Oktyabrın 20-dən 25-dək “Çex turizm” şirkətinin və “SİS tur”un təşkilatçılığı, Azərbaycan Respublikası Mədəniyyət və Turizm Nazirliyinin, Çexiyanın Azərbaycandakı səfirliyinin dəstəyi ilə bir qrup azərbaycanlı jurnalist Çex Respublikasında səfərdə olub.

Dünyanın gözəl kurort şəhərlərindən biri olan Karlovı Varı şəhərindən başlanan səfər çərçivəsində azərbaycanlı jurnalistlər Çexiyanın bir sıra tarixi və mədəni abidələri ilə tanış oldular.

Karlovı Varı şəhəri hər il 100 minlərlə turisti özünə cəlb edir. Şəhər öz görkəmi, tarixi abidələri, qonaqpərvər insanları ilə buraya gələn qonaqların zövqünü oxşayır. Şəhərin müalicəvi əhəmiyyət daşıyan, minerallarla zəngin suyunun olması buraya turist axınını daha da artırır.

Azərbaycanlı jurnalistlər səfər çərçivəsində Karlovı Varı şəhərində fəaliyyət göstərən məşhur “Mozer” şüşə zavodunda oldular. Burada zavodun tarixi və fəaliyyəti haqqında ətraflı məlumat verildi. Bildirildi ki, 300-dən çox işçisi olan zavodda dünyanın nüfuzlu insanları üçün də qablar və suvenirlər hazırlanır.

Əsası 1858-ci ildə qoyulan zavodun üstünlüklərindən biri də burada istehsal olunan məhsulların əl işi ilə hazırlanmasıdır. Xammal 1259 dərəcə istilikdə əridildikdən sonra müxtəlif fiqurlara salınır. Hazır məhsullar daha sonra xüsusi soyuduculara yığılır.

Zavodun tərkibində muzey də fəaliyyət göstərir. Burada zavodda ilk dəfə istehsal olunmuş qablar və mükəmməl əl işləri saxlanılır.

Çexiya dünyada həm də öz içkiləri ilə məşhurdur. Belə içkilərin hazırlandığı zavodlardan biri də məhz Karlovı Varı şəhərində yerləşir. Azərbaycanlı jurnalistlər çexlərə məxsus “Becherovka” içkisinin muzeyində də oldular. Məlumat verildi ki, bu içki 1807-ci ildən istehsal olunur. Burada beş çeşiddə içki hazırlanır. Muzeydə zavodun ilk binasının maketi, müxtəlif eksponatlar, dəzgahlar nümayiş etdirilir.

Ondan çox müalicəvi su mənbəyi olan Karlovı Varı əsl kurort şəhəridir. Buranın mineral suları həzm xəstəlikləri, maddələr mübadiləsi pozulmalarının müalicəsi üçün səmərəlidir. Burada yerin altından 75 dərəcə istiliklə çıxan qeyzerin ətrafında gündə 20 dəqiqə dayanmaqla ağciyər iltihabı xəstəliklərinin qarşısını almaq mümkündür.

Bura yalnız müalicəvi suları ilə deyil, eyni zamanda, füsunkar təbiəti ilə də turistlərin diqqətini cəlb edir. Həmçinin şəhərdə keçirilən beynəlxalq festivallar, idman yarışları Karlovı Varının məşhurluğunu daha da artırır.

Çexiyanın məşhur müalicəvi sanatoriyalarının cəmləşdiyi Marianskie Lazni şəhəri isə sıx meşələrin əhatəsində yerləşir və gözəl təbiəti ilə buraya gələnləri heyran edir. Bura, həmçinin öz təmiz havası, minerallarla zəngin müalicəvi suları ilə turistləri özünə cəlb edir. Təsadüfi deyil ki, hər il minlərlə xarici turist bu şəhərə gələrək müalicə alır və öz şəfasını burada axtarır. Bir sözlə, bura gözəl mənzərəsi, sakit və əsrarəngiz təbiəti ilə əsl istirahət mərkəzidir. Marianskie Lazni astma, allergiya xəstəliklərindən əziyyət çəkən insanların şəfa tapmaları üçün ən əlverişli məkanlardandır.

Son dayanacağımız isə tarixi ilə bizləri qədim zamanlara, müasirliyi ilə isə bu günümüzə qaytaran paytaxt Praqadır. Bu şəhəri canlı muzey də adlandırsaq yanılmarıq. Çünki burada küçələri gəzərkən hər addımbaşı möhtəşəm tarixi abidələr, sənət əsərləri, müxtəlif tikililərlə qarşılaşırsan.

Vltava çayının üzərində salınmış Praqanın tarixiliyi, möhtəşəm təbiəti, əsrarəngiz mənzərəsi hər il yüz minlərlə turistin bu şəhərə axınını təmin edir.

Şəhəri iki hissəyə ayıran Vltava çayı üzərindən tikilmiş körpülər onun gözəlliyinə əlavə rəng qatır. Bu körpülərdən ən məşhuru Karl körpüsü isə möhtəşəmliyi ilə yanaşı, müxtəlif tarixi adətləri ilə də turistlərin marağına səbəb olur. Körpünün üzərində bir-birindən fərqli heykəllərin, fiqurların olması, həmçinin körpüdən Vltava çayına açılan möhtəşəm mənzərə buradan keçənlərin diqqətini xüsusilə cəlb edir.

Praqanın mərkəzində yerləşən köhnə şəhər meydanı isə burada turistlərdə böyük maraq doğuran məkanlardandır. Tarixi binalarla əhatə olunmuş meydandakı XV əsrə aid astronomik saat Praqanın gözəlliyini daha da artırır. İlin istənilən fəslində bu saatın altında xeyli turist görmək mümkündür. Onlar buraya yığışaraq hər saatın tamamında ətrafdakı pəncərələrdən 12 müxtəlif fiqurun görünməsi və zəngin vurulması prosesini izləyirlər.

Böyük bir tarixi, gözəlliyi ilə yanaşı, Praqa insanı öz gözəl, təmiz küçələri, müasir nəqliyyat infrastrukturu ilə də valeh edir. Çexiya, həmçinin özünəməxsus, bir-birindən fərqli və rəngarəng təamlara malik mətbəxi ilə seçilir. Çex mətbəxinin təamları həm dadlı, həm də doyumludur. Müasirlik və qədimliyin vəhdətinin qovuşduğu bu şəhərə səfərimiz çərçivəsində bizim üçün bu imkanı yaradan “Çex turizm” şirkətinin, “SİS tur”un nümayəndələri və Azərbaycanın Çexiyadakı səfirliyinin əməkdaşları ilə də görüşmək imkanımız oldu.

Görüşdə Azərbaycanın Çexiyadakı səfiri Fərid Şəfiyev ölkələrimiz arasında münasibətlərin yüksək səviyyədə olduğunu bildirdi. Qeyd edildi ki, Azərbaycan ilə Çexiya arasında müxtəlif sahələrdə əməkdaşlıq əlaqələri mövcuddur. Əlaqələrimizi daha da dərinləşdirmək üçün əlverişli imkanlar var.

Səfir qarşılıqlı olaraq bu cür səfərlərin təşkilinin əməkdaşlığın inkişafına xidmət etdiyini bildirdi.

“SİS tur”un nümayəndəsi Jiri Vacha da Azərbaycan haqqında kifayət qədər məlumatlı olduğunu bildirdi. O, Azərbaycanda səfərdə olduğunu və ölkəmizdə gördüyü inkişaf proseslərindən heyran qaldığını diqqətə çatdırdı.

Bununla da Avropanın görməli və gəzməli diyarlarından biri olan Çexiyaya səfərimiz başa çatdı.

Əsəd Məmmədov

AZƏRTAC-ın müxbiri