Bakı, 5 iyun, AZƏRTAC 

Müasir dövrün ən böyük bəlalarından biri artıq çəki ilə əlaqədardır. Tibb Universitetinin Tədris Cərrahiyyə Klinikasında ümumi cərrah, tibb elmləri namizədi Elçin Abdinovun apardığı uğurlu əməliyyat nəticəsində xəstə bədənindəki artıq piylərdən azad edilib.

Cərrahın verdiyi məlumata görə, çəkisi 150 kiloqram, boyu 160 santimetr olan xəstə üçüncü dərəcəli piylənmədən əziyyət çəkib və mədəkiçiltmə əməliyyatı aparılmasına qərar verilib.

Lakin artıq çəki və piylənmədən azad olmaq üçün ən uğurlu vasitələrdən biri əməliyyat aparılması olsa da, onu hər xəstə üzərində tətbiq etmək olmaz. AZƏRTAC xəbər verir ki, E. Abdinov universitetin mətbuat xidmətinə verdiyi müsahibədə deyib: “Mədəkiçiltmə əməliyyatının aparılması üçün xəstənin bədən kütlə indeksi 35-dən artıq olmalıdır. Bədən kütlə indeksini hesablamaq üçün çəki boyun uzunluğunun kvadratına bölünür, alınan göstəricinın 20-25 olması normal sayılır. Kütlə indeksinin 30-35 olması birinci, 35-40 olması ikinci, 40-dan artıq olması üçüncü dərəcəli piylənmə sayılır və əməliyyat aparmaq zərurəti yaranır. Bədən kütlə indeksi 40-dan aşağı olanda idman və diyetoloqun köməyi ilə arıqlamaq mümkündür. Bədən kütləsi indeksi 40-ı keçəndə yanaşı xəstəliklər arasında hər hansı riskli xəstəlik varsa, pasiyent diyeta, idman və s. bu kimi tədbirlərlə arıqlaya bilmirsə, yaxud arıqlayandan sonra onu qoruya bilmirsə və yaxud arıqlayıb yenidən kökəlirsə, həmin hallarda əməliyyata göstəriş var”.

Həkimin sözlərinə görə, üçüncü dərəcəli piylənmə ağır səviyyə sayılır və bu zaman xəstədə qaraciyər piylənməsi, damar sıxılması, şəkərli diabet kimi yanaşı xəstəliklər də yaranır: “Əməliyyat olunan xəstədə qaraciyər piylənməsi üçüncü dərəcəli histopatrioz dərəcəsində idi, üstəlik daş xəstəliyi və şəkərli diabetə meyillilik yaranmışdı. 90 kiloqramdan çox artıq çəkisi var idi. Bütün bunlar xəstədə mədəkiçiltmə əməliyyatını qaçılmaz edib”.

E.Abdinovun verdiyi məlumata görə, hazırda 8-9 növ bariatrik cərrahiyyə tətbiq edilir. Onlardan ən geniş yayılanı mədəkiçiltmə əməliyyatıdır. Həmin əməliyyat qısa müddətdə icra edildiyinə və nisbətən az travmatik olduğuna görə ona daha çox üstünlük verilir. Statistikaya əsasən, il ərzində ABŞ-da 600 minə qədər bariatrik cərrahi əməliyyat icra olunur və onun 300 mindən çoxu mədəkiçiltmə əməliyyatıdır.

Qeyd etmək lazımdır ki, əməliyyatdan sonra həzm traktının davamlılığı pozulmur, sadəcə həcmi kiçilir. Nəticədə tez doyma baş verir, iştaha nəzarət altında olur. Əməliyyatdan ilyarım sonra artıq çəkinin 80 faizi itirilir və bəzən həmin faiz daha yüksək olur.