070 nəfər kənd sakini içməli su ilə təmin olunub. Urakəran və Zevin kəndlərində isə artezian quyuları qazılıb.

Bu müddətdə rayonun yaşayış məntəqələrinin qazlaşması işləri də davam etdirilib. Hazırda Yardımlı şəhəri və 10 kənd təbii qazla təmin olunub.

Tədbirdə Milli Məclisin deputatı Musa Qasımlı çıxış edib, qarşıda duran vəzifələrdən danışıb.

Hesabat yığıncağında müzakirə edilən məsələ ilə bağlı müvafiq qərar qəbul olunub.