Pekin, 15 may, AZƏRTAC

“Bir kəmər - bir yol” strategiyası çərçivəsində beynəlxalq forumda iştirak etmək üçün Pekində səfər olan “Azərbaycan Dəmir Yolları” QSC-nin sədri Cavid Qurbanovun başçılıq etdiyi nümayəndə heyəti Çinin Ninsia-Huy Muxtar Rayonunun rəsmiləri ilə görüşüb.

Görüşdə iki ölkə arasında əlaqələrin bütün sahələrdə uğurlu inkişafından məmnunluq ifadə olunub, Azərbaycan Prezidenti İlham Əliyevin 2015-ci ildə Çinə dövlət səfəri zamanı əldə olunan razılaşmaların əməkdaşlığımızın müxtəlif istiqamətlərdə daha da genişlənməsinə öz töhfəsini verdiyi vurğulanıb. Bu istiqamətlərdən biri də hər iki tərəf üçün böyük maraq kəsb edən nəqliyyat, o cümlədən dəmir yolu, yükdaşımaları sahəsində əməkdaşlıqdır.

Çinin dəmir yolu daşınmalarında əhəmiyyətli çəkiyə sahib olan Ninsia-Huy Muxtar Rayonunun rəsmiləri əlverişli coğrafi mövqedə yerləşən Azərbaycanın nəqliyyat-logistika imkanlarından istifadə etmək arzusunda olduqlarını bildirdilər. Onlar Çinin şimal hissəsində yerləşən vilayətlərdə istehsal olunan məhsulların Şərqi Avropaya, Yaxın Şərq ölkələrinə, habelə Türkiyə və Gürcüstana çatdırılması üçün Azərbaycandan keçən nəqliyyat dəhlizlərindən yararlana biləcəklərini qeyd ediblər.

“Azərbaycan Dəmir Yolları” QSC-nin sədri Cavid Qurbanov Beynəlxalq Transxəzər Nəqliyyat Marşrutu, Azərbaycanın nəqliyyat-logistika imkanları, o cümlədən inşası bu il başa çatacaq və Asiya ilə Avropa arasında ən qısa dəmir yolu əlaqəsini təmin edəcək Bakı-Tbilisi-Qars dəmir yolu xətti, Şimal-Cənub nəqliyyat dəhlizi barədə ətraflı məlumat verib. Bildirib ki, Azərbaycan tərəfi Çinin “Bir kəmər -bir yol” strategiyasının iki istiqamətindən biri olan və tarixi İpək yolu üzərində yerləşən ölkələr arasında iqtisadi sahədə münasibətlərin daha da genişləndirilməsini nəzərdə tutan “İpək Yolu İqtisadi Kəməri” təşəbbüsünün reallaşmasına böyük töhfələr verə bilər.

C.Qurbanov Azərbaycan hökumətinin Çin tərəfinə yüklərin Azərbaycan üzərində daşınmasına hər cür dəstək göstərməyə hazır olduğunu bildirib. O, bu istiqamətdə məsələləri müzakirə etmək və ölkəmizin tranzit imkanları ilə tanış olmaq üçün Ninsia-Huy Muxtar Rayonun nümayəndə heyətini Azərbaycana səfərə dəvət edib.

Şahin Cəfərov

AZƏRTAC-ın xüsusi müxbiri

Pekin