İQTİSADİYYAT
Cari ilin ilk üç ayı ərzində 2,1 milyon kubmetr sənaye çirkab suları təmizlənib
Bakı, 5 may, AZƏRTAC
“Ekol Mühəndislik Xidmətləri” QSC-nin tullantıların emalı departamenti (TED) bu ilin birinci rübündə Heydər Əliyev adına neft emalı zavodunun (NEZ) departamentin 6-cı sahəsinin (NEZ-in 9-cu sahəsinin ərazisi) mexaniki təmizləyici qurğularına daxil olan 2 milyon 113 min kubmetrdən çox sənaye çirkab sularını neft məhsullarından və mexaniki qarışıqlardan təmizləyib.
Müəssisədən AZƏRTAC-a bildirilib ki, tullantıların emalı departamenti yanvarda həmin ərazidə 511 min 917 kubmetr, fevralda 565 min 117 kubmetr, martda isə 1 milyon 36 min 37 kubmetr çirkab suları təmizləyib. Rüb ərzində TED-in 3-cü sahəsinə “AAS-Ekol” MMC-dən müqavilə əsasında daxil olan 35,16 ton ərsin parafini sudan və mexaniki qarışıqlardan ayrılıb, texnoloji proseslər nəticəsində formalaşan 3 min 810 tona qədər neftşlam müasir texnologiyalarla emal edilərək zərərsizləşdirilib. TED-in 4-cü sahəsində (Heydər Əliyev adına NEZ-in 9-cu sahəsinin ərazisi) 768 min 884 kubmetrə qədər sənaye çirkab suları (yanvarda 309 min 384 kubmetr, fevralda 219 min kubmetr, martda isə 240 min 500 kubmetr) təmizlənib. QSC-nin 4-cü sahəsində 1363 ton neftşlam emal edilərək zərərsizləşdirilib.
Bu ilin birinci rübündə TED müqavilə əsasında müxtəlif sifarişçi təşkilatlardan qəbul edilmiş 316 ton şlam, 6 min 946 kubmetr yağlı su, 10,50 ton yağlı torpaq, 563 kubmetr döşəməaltı-lyal axıntı suları, 4 min 704 kubmetr mədən axıntı suları və digər tullantılar mexaniki üsullarla emal olunaraq zərərsizləşdirilib. Həmçinin departament ilk 3 ayda SOCAR-ın “Kompleks Qazma İşləri” Tresti ilə olan müqaviləyə əsasən həmin ərazidən 693 kubmetr çirkab suları, 288 ton qazma şlam daşıyaraq şirkətin Ekologiya İdarəsinin Tullantı Mərkəzinə təhvil verib.