Oğuz, 6 fevral, Mustafa Dadaşov, AZƏRTAC

Hesablama Palatasının sədri Vüqar Gülməmmədov fevralın 6-da Oğuz rayonunda ictimaiyyət nümayəndələri ilə görüşüb.

AZƏRTAC xəbər verir ki, yerli icra strukturları, bələdiyyə və hüquq mühafizə orqanları rəhbərlərinin, ziyalıların, iş adamları və sahibkarların iştirak etdikləri tədbiri rayon icra hakimiyyətinin başçısı Eyvaz Qurbanov açaraq, son illər rayonda görülən işlər barədə məlumat verib.

Görüşdə çıxış edən Hesablama Palatasının sədri Vüqar Gülməmmədov 2015-ci ildə dünyada çox müxtəlif siyasi-iqtisadi kataklizmlərin baş verdiyini, maliyyə bazarlarında qeyri-sabit vəziyyətin hökm sürdüyünü, hərbi risklərin və təhlükələrin artdığını, bununla yanaşı, yeni çağırışlar və tələblərin formalaşdığını diqqətə çatdırıb.

Hesablama Palatasının sədri deyib ki, dövlətimizin başçısı müasir dövr üçün prioritetləri müəyyənləşdirib və ölkənin yeni inkişaf strategiyasını təqdim edib. Eyni zamanda, Prezident İlham Əliyev İsveçrənin Davos şəhərində keçirilən Dünya İqtisadi Forumunda panel iclaslarda iqtisadi proseslərin geosiyasi mənbəyi barədə öz mövqeyini açıq şəkildə bildirib.

“2015-ci ilin yekunlarının geniş təhlili göstərir ki, qlobal səviyyədə heç bir iqtisadi prinsiplərə əsaslanmayan proseslər getməkdədir və son ildə xam neftin dünya bazar qiymətinin dəfələrlə aşağı düşməsi yalnız siyasi ambisiyaların və cərəyanların nəticəsidir. Təbii ki, dünyada gedən neft mübarizələri, nüfuz savaşları, neftin qiymətinin kəskin ucuzlaşması ölkəmizin gəlirlərinə mənfi təsir göstərib. Bu isə son nəticədə büdcə daxilolmaları ilə yanaşı, ölkənin tədiyyə balansına, milli valyutası olan manata təsirsiz qala bilməzdi”, - deyə V.Gülməmmədov vurğulayıb.

Hesablama Palatasının sədri bildirib ki, dünyada baş verən mürəkkəb geosiyasi proseslərin ölkə iqtisadiyyatına təsirini minimuma endirmək, xüsusilə əhalinin sosial vəziyyətində bunu hiss etdirməmək, məşğulluğun qorunmasını və artırılmasını təmin etmək istiqamətində zəruri tədbirlərin görülməsi Prezident İlham Əliyevin rəhbərliyi ilə ölkədə həyata keçirilən iqtisadi siyasətin strateji xəttini təşkil edir. Proqnozlaşdırılması çətin olan belə bir dövrdə istər daxili, istərsə də xarici siyasət kursunda çevik addımlar atılıb, xarici təsirlərdən və manatın məzənnəsinin ucuzlaşmasından əhalinin müdafiəsi üçün cəmiyyətin gözlədiyi qərarlar verilib. Dövlətimizin başçısı tərəfindən imzalanan sərəncamlarla maaşlar, pensiya, müavinət və təqaüdlər artırılıb və bu istiqamətdə tədbirlər davam etdiriləcək. Hazırda ölkə əhalisinin sosial rifahını gücləndirmək və davamlı iqtisadi inkişafı təmin etmək, məşğulluğu artırmaq və iqtisadi sistemin qeyri-neft sektorunun dominantlıq etdiyi çoxşaxəli fəaliyyətini stimullaşdırmaq qarşıya əsas məqsədlərdən biri kimi qoyulub.

Diqqətə çatdırılıb ki, bu strategiyanın icrası olaraq Prezident İlham Əliyev tərəfindən Azərbaycan iqtisadiyyatında yeni mərhələyə keçid konsepsiyası irəli sürülüb. Həmin konsepsiyanın əsasını daxili resurslardan tam istifadə etməklə regionlarda sosial-iqtisadi inkişafın sürətləndirilməsi, sahibkarlığın inkişafına daha əlverişli şəraitin yaradılması, idxalı əvəzləyən yerli istehsalın təşkili, ixrac potensialının möhkəmləndirilməsi, rəqabət mühitinin təmin olunması, süni qiymət artımının qarşısının qətiyyətlə alınması, bank sektorunda islahatların aparılması və maliyyə intizamının gücləndirilməsi təşkil edir. Bu istiqamətlərə uyğun olaraq, dövlətimizin başçısı investisiyaların təşviqi və geniş özəlləşdirmə proqramının icrası ilə bağlı tədbirlərin görülməsinin vacibliyini bildirib, hər rayonda sənaye məhəllələrinin yaradılmasına dair tapşırıq verib.

Dövlətimizin başçısı tərəfindən qarşıya qoyulan əsas tapşırıqlardan birinin sahibkarlığın inkişafına daha əlverişli şərait yaratmaq olduğunu bildirən Hesablama Palatasının sədri deyib ki, bu istiqamətdə mühüm işlər görülür, yerli istehsalın sürətləndirilməsi üçün əlavə tədbirlər həyata keçirilir. Regionlarda istehsal sahələrinin, emal müəssisələrinin yaradılması məqsədilə bir çox addımlar atılıb. Güzəştlərin tətbiq olunması, lüzumsuz yoxlamaların dayandırılması, lisenziya verilməsi prosedurlarının sadələşdirilməsi, investisiyaların təşviqi bu qəbildəndir. Hazırda kənd təsərrüfatı istehsalçılarına maliyyə dəstəyi mexanizmi üzərində iş aparılır. 2016-cı ilin dövlət büdcəsinə yenidən baxılaraq, cari ildə Sahibkarlığa Kömək Milli Fonduna əlavə 70 milyon manat vəsaitin ayrılması planlaşdırılır.

Fondun xətti ilə son 5 ildə Oğuz rayonunda fəaliyyət göstərən 75 sahibkarlıq subyektinə 6 milyon 403 min manat güzəştli kredit verildiyini, bunun nəticəsində 185 yeni iş yeri yaradıldığını xatırladan V.Gülməmmədov bildirib ki, rayonda iqtisadiyyatın real sektorunun, o cümlədən kənd təsərrüfatının, emal sahəsinin, xüsusilə turizm sektorunun daha sürətlə inkişaf etdirilməsi üçün hər cür şərait mövcuddur. Əgər mövcud potensialdan səmərəli istifadə olunarsa, istifadəsiz qalmış münbit torpaqlar əkin dövriyyəsinə cəlb edilərsə, rayona dövlət büdcəsindən ayrılan dotasiya əhəmiyyətli şəkildə azalar.

Vüqar Gülməmmədov qeyd edib ki, Prezident İlham Əliyev tərəfindən müəyyən edilən digər əsas istiqamət antiböhran və struktur dəyişiklikləri tədbirləri, dövlətin gəlir və xərclər sisteminə yeni yanaşmadır. Gömrük və vergi sferasında şəffaflığın artırılması, xərclərin optimallaşdırılması, qeyri-səmərəli xərclərdən imtina olunması, büdcə istifadəçilərinin ciddi maliyyə intizamına riayət edilməsi indiki həssas dövrdə xüsusi əhəmiyyət daşıyır.

Prezident İlham Əliyevin daha bir tapşırığı dövlət büdcəsi vəsaitlərinin icrası zamanı israfçılığa yol verilməməsi ilə bağlıdır. Bu barədə danışan Palata sədri bildirib ki, vəsaitlərin səmərəli istifadəsi hər bir dövlət məmurunun fəaliyyətinin əsasını təşkil etməlidir.

Məmur-vətəndaş münasibətlərinə toxunan V.Gülməmmədov dövlətimizin başçısının bununla bağlı tapşırığını xatırladıb: “Dövlət məmuru xalqla bir yerdə olmalıdır. Dövlət məmuru təvazökar olmalı, yekəxanalıq etməməlidir. İnsanların problemləri ilə daim məşğul olmalı, qayğı göstərməlidir. Bu münasibətlər sağlam olmalıdır.”

Çıxışının sonunda Hesablama Palatasının sədri V.Gülməmmədov əsrarəngiz təbiətə, işgüzar insanlara, münbit torpaqlara, xammal ehtiyatlarına və müasir infrastruktura malik Oğuz rayonunda bu zəngin potensialdan tam istifadə olunacağına, qarşıya qoyulan vəzifələrin uğurla icra ediləcəyinə əminliyini bildirib.

Görüşdə çıxış edən sahibkarlar Vaqif Kərimov, Əmir Əliyev, Xəqani Xudiyev və başqaları rayon iqtisadiyyatının inkişafı ilə bağlı təkliflər irəli sürüb, regionların sosial-iqtisadi inkişafına, iş adamlarına göstərilən diqqət və qayğıya görə dövlətimizin başçısına minnətdarlıqlarını ifadə ediblər.