İQTİSADİYYAT
Cari ilin doqquz ayı Nərimanov rayonunun sosial-iqtisadi inkişafı üçün uğurlu olub
Bakı, 13 oktyabr, AZƏRTAC
Oktyabrın 13-də Nərimanov rayonunda cari ilin doqquz ayının sosial-iqtisadi inkişafının yekunları və qarşıda duran vəzifələr müzakirə olunub.
Nərimanov Rayon İcra Hakimiyyətindən AZƏRTAC-a bildiriblər ki, iclasda rayon rəhbərliyi, Milli Məclisin deputatları, burada fəaliyyət göstərən idarə, müəssisə və təşkilatların rəhbərləri, ictimaiyyət nümayəndələri iştirak ediblər.
Əvvəlcə tədbir iştirakçıları icra hakimiyyətinin inzibati binasının foyesində xalqımızın ümummilli lideri Heydər Əliyevin büstü önünə tər gül dəstələri qoyublar, Ulu Öndərin əziz və parlaq xatirəsini ehtiramla yad ediblər.
Rayon icra hakimiyyətinin başçısı Abdin Fərzəliyev bildirib ki, ölkə rəhbərinin Bakı şəhəri və ətraf qəsəbələrin sosial-iqtisadi inkişafına dair təsdiq etdiyi müvafiq proqramlar, imzaladığı sərəncamlar, verdiyi tapşırıqların paytaxtımızın aparıcı rayonlarından olan Nərimanov rayonunun da sürətli inkişafına, infrastruktur sahələrinin bərpası və genişləndirilməsinə, sosial-mədəni obyektlərin yaradılmasına, bununla da əhalinin rifah halının yaxşılaşdırılmasına, layiqli həyat tərzinin təmin olunmasına müstəsna töhfələr verir.
Qeyd edilib ki, hesabat dövrü ərzində Bakı şəhərinin giriş qapısı sayılan Heydər Əliyev prospektinin yenidən qurulması layihəsinə uyğun olaraq istismar müddətini keçmiş və sökülmüş səkkiz ədəd yaşayış binasının yerində müasir milli memarlıq üslubunda və orijinal layihə əsasında inşa edilmiş dörd ədəd yaşayış binası, həmçinin Heydər Əliyev prospekti 64 və Koroğlu Rəhimov küçəsi 3A ünvanlarında yeni yaşayış binaları istismara tam hazır vəziyyətə gətirilərək sakinlərin istifadəsinə verilib.
Diqqətə çatdırılıb ki, rayonda yeni müəssisələrin yaradılması, mövcud müəssisələrin fəaliyyətinin bərpa edilməsi nəticəsində 4500 daimi iş yeri yaradılıb. Yeni iş yerlərinin yaradılması ilə bağlı müəssisələr tərəfindən həyata keçirilən tədbirlərin rayon icra hakimiyyəti tərəfindən mütəmadi olaraq dəstəkləndiyi, bu sahədə onlara müvafiq köməklik göstərildiyi bildirilib.
Eyni zamanda, ötən dövr ərzində rayon rəhbərliyi tərəfindən 1714 nəfər vətəndaşın iştirakı ilə keçirilmiş 21 səyyar görüş və qəbullar zamanı edilən 192 nəfərin müraciətinin dinlənilərək müsbət həllini tapdığı, həmçinin “Qaynar xətt-1643” xidmətinə daxil olmuş 488 müraciətdən 413-nün tam həll olunduğu, digər müraciətlərlə bağlı isə vətəndaşlara müvafiq izahatların verildiyi qeyd edilib.
Tədbirdə çıxış edən Milli Məclisin deputatı Hikmət Məmmədov, iş adamı, “Rahatlığın Məkanı Qold” MMC-nin direktoru Akif Mustafayev, Azərbaycan Turizm və Menecment Universiteti rektorunun səlahiyyətlərini icra edən Eldar Aslanov, iş adamı, kənd təsərrüfatı məhsullarının istehsalı ilə məşğul olan “Səma” fərdi müəssisəsinin direktoru İlham Bəkirli, ali dərəcəli həkim, “Atlas” klinikasının nəzdində Dermatoloji Mərkəzin rəhbəri İbrahim Rzayev rayonda vüsət alan abadlıq-quruculuq işləri barədə fikirlərini bildiriblər və rayon sakinlərinin problemlərinin həlli istiqamətində görülən işlərdən məmnunluq ifadə ediblər. Onlar dövlətimizin başçısının rəhbərliyi altında ölkə həyatının bütün sahələrində əldə edilmiş nailiyyətlərdən danışıblar.
Tədbirdə, həmçinin Prezidentin “Dövlət qulluqçularının təltif edilməsi haqqında” 22 iyun 2016-cı il tarixli, 2131 nömrəli Sərəncamına əsasən dövlət qulluğunda səmərəli fəaliyyətinə görə “Dövlət qulluğunda fərqlənməyə görə” medalı ilə təltif olunmuş Nərimanov Rayon İcra Hakimiyyəti Başçısı Aparatının ictimai-siyasi və humanitar məsələlər şöbəsinin baş məsləhətçisi Gülşən Yaqubovaya həmin ali mükafat təqdim edilib.