Bakı, 31 may, AZƏRTAC

Mayın 31-də M.F.Axundzadə adına Azərbaycan Milli Kitabxanasında Özbəkistanın Xalq Şairi Camal Kamalla görüş keçirilib.

AZƏRTAC xəbər verir ki, tədbiri Milli Kitabxananın direktoru, professor Kərim Tahirov açaraq Azərbaycan və özbək xalqları arasında ədəbi və mədəni əlaqələrdən danışıb, görkəmli şair Camal Kamalın şeirlərinin Azərbaycan oxucuları tərəfindən sevilərək oxunduğunu bildirib.

Vurğulayıb ki, Azərbaycan ədəbiyyatının Özbəkistanda tanıdılmasında Camal Kamalın xüsusi rolu var. Qeyd edib ki, Səməd Vurğun, Bəxtiyar Vahabzadə, Xəlil Rza Ulutürk və digər şairlərimizin şeirlərini özbək dilinə tərcümə edib. Eyni zamanda, onun da şeirləri Azərbaycan dilinə çevrilib.

K.Tahirov Milli Kitabxanada türkdilli ölkələrlə bağlı tədbirlər həyata keçirdiklərini də diqqətə çatdırıb.

Milli Məclisin deputatı Qənirə Paşayeva şairin yaradıcılığında tərcüməçiliyin xüsusi yer tutduğunu, Camal Kamalın Azərbaycan ədəbi nümunələrini özbək dilinə tərcümə etdiyini, hazırda dahi Azərbaycan şairi Nizami Gəncəvinin “Xəmsə”sini özbək dilinə çevirdiyini, “Sirlər xəzinəsi” və “Leyli və Məcnun”un özbək dilində işıq üzü gördüyünü bildirib.

Q.Paşayeva Camal Kamalın şairlərimizin əsərlərini özbək oxucularına çatdırması istiqamətində bu gün də fəaliyyət göstərməsini vurğulayaraq onu Azərbaycan ədəbiyyatının təəssübkeşi adlandırıb.

Tədbirdə AMEA-nın Nizami Gəncəvi adına Ədəbiyyat İnstitutunun şöbə müdiri, filologiya elmləri doktoru Almaz Ülvi Camal Kamalın həyat və yaradıcılığı barədə məlumat verib.

Şair-tərcüməçi Akif Azalp bildirib ki, Camal Kamal özbək ədəbiyyatında 60-cılar nəslinin nümayəndələrindən biridir. Qeyd edib ki, o, 8 misralıq şeir forması ilə özbək ədəbiyyatına yenilik gətirib.

Şair Camal Kamal Azərbaycan ədəbiyyatına vurğun olduğunu bildirib, tərcümə etdiyi kitablar barədə məlumat verib və görüşə gələn hər kəsə minnətdarlıq edib.

Görüşün sonunda 50-dək müasir özbək ədəbiyyatı nümunələri Azərbaycan Milli Kitabxanasına hədiyyə edilib. Tədbir iştirakçıları, həmçinin özbək ədəbiyyatı Azərbaycan dilində, Azərbaycan ədəbiyyatı özbək dilində olan kitablardan ibarət sərgi ilə tanış olublar.