Burkina-Faso: Baş qərargaha hücum nəticəsində 7 nəfər həlak olub
Bakı, 2 mart, AZƏRTAC
Bu gün səhər saatlarında Burkina-Fasonun paytaxtı Uaqaduquda Baş qərargaha və Fransa səfirliyinə silahlı hücum olub. İnsidentin qurbanları haqqında təzadlı xəbərlər yayılır.
AZƏRTAC RİA Novosti informasiya agentliyinə istinadla xəbər verir ki, Burkina-Faso hökumətinin nümayəndəsi və informasiya naziri Remi Cancinunun məlumatına görə, səkkiz silahlı öldürülüb, yeddi hərbçi və təhlükəsizlik xidməti əməkdaşı həlak olub.
Bir qədər əvvəl France-Presse agentliyi hücum nəticəsində azı 28 nəfərin həlak olduğuna dair məlumat yaymışdı. Remi Cancinu bu xəbəri təkzib edib.
Fransanın xarici işlər naziri Jan-İv Le Drian bildirib ki, ölənlər arasında fransız yoxdur. Paris prokurorluğu terror hücumu ilə bağlı təhqiqata başlayıb.
Bölmənin digər xəbərləri
