DÜNYA
Çin Böyük Britaniyanı onun daxili işlərinə qarışmağı dayandırmağa çağırıb
Pekin, 13 fevral, AZƏRTAC
Çin Xarici İşlər Nazirliyi Böyük Britaniyanı Çinin daxili işlərinə müdaxilə etməyi dayandırmağa çağırıb. Bu barədə Çin XİN-in sözçüsü Xon Ley Böyük Britaniya Xarici İşlər Nazirliyinin Honqkonqdakı vəziyyətlə bağlı növbəti 6 aylıq hesabatını parlamentə təqdim etməsinə dair məsələyə münasibət bildirən zaman deyib.
“Biz Çinə qarşı əsassız ittihamların əks olunduğu hesabatdan çox ciddi şəkildə narazıyıq və onun əleyhinəyik. Honqkonq Çinin xüsusi inzibati regionudur və Honqkonqun məsələləri Çinin daxili işidir. Heç bir xarici ölkənin buna qarışmağa ixtiyarı yoxdur ”, - deyə Xon Ley bildirib.
Xatırladaq ki, uzun illər Böyük Britaniyanın nəzarətində olan Honqkonq 1997-ci ildə Çinə qaytarılandan sonra Honqkonqa Çinin daxilində xüsusi inzibati region statusu verilib. O vaxtdan bəri Böyük Britaniya Xarici İşlər Nazirliyi Honqkonq məsələsinə dair Çin-Böyük Britaniya Birgə Bəyannaməsinin icrasına dair parlamentə hesabat təqdim edir.
Şahin Cəfərov
AZƏRTAC-ın xüsusi müxbiri
Pekin