DÜNYA
“CES 2017” sərgisi çərçivəsində 8 giqabayt əməli yaddaşa malik ilk smartfon təqdim edilib
Bakı, 6 yanvar, AZƏRTAC
Tayvanın “Asus” şirkəti Las-Veqasda keçirilən “CES 2017” sərgisi çərçivəsində 8 giqabayt tutumunda əməli yaddaşla təchiz edilmiş “Zenfone AR” smartfonunu təqdim edib.
AZƏRTAC “ferra.ru” saytına istinadən xəbər verir ki, rekord tutuma malik əməli yaddaş yeni qurğunun yeganə özəlliyi deyil. “Zenfone AR” smartfonu, həmçinin dünyada “Google Tango” artırılmış reallıq texnologiyasının dəstəyinə malik ilk smartfondur.
“Asus Zenfone AR” cihazı 1440x2560 piksel təsvir ölçülü 5.7 düymlük “Super Amoled” displeyi, artırılmış və virtual reallıq texnologiyaları ilə daha səmərəli işləmək üçün optimallaşdırılmış “Qualcomm Snapdragon 821” prosessoru ilə təchiz edilib. Smartfonun əsas yaddaşının tutumu 256 giqabaytdır və “microSD” kartının köməyi ilə onun tutumu artırıla bilər.
Qurğunun təkmilləşdirilmiş avtofokusla təchiz edilmiş əsas kamerasının təsvir ölçüsü 23 meqapiksel, ön kamerada isə 8 meqapikseldir. Həmçinin smartfon barmaq izi skaneri, “Quick Charge 3.0” sürətli enerjidoldurma texnologiyasının dəstəyinə malik 3300 milliamper/saat tutumunda akkumulyator və “USB Type-C” portuna malikdir. Smartfon “Android 7.0 Nougat” sistemi ilə işləyir.